ଭୁବନେଶ୍ୱର, ୨୭।୨(ବ୍ୟୁରୋ) – ଆସନ୍ତା ୨୮ତାରିଖରୁ ରାଜ୍ୟରେ ପ୍ରାଥମିକ ସ୍କୁଲ ଖୋଲିବ। ତେବେ ଏହା ପୂର୍ବରୁ ଅଭିଭାବକ-ଶିକ୍ଷକ ବୈଠକ କରିବା ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ଦୀର୍ଘ ଦୁଇବର୍ଷ ହେବ ପିଲାମାନେ ସ୍କୁଲ ଆସି ନ ଥିବାରୁ ସେମାନେ କିଭଳି ସ୍କୁଲ ପ୍ରତି ଆକୃଷ୍ଟ ହେବେ ଓ ଉପସ୍ଥାନ ଶତ ପ୍ରତିଶତ ରହିବ ସେନେଇ ବୈଠକରେ ଆଲୋଚନା କରି ପଦକ୍ଷେପ ନେବାକୁ ପରାମର୍ଶ ଦିଆଯାଇଛି। ଏ ନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ପ୍ରାଥମିକ ବିଦ୍ୟାଳୟ ପ୍ରଧାନଶିକ୍ଷକମାନଙ୍କୁ ଚିଠି ଲେଖି ଜଣାଇ ଦିଆଯାଇଛି। ଅତି କମ୍ରେ ଏକ ଘଣ୍ଟା ସମୟର ଏକ ଅଭିଭାବକ ଶିକ୍ଷକ ବୈଠକ କରିବା ପାଇଁ ଚିଠିରେ ଦର୍ଶାଯାଇଛି। ପିଲାଙ୍କ ସଂଖ୍ୟା ଓ ସ୍ଥାନକୁ ଦୃଷ୍ଟିରେ ରଖି ଶ୍ରେଣୀ ଅନୁଯାୟୀ କୋଭିଡ୍ ଗାଇଡ୍ଲାଇନ୍ ପାଳନ ପୂର୍ବକ ବୈଠକ ଆୟୋଜନ କରିବାକୁ କୁହାଯାଇଛି।
କରୋନା ଯୋଗୁ ଦୀର୍ଘ ଦୁଇବର୍ଷ ହେବ ପ୍ରାଥମିକ ଶ୍ରେଣୀର ପିଲା ସ୍କୁଲ ଯାଇନାହାନ୍ତି। ଦୁଇବର୍ଷ ପରେ ସ୍କୁଲ ଯାଉଥିବାରୁ ପ୍ରଥମ ସପ୍ତାହ ପାଠପଢ଼ା ହେବ ନାହିଁ। ଏହି ସମୟରେ ଏକ୍ସଟ୍ରା କରିକୁଲାର ଆକ୍ଟିଭିଟିଜ୍ କରାଯାଇ ପିଲାଙ୍କୁ ସାମିଲ କରିବାକୁ ଦୁଇଦିନ ତଳେ ବିଭାଗ ପକ୍ଷରୁ ହୋଇଥିବା ଗାଇଡ୍ଲାଇନ୍ରେ ଉଲ୍ଲେଖ କରାଯାଇଥିଲା। ସେହିଭଳି ଅଭିଭାବକ ଶିକ୍ଷକ ବୈଠକ କରିବା ପାଇଁ ମଧ୍ୟ ନିର୍ଦ୍ଦେଶ ରହିଥିଲା।
