ନୂଆଦିଲ୍ଲୀ, ୧୧।୫ : ଦେଶଦ୍ରୋହ ମାମଲା ନେଇ କେନ୍ଦ୍ର ସରକାର ସୁପ୍ରିମକୋର୍ଟ (ଏସ୍ସି)ରେ ବୁଧବାର ଜବାବ ରଖିଛନ୍ତି। କେନ୍ଦ୍ର ସରକାର କହିଛନ୍ତି ଯେ, ଏସ୍ପିଙ୍କ ହୃଦବୋଧ ହେଲାପରେ ଦେଶଦ୍ରୋହ ମାମଲା ରୁଜୁ ହେବ। ମଙ୍ଗଳବାର ହୋଇଥିବା ଶୁଣାଣିରେ ପ୍ରଧାନ ବିଚାରପତି ଏନଭି ରମନାଙ୍କ ନେତୃତ୍ୱରେ ତିନିଜଣିଆ ଖଣ୍ଡପୀଠ କହିଥିଲେ ଯେ ଦେଶଦ୍ରୋହ ଆଇନକୁ ସମୀକ୍ଷା କରିବା ପାଇଁ କେନ୍ଦ୍ରକୁ ଅଧିକ ସମୟର ଆବଶ୍ୟକତା ରହିଛି।
କିନ୍ତୁ ସୋଲିସିଟର ଜେନେରାଲ ସରକାରଙ୍କଠାରୁ ନିର୍ଦ୍ଦେଶ ଗ୍ରହଣ କରିବା ଉଚିତ ଏବଂ ବିଚାରାଧୀନ ମାମଲା ଏବଂ ଭବିଷ୍ୟତରେ ପଞ୍ଜୀକୃତ ହେବାକୁ ଥିବା ମାମଲା ଉପରେ ଏହାର ପ୍ରଭାବ କ’ଣ ହେବ ସେନେଇ ନିଜର ପକ୍ଷ ରଖିବା ଜରୁରୀ।
୧୨୪-ଏ ର ବିଚାରାଧୀନ ମାମଲାକୁ ସ୍ଥଗିତ ରଖାଯାଇପାରିବ କି ନାହିଁ ସେସମ୍ପର୍କରେ ମଧ୍ୟ କେନ୍ଦ୍ର ସରକାର ଉତ୍ତର ଦେବା ଆବଶ୍ୟକ। ବୁଧବାର ଅନୁଷ୍ଠିତ ଶୁଣାଣି ସମୟରେ କେନ୍ଦ୍ର ସୁପ୍ରିମକୋର୍ଟଙ୍କୁ କହିଛନ୍ତି ଯେ ଦେଶଦ୍ରୋହ ଅପରାଧକୁ ପଞ୍ଜିକୃତ କରିବାରୁ ରୋକାଯାଇ ପାରିବ ନାହିଁ। ଶୁଣାଣି ସମୟରେ କୋର୍ଟରେ ଚାଲିଥିବା ମାମଲାଗୁଡ଼ିକର ଶୁଣାଣି ଜାରି ରଖିବାକୁ କେନ୍ଦ୍ର ସରକାର କହିଛନ୍ତି।
କେନ୍ଦ୍ର କୋର୍ଟଙ୍କୁ କହିଛନ୍ତି ଯେ ୧୨୪-ଏ ମାମଲାରେ ଏସ୍ପିଙ୍କ ସନ୍ତୁଷ୍ଟ ହେବା ଜରୁରୀ। ତାଙ୍କର ହୃଦବୋଧ ପରେ ହିଁ ଦେଶଦ୍ରୋହ ମାମଲା ରୁଜୁ ହେବ।
