ଥୁଆମୁଳ ରାମପୁର,୮।୫(ଦୁର୍ଗା କୀର୍ତ୍ତି): ଦେଶ ସ୍ବାଧୀନତାର ୭୭ ବର୍ଷ ପରେ ବି ଯେଉଁଠି ଶିକ୍ଷା, ସୱାସ୍ଥ୍ୟ ଓ ରାସ୍ତା ସାତସପନ ଥିଲା, ସେଠାରେ ଆଜି ବିକାଶର ନୂଆ ସୂର୍ଯ୍ୟୋଦୟ ହୋଇଛି। କଳାହାଣ୍ଡି ଜିଲ୍ଲା ଥୁଆମୁଳ ରାମପୁର ବ୍ଲକ ସିନ୍ଧିପଦର ପଞ୍ଚାୟତର ଅତି ଦୁର୍ଗମ କେନ୍ଦୁଗୁଡ଼ା ଓ କନ୍ଦାଗୁଡ଼ା ଗ୍ରାମର କରୁଣ ଚିତ୍ର ପୂର୍ବରୁ ଗଣମାଧ୍ୟମରେ ପ୍ରକାଶ ପାଇବା ପରେ ପ୍ରଶାସନିକ ସ୍ତରରେ ବଡ଼ ତତ୍ପରତା ପ୍ରକାଶ ପାଇଛି। ପୂର୍ବରୁ ଦେଇଥିବା ପ୍ରତିଶ୍ରୁତି ରକ୍ଷା କରି ଜିଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ (CDO) ଶ୍ରୀ ସୌମ୍ୟ ରଞ୍ଜନ ପ୍ରଧାନ (IAS) ପୁନର୍ବାର ଏହି ଅପହଞ୍ଚ ଇଲାକା ଗସ୍ତ କରି ହିତାଧିକାରୀଙ୍କୁ ‘ଅନ୍ତ୍ୟୋଦୟ’ ଗୃହର କାର୍ଯ୍ୟାଦେଶ ବଣ୍ଟନ କରିଛନ୍ତି।
ସୂଚନାଯୋଗ୍ୟ ଯେ, ବାଘଝୋଲା ପାହାଡ଼ ପରିବେଷ୍ଟିତ ଏହି ଦୁଇ ଗ୍ରାମର ପ୍ରାୟ ୫୦ଟି ପରିବାର ଦୀର୍ଘ ଦଶନ୍ଧି ଧରି ମୌଳିକ ସୁବିଧାରୁ ବଞ୍ଚିତ ଥିଲେ। ରାସ୍ତା ଅଭାବରୁ ସ୍କୁଲ ଓ ଅଙ୍ଗନୱାଡ଼ି ପିଲାଙ୍କ ପାଇଁ ଅପହଞ୍ଚ ଥିବା ବେଳେ ଗ୍ରାମବାସୀମାନେ ଆଦିମ ମଣିଷ ଭଳି ଜୀବନ କାଟୁଥିଲେ। ଏପରିକି ଆବାସ ଯୋଜନାରେ ଘର ଖଣ୍ଡିଏ କରିବା ପାଇଁ ପାହାଡ଼ିଆ ବାଟରେ ସାମଗ୍ରୀ ବୋହିବା ସେମାନଙ୍କ ପାଇଁ ସମ୍ଭବ ହେଉ ନ ଥିଲା। ଏହି ସମସ୍ୟା ସମ୍ପର୍କରେ ଲଗାତାର ଖବର ପ୍ରକାଶ ପାଇବା ପରେ ପ୍ରଶାସନ ପକ୍ଷରୁ ସ୍ବତନ୍ତ୍ର ଦୃଷ୍ଟି ଦିଆଯାଇଥିଲା।
