କେସିଙ୍ଗା,୧୮ା୩(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ତେଲ୍ ନଦୀପଠାରୁ ଏକ ଶିଶୁପୁତ୍ର ଶନିବାର ଉଦ୍ଧାର ହେଇଛି।
ସୂଚନାନୁଯାୟୀ, କେସିଙ୍ଗା ବ୍ଲକ ତହସିର ଗ୍ରାମର ଜଣେ ଲୋକ ଶୌଚ ପାଇଁ ନଦୀପୀଠକୁ ଯାଇ ଥିବା ବେଳେ ପ୍ରଥମେ ସେ ସେହି ଶିଶୁଟିକୁ ଦେଖିଥିଲେ। ପରେ ସେ ନିଜେ ସେହି ଶିଶୁକୁ ଧରି କେସିଙ୍ଗା ଆଦର୍ଶ ଥାନାକୁ ଆସି ଥାନାରେ ସବୁକଥା କହିଥିଲେ। ପୋଲିସ ସଙ୍ଗେ ସଙ୍ଗେ ଶିଶୁଟିର ସ୍ବାସ୍ଥ୍ୟ ଯାଞ୍ଚ ପାଇଁ କେସିଙ୍ଗା ଗୋଷ୍ଠୀ କେନ୍ଦ୍ରକୁ ନେଇଥିଲା। ହସ୍ପିଟାଲର ଶିଶୁରୋଗ ବିଶେଷଜ୍ଞ ଡାକ୍ତର ଲଲିତ ଅଗ୍ରଓ୍ବାଲ ନିଜର ତତ୍ତ୍ୱାବଧାନରେ ଟିକି ନିଖି ଯାଞ୍ଚ କରି ଶିଶୁଟିର ସାସ୍ଥ୍ୟ ଠିକ୍ ଅଛି ଓ ଶିଶୁଟି ଉତ୍ତମ ସ୍ବାସ୍ଥ୍ୟ ଅଛି ବୋଲି ପ୍ରକାଶ କରିଥିଲେ। ଡାକ୍ତର ଲଳିତ ଅଗ୍ରଓ୍ବାଲଙ୍କୁ ଏ ବିଷୟରେ ପଚାରିବାରୁ ସେ କହିଥିଲେ, ଶିଶୁଟି ୨୪ ଘଣ୍ଟା ଆଗରୁ ଜନ୍ମ ହେଇଛି ଓ ବର୍ତ୍ତମାନ ଶିଶୁଟି ପୁରା ସୁସ୍ଥ ଅଛି। ପରେ ଚାଇଲ୍ଡ କେୟାର୍ର ଏକ ଟିମ୍କୁ ମେଡିକାଲ ପକ୍ଷରୁ ଖବର ଦିଆ ଯାଇଥିଲା। ଉକ୍ତ ଟିମ୍ ମେଡିକାଲରେ ପହଞ୍ଚି କେସିଙ୍ଗା ପୋଲିସ ସହାୟତାରେ ଶିଶୁଟିକୁ ଭବାନୀପାଟଣା ନେଇଯାଇଥିବା ଜଣାପଡ଼ିଛି।
କେହି ଯୁବତୀ ପ୍ରସବ କରି ଏମିତି ଫିଙ୍ଗି ଥାଇପାରନ୍ତି ବୋଲି କେସିଙ୍ଗା ଅଞ୍ଚଳରେ ଆଲୋଚନା ହେଉଛି।
