ନୂଆଦିଲ୍ଲୀ,୧୨।୩: କିଛି ଦିନ ପରେ IPL 2025 ଆରମ୍ଭ ହେବାକୁ ଯାଉଛି। ଏହା ଏହି ଟୁର୍ନାମେଣ୍ଟର ୧୮ତମ ସିଜିନ ହେବ। ପ୍ରଥମ ମ୍ୟାଚ୍ରେ କୋଲକାତା ନାଇଟ ରାଇଡର୍ସ ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମୁହାଁମୁହିଁ ହେବେ। ଏହି ମ୍ୟାଚ କୋଲକାତାର ଇଡେନ ଗାର୍ଡେନ ଷ୍ଟାଡିୟମରେ ଖେଳାଯିବ। ୨୨ ମାର୍ଚ୍ଚରେ ଏହି ମ୍ୟାଚ୍ ଜରିଆରେ ପ୍ରଶଂସକମାନେ ୨୦୦୮ ସିଜନର ଆକ୍ସନର ରିପ୍ଲେ ଦେଖିପାରିବେ। ଆଇପିଏଲ ଇତିହାସରେ ଦ୍ୱିତୀୟ ଥର ପାଇଁ ସିଜିନର ପ୍ରଥମ ମ୍ୟାଚ କୋଲକାତା ନାଇଟ ରାଇଡର୍ସ ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମଧ୍ୟରେ ଖେଳାଯିବ।
ଏହା ପୂର୍ବରୁ ୨୦୦୮ରେ ଘଟିଥିଲା। ଏହା ଆଇପିଏଲର ପ୍ରଥମ ସିଜିନ ଥିଲା ଏବଂ ସେହି ବର୍ଷ ମଧ୍ୟ ସିଜିନର ପ୍ରଥମ ମ୍ୟାଚ କୋଲକାତା ଏବଂ ବେଙ୍ଗାଲୁରୁ ମଧ୍ୟରେ ଖେଳାଯାଇଥିଲା। ଆଇପିଏଲ ୨୦୦୮ ପରଠାରୁ ୧୭ ବର୍ଷ ପରେ, ଉଭୟ ଦଳ ଉଦଘାଟନୀ ମ୍ୟାଚରେ ମୁହାଁମୁହିଁ ହେବେ। ଆଇପିଏଲର ପ୍ରଥମ ସିଜିନରେ, କୋଲକାତା ନାଇଟ ରାଇଡର୍ସ ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମଧ୍ୟରେ ମ୍ୟାଚ ବେଙ୍ଗାଲୁରର ଏମ ଚିନ୍ନାସ୍ବାମୀ ଷ୍ଟାଡିୟମରେ ଖେଳାଯାଇଥିଲା। ସେହି ସିଜିନରେ ସୌରଭ ଗାଙ୍ଗୁଲି କୋଲକାତାର ଅଧିନାୟକ ଥିଲେ। RCBର ଅଧିନାୟକ ଥିଲେ ରାହୁଲ ଦ୍ରାବିଡ।
୨୦୦୮ ଆଇପିଏଲର ପ୍ରଥମ ମ୍ୟାଚ୍ରେ, ଆରସିବି ଟସ ଜିତି ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି, KKR ବ୍ରେଣ୍ଡନ ମ୍ୟାକକୁଲମଙ୍କ ବିସ୍ଫୋରକ ଶତକ ବଳରେ ସେହି ମ୍ୟାଚରେ ୨୦ ଓଭରରେ ୨୨୨ ରନ କରିଥିଲା। ମ୍ୟାକକୁଲମ ୭୩ ବଲ୍ରେ ୧୦ ଚୌକା ଏବଂ ୧୩ ଛକା ସହାୟତାରେ ଅପରାଜିତ ୧୫୮ ରନ କରିଥିଲେ। ଜବାବରେ, RCB ୧୫.୧ ଓଭରରେ ୮୨ ରନରେ ଅଲଆଉଟ ହୋଇଯାଇଥିଲା। ପ୍ରବୀଣ କୁମାର (୧୮ ଅପରାଜିତ)ଙ୍କ ବ୍ୟତୀତ ଅନ୍ୟ କୌଣସି ବ୍ୟାଟସମ୍ୟାନ ଦୁଇ ଅଙ୍କ ଛୁଇଁ ପାରି ନ ଥିଲେ। କୋଲକାତା ନାଇଟ ରାଇଡର୍ସ ସେହି ମ୍ୟାଚ କୁ ୧୪୦ ରନରେ ଜିତିଥିଲା।
୨୨ ମାର୍ଚ୍ଚରେ କୋଲକାତାର ଇଡେନ ଗାର୍ଡେନରେ KKR ଏବଂ RCB ପରସ୍ପରର ମୁହାଁମୁହିଁ ହେବେ, ସେମାନଙ୍କର ଲକ୍ଷ୍ୟ ହେବ ବିଜୟ ସହିତ ଟୁର୍ନାମେଣ୍ଟ ଆରମ୍ଭ କରିବା। ଉଭୟ ଦଳ ଏହି ସିଜିନ ପାଇଁ ନୂତନ ଅଧିନାୟକ ଚୟନ କରିଛନ୍ତି। ଆଇପିଏଲ ୨୦୨୫ରେ, ଅଜିଙ୍କ୍ୟ ରାହାଣେ କୋଲକାତାର ଏବଂ ରଜତ ପତିଦାର ଆରସିବିର ଅଧିନାୟକ ହେବେ।