ପୂର୍ବରୁ ସିଡିଓ ଶ୍ରୀ ପ୍ରଧାନ ନିଜେ ପାହାଡ଼ ଚଢ଼ି ଗ୍ରାମରେ ପହଞ୍ଚି ଲୋକଙ୍କ ସୁବିଧା ଅସୁବିଧା ବୁଝିବା ସହ ରାସ୍ତା ଓ ପକ୍କାଘର ଯୋଗାଇ ଦେବାକୁ କଥା ଦେଇଥିଲେ। ସେହି କ୍ରମରେ ବୁଧବାର ସେ କେନ୍ଦୁଗୁଡ଼ା ଗ୍ରାମରେ ପହଞ୍ଚି ୨୦୨୬-୨୭ ଆର୍ଥିକ ବର୍ଷ ପାଇଁ ନୂତନ ଭାବେ ମଞ୍ଜୁର ହୋଇଥିବା ‘ଅନ୍ତ୍ୟୋଦୟ ଗୃହ ଯୋଜନା’ର ହିତାଧିକାରୀମାନଙ୍କୁ କାର୍ଯ୍ୟାଦେଶ ବଣ୍ଟନ କରିବା ସହ ଉପସ୍ଥିତ ସମସ୍ତଙ୍କୁ ଶପଥ ପାଠ କରାଇଥିଲେ। ବର୍ତ୍ତମାନ ସୁଦ୍ଧା ଗ୍ରାମକୁ ସଂଯୋଗ କରୁଥିବା ରାସ୍ତା କାମ ମଧ୍ୟ ଦ୍ରୁତଗତିରେ ଆଗେଇ ଚାଲିଛି।
ଏହି କାର୍ଯ୍ୟକ୍ରମରେ ସିଡିଓଙ୍କ ସମେତ ଜିଲ୍ଲା ପରିଷଦର ପିଏମ ଆର୍ଏଚ (PM RH) ଶ୍ରୀ ଅମୂଲ୍ୟ ବାଉଲ, ବିପିସି ଆର୍ଏଚ (BPC RH) ରାଜେନ୍ଦ୍ର ନାରାୟଣ ଦେବ, ବିଏସଏସଓ (BSSO) ସୁନାରାମ ସୋରେନ, ସିଇଇ (CEE) ହିମାଂଶୁ ନାୟକ ଏବଂ ଜିଆର୍ଏସ (GRS) ବୈକୁଣ୍ଠ ଦିଶାରି ପ୍ରମୁଖ ଉପସ୍ଥିତ ରହି ଲୋକଙ୍କ ସହ ଆଲୋଚନା କରିଥିଲେ। ରାସ୍ତା ଓ ଘର ପରେ ଗ୍ରାମରେ ଶିକ୍ଷା ଓ ପାନୀୟ ଜଳର ସ୍ଥାୟୀ ସମାଧାନ ପାଇଁ ମଧ୍ୟ ଯୋଜନା ପ୍ରସ୍ତୁତ କରାଯାଇଛି।
‘ଆମେ ପାଠ ପଢ଼ିବାକୁ ଚାହୁଁଛୁ’ ବୋଲି ଗୁହାରି କରୁଥିବା କୁନି କୁନି ପିଲାଙ୍କ ମୁହଁରେ ଏବେ ହସ ଫୁଟିଛି। ପ୍ରଶାସନର ଏହି ତତ୍ପରତା ଏବଂ IAS ଅଧିକାରୀଙ୍କ ବାରମ୍ବାର ଗସ୍ତ ଯୋଗୁଁ ଦୀର୍ଘ ବର୍ଷର ଅବହେଳାର ଅନ୍ତ ଘଟିବାକୁ ଯାଉଛି। ପ୍ରଶାସନର ଏହି ଐତିହାସିକ ପଦକ୍ଷେପ ପାଇଁ କେନ୍ଦୁଗୁଡ଼ା ଓ କନ୍ଦାଗୁଡ଼ା ବାସୀ କୃତଜ୍ଞତା ଜଣାଇଛନ୍ତି।
Dharitri – Odisha’s No.1 Odia Daily