ପ୍ରଧାନ ବିଚାରପତି ଏନ.ଭି ରାମନା ଏବଂ ଜଷ୍ଟିସ ସୁର୍ଯ୍ୟ କାନ୍ତ, ଜଷ୍ଟିସ ହିମା କୋହଲିଙ୍କ ନେତୃତ୍ୱରେ ଗଠିତ ବେଞ୍ଚ ଦ୍ୱାରା ଏହି ମାମଲାର ଶୁଣାଣି କରି ଏଭଳି କହିଛନ୍ତି। ଆବେଦନକାରୀଙ୍କ ଆଇନଜୀବୀ କପିଲ ସିବଲ ଶୁଣାଣି ସମୟରେ କହିଛନ୍ତି ଯେ ଦେଶଦ୍ରୋହ ଆଇନକୁ ବନ୍ଦ କରିବା ଆମର ଦାବି ନୁହେଁ।
ଏନେଇ ଜଷ୍ଟିସ ସୂର୍ଯ୍ୟକାନ୍ତ କହିଛନ୍ତି ଏହା ଏକ ପରବର୍ତ୍ତୀ ପ୍ରକ୍ରିୟା। ଏହି ସମସ୍ୟାର ଉପଯୁକ୍ତ ସମାଧାନ ବିଷୟରେ ଆଲୋଚନା କରିବାକୁ ଆମେ ଏଠାରେ ଅଛୁ ବୋଲି ସେ କହିଛନ୍ତି।
ନିକଟ ଅତୀତରେ ଏହାର ଅପବ୍ୟବହାର ଯୋଗୁ ପ୍ରାୟ ୧୫୦ ବର୍ଷ ପୁରୁଣା ଦେଶଦ୍ରୋହ ଆଇନ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ଆଇପିସିର ଧାରା ୧୨୪-ଏ ଦେଶଦ୍ରୋହ ମାମଲା କ୍ଷେତ୍ରରେ ପ୍ରଯୁଜ୍ୟ। ୧୦ରୁ ଅଧିକ ଆବେଦନ ମାଧ୍ୟମରେ ସୁପ୍ରିମକୋର୍ଟରେ ଏହା ଉପରେ ଚ୍ୟାଲେଞ୍ଜ କରାଯାଇଛି। ଏହା ଅଭିବ୍ୟକ୍ତିର ମୌଳିକ ଅଧିକାରର ଉଲ୍ଲଂଘନ ହେଉଥିବା ଦର୍ଶାଇ ଆବେଦନକାରୀମାନେ ଆଇନକୁ ରଦ୍ଦ କରିବାକୁ ଦାବି କରିଛନ୍ତି।
ପୂର୍ବ ଶୁଣାଣିରେ ସରକାର କହିଥିଲେ ଯେ ୧୯୬୨ରେ ସୁପ୍ରିମକୋର୍ଟର ପାଞ୍ଚଜଣିଆ ଖଣ୍ଡପୀଠ ଏହି ଆଇନକୁ ବୈଧ ଘୋଷଣା କରିଛନ୍ତି। ’କେଦାରନାଥ ସିଂ ବନାମ ବିହାର ସରକାର ମାମଲାରେ ଦିଆଯାଇଥିବା ଏହି ନିଷ୍ପତ୍ତିରେ କୋର୍ଟ ଆଇନର ସୀମା ସ୍ଥିର କରିଛନ୍ତି। ସରକାରଙ୍କ ବିରୋଧରେ ହିଂସା ସୃଷ୍ଟି କରିବାକୁ ଚେଷ୍ଟା କରିବା ପାଇଁ ଏହି ଧାରା ଲାଗୁ କରାଯିବା ଉଚିତ ବୋଲି କୁହାଯାଇଥିଲା।
ସମ୍ପ୍ରତି, କେତେକ ରାଜ୍ୟରେ ଏହି ଧାରା ଆବଶ୍ୟକତା ନଥିବା କ୍ଷେତ୍ରରେ ମଧ୍ୟ ଲାଗୁ କରାଯାଇଛି । ଏହାର ଅପବ୍ୟବହାର ବନ୍ଦ ହେବା ଆବଶ୍ୟକ ବୋଲି ଆବେଦନକାରୀମାନେ ଉଲ୍ଲେଖ କରିଛନ୍ତି।
