ଗଞ୍ଜାମ,୧୬।୧୨(ଡି.ଏନ୍.ଏ.): ଗଞ୍ଜାମ ଜିଲା ରମ୍ଭା ଥାନା ହୁମା ଫାଣ୍ଡି ଅନ୍ତର୍ଗତ ବୋରିଗାଁରେ ଶୁକ୍ରବାର ଏକ ଅଭାବନୀୟ ଘଟଣା ଘଟିିଛି l ଏଠାରେ ଜଣେ ମା’ ନିଜ ପୁଅଙ୍କୁ ବିଷ ଦେଇ ନିଜେ ବିଷ ପିଇ ଆତ୍ମହତ୍ୟା କରିଥିବା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ତେବେ ଘଟଣାରେ ମା’ଙ୍କ ମୃତ୍ୟୁ ହୋଇଯାଇଥିବl ବେଳେ ପୁଅ ଏବେ ସୁସ୍ଥ ଥିବା ହୁମା ଫାଣ୍ଡି ଅଧିକାରୀ ସୂଚନା ଦେଇଛନ୍ତି । ମୃତ ମହିଳା ଜଣକ ହେଲେ କମି ପଲେଇ (୫୫) ।
ସୂଚନାନୁଯାୟୀ, ମୃତ କମି କୌଣସି କାରଣରୁ ଶୁକ୍ରବାର ସକାଳ ପ୍ରାୟ ସାଢେ ଆଠଟା ସମୟରେ ଚାଉଳରେ ପୋକ ନ ଲାଗିବା ପାଇଁ ଘରେ ଥିବା ଔଷଧକୁ ପ୍ରଥମେ ନିଜ ବଡ଼ ପୁଅ ସନ୍ତୋଷ ପଲେଇ(୩୮)ଙ୍କୁ ପିଇବାକୁ ଦେଇଥିଲେ। ପରେ ନିଜେ ମଧ୍ୟ ଉକ୍ତ ବିଷକୁ ପିଇ ଦେଇଥିଲେ l ସନ୍ତୋଷ ବାରମ୍ବାର ବାନ୍ତି କରିବା ପରେ ଗାଁ ଲୋକେ ଉଭୟଙ୍କୁ ବ୍ରହ୍ମପୁର ମେଡିକାଲ ନେଇଥିଲେ l ସେଠାରେ କମିଙ୍କୁ ଡାକ୍ତର ମୃତ ଘୋଷଣା କରିଥିଲେ ଏବଂ ଚିକିତ୍ସା ପରେ ସନ୍ତୋଷ ସୁସ୍ଥ ଅଛନ୍ତି ।
ତେବେ କମିଙ୍କ ଦୁଇ ପୁଅ ଆଉ ଗୋଟିଏ ମାତ୍ର ଝିଅ । ପିଲାମାନେ ସାନ ସାନ ଥିବା ବେଳେ କମିଙ୍କର ସ୍ବାମୀ କାମ୍ପ ପଲେଇଙ୍କ ମୃତ୍ୟୁ ହୋଇଥିଲl l କମି ବହୁତ କଷ୍ଟରେ ନିଜ ପିଲାଙ୍କୁ ବଡ଼ କରିବା ସହ ଝିଅଙ୍କ ବିବାହ ସେହି ଗ୍ରାମରେ କରିଥିଲେ l ଏଥିସହ ଦୁଇ ପୁଅଙ୍କୁ ମଧ୍ୟ ଗୋଟିଏ ଦିନରେ ବାହାଘର କରିଥିଲେ l କିନ୍ତୁ ବଡ଼ ପୁଅ ଜଡା ଥିବା ଯୋଗୁ ବିବାହର କିଛି ଦିନ ପରେ ତାଙ୍କୁ ତାଙ୍କ ପତ୍ନୀ ଛାଡି ଚାଲିଯାଇଥିଲେ। ସେବେଠାରୁ ଗୋଟିଏ ଘରେ ସାନ ପୁଅ ସୁଶାନ୍ତ ଓ ତାଙ୍କ ସ୍ତ୍ରୀ, କମି ଏବଂ ସନ୍ତୋଷ ମିଶି ରହୁଥିଲେ l ଏବେ ଘଟଣା ଘଟିବା ପରେ ସାନ ପୁଅ ସୁଶାନ୍ତ ବାରମ୍ବାର ଅଚେତ ହୋଇ ପଡୁଥିବା ଦେଖିବାକୁ ମିଳିଛି ।
ଆତ୍ମହତ୍ୟାର ପ୍ରକୃତ କାରଣ ଅସ୍ପଷ୍ଟ ଥିବା ବେଳେ ଗରିବ ଓ ଅସହାୟ ଯୋଗୁ ଏହି ଘଟଣା ଘଟିଥିବା ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି l ଖବର ପାଇ ହୁମା ଫାଣ୍ଡି ଅଧିକାରୀ ଦେବଦତ୍ତ ପ୍ରିୟଦର୍ଶୀ ବ୍ରହ୍ମପୁର ବଡ଼ ମେଡିକାଲ ଯାଇ ଘଟଣାର ତଦନ୍ତ କରିବା ସହ ମାମଲା (ନଂ- ୮/୨୨)ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଥିବା ସେ କହିଛନ୍ତି l
