ଭଦ୍ରକ,୯।୫ (ସନାତନ ରାଉତ)-ଭଦ୍ରକ ଲୋକ ସଭା ଓ ଜିଲାର ୫ ବିଧାନସଭା ନିର୍ବାଚନମଣ୍ଡଳୀ ପାଇଁ ନିର୍ବାଚନ ଆୟୋଗଙ୍କ ଦ୍ୱାରା ୩ଜଣ ଖର୍ଚ୍ଚ ପର୍ଯ୍ୟବେକ୍ଷକଙ୍କୁ ନିଯୁକ୍ତ କରାଯାଇଛି। ଜିଲା ନିର୍ବାଚନ ଅଧିକାରୀ ତଥା ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦରଙ୍କ ଅଧ୍ୟକ୍ଷତାରେ ଗୁରୁବାର ସଦ୍ଭାବନା ସଭାଗୃହରେ ଖର୍ଚ୍ଚ ପର୍ଯ୍ୟବେକ୍ଷକମାନଙ୍କ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି।
ଭଦ୍ରକ ସଂରକ୍ଷିତ ଲୋକ ସଭା ଆସନ ପାଇଁ ନିଯୁକ୍ତ ଆର୍ଭି ଅରୁଣ ପ୍ରସାଦ, ଭଣ୍ଡାରିପୋଖରୀ, ଭଦ୍ରକ ଓ ସଂରକ୍ଷିତ ଧାମନଗର ବିଧାନସଭା ଆସନ ଲାଗି ନିଯୁକ୍ତ ଟି. ଦୀପିକା କାର୍ତ୍ତିକ ବୈଠକରେ ଯୋଗ ଦେଇଥିଲେ। ସଂରକ୍ଷିତ ସୋର, ସିମୁଳିଆ, ବାସୁଦେବପୁର ଏବଂ ଚାନ୍ଦବାଲି ବିଧାନସଭା କ୍ଷେତ୍ର ପାଇଁ ଜିତେସ୍ କୁମାର ଜୈନଙ୍କୁ ଖର୍ଚ୍ଚ ପର୍ଯ୍ୟବେକ୍ଷକ ଭାବେ ନିଯୁକ୍ତି ଦିଆଯାଇଛି। ଜୈନ୍ ବାଲେଶ୍ୱର ଗସ୍ତରେ ଥିବାରୁ ଏହି ବୈଠକରେ ଅନୁପସ୍ଥିତ ଥିଲେ। ଅବାଧ, ମୁକ୍ତ, ସ୍ବଚ୍ଛ ଏବଂ ନିରପେକ୍ଷ ନିର୍ବାଚନ ପରିଚାଳନା ପାଇଁ ନିର୍ବାଚନ ଆୟୋଗଙ୍କ ଦ୍ୱାରା ଜାରି କରାଯାଇଥିବା ମାର୍ଗଦର୍ଶିକା ଅନୁସାରେ ନିର୍ବାଚନୀ ଖର୍ଚ୍ଚର ସୁପରିଚାଳନା ପାଇଁ ଜିଲାରେ ଗ୍ରହଣ କରାଯାଇଥିବା ବିଭିନ୍ନ ପଦକ୍ଷେପ ସମ୍ବନ୍ଧରେ ସୂଚନା ପ୍ରଦାନ କରାଯାଇଥିଲା। ନିର୍ବାଚନର ନିରପେକ୍ଷତାକୁ ପ୍ରଭାବିତ କରୁଥିବା ଅର୍ଥ ଓ ମାଦକ ଦ୍ରବ୍ୟର ଅବୈଧ କାରବାରର ଧରପଗଡ଼କୁ କଡ଼ାକଡ଼ି କରିବା ସହ ପ୍ରାର୍ଥୀ ଓ ରାଜନୈତିକ ଦଳ ଦ୍ୱାରା ସଭା ସମିତି, ଶୋଭାଯାତ୍ରା, ହୋର୍ଡିଂ, ପୋଷ୍ଟର, ବ୍ୟାନର, ଏମ୍ସିଏମ୍ସି ଆଦି ଜରିଆରେ ବିଜ୍ଞାପନ, ପ୍ରଚାର ପାଇଁ ହେଉଥିବା ବ୍ୟୟ ହିସାବ ପରିଚାଳନା ଉପରେ ପର୍ଯ୍ୟବେକ୍ଷକମାନେ ଗୁରୁତ୍ୱ ଦେଇଥିଲେ।
ନିର୍ବାଚନ ଖର୍ଚ୍ଚ ସମ୍ବନ୍ଧୀୟ କୌଣସି ଆପତ୍ତି ଅଭିଯୋଗ ଆସିଲେ ତୁରନ୍ତ ଖର୍ଚ୍ଚ ପର୍ଯ୍ୟବେକ୍ଷକଙ୍କ ନଜରକୁ ଆଣିବା ପାଇଁ ପରାମର୍ଶ ଦିଆଯାଇଛି। ଖର୍ଚ୍ଚ ପର୍ଯ୍ୟବେକ୍ଷକ ଆର୍ଭି ଅରୁଣ ପ୍ରସାଦଙ୍କୁ ୯୩୩୭୯୬୧୦୨୮, ଦୀପିକା କାର୍ତ୍ତିକଙ୍କୁ ୯୩୩୭୯୬୮୧୪୫ ଏବଂ ଜିତେସ୍ କୁମାର ଜୈନ୍ଙ୍କୁ ୯୩୩୭୯୬୪୫୯୫ ଫୋନ୍ ନମ୍ବରରେ ଜଣାଇବାକୁ ସୂଚନା ପ୍ରଦାନ କରାଯାଇଛି।
ରିଟର୍ନିଂ ଅଧିକାରୀ ଭାବେ ଅତିରିକ୍ତ ଜିଲାପାଳ ଶାନ୍ତନୁ କୁମାର ମହାନ୍ତି, ସମ୍ବିତ କୁମାର ଗଡ଼ନାୟକ, ମୁଖ୍ୟ ଉନ୍ନୟନ ଅଧିକାରୀ ସରୋଜ କୁମାର ଦତ୍ତ, ଉପଜିଲାପାଳ ମନୋଜ ପାତ୍ର, ଅତିରିକ୍ତ ଉପଜିଲାପାଳ ଶ୍ୟାମଳ ରାୟ ପ୍ରମୁଖ ବୈଠକରେ ଯୋଗ ଦେଇଥିଲେ। ଡେପୁଟି କଲେକ୍ଟର(ନିର୍ବାଚନ) ସାଗରିକା ସାହୁଙ୍କ ସଂଯୋଜନାରେ ଆୟୋଜିତ ଏହି ବୈଠକରେ ସହକାରୀ ଖର୍ଚ୍ଚ ପର୍ଯ୍ୟବେକ୍ଷକ, ଆକାଉଣ୍ଟିଂ ଟିମ୍, ଫ୍ଲାଇଁ ସ୍କ୍ବାଡ୍ ଟିମ୍, ଷ୍ଟାଟିଷ୍ଟିକ୍ ସର୍ଭେଲାନ୍ସ ଟିମ୍ ଓ ଭିଡିଓ ସର୍ଭେଲାନ୍ସ ଟିମ୍ର ଅଧିକାରୀମାନେ ଉପସ୍ଥିତ ଥିଲେ।
