ପିଲାମାନେ ବଡ଼ ହେଲେ ମା’ବାପାଙ୍କ ଯତ୍ନ ନେବା ସହ ଭଲ ପାଇବା ଓ ଦାୟିତ୍ୱ ତୁଲାଇବେ ବୋଲି ସମସ୍ତେ ଆଶା କରିଥାନ୍ତି। ହେଲେ ଆଜିକାଲି ପିଲାମାନେ ନିଜ ଗୋଡ଼ରେ ଠିଆ ହେବା ପରେ ମା’ବାପାଙ୍କୁ ପଚାରିବା ତ ଦୂରରେ କଥା ସେମାନଙ୍କ ଦାୟିତ୍ୱରୁ ଓହରି ବୃଦ୍ଧାଶ୍ରମରେ ଛାଡ଼ି ଦେଉଛନ୍ତି। ହେଲେ ଏବେ ସୋସିଆଲ ମିଡ଼ିଆରେ ଜଣେ ଯୁବ ବ୍ୟବସାୟୀ ସରଥ କୃଷ୍ଣନଙ୍କ ତାଙ୍କ ମା’ଙ୍କ ସଙ୍ଗେ ଯାତ୍ରା କରୁଥିବାର ଏକ ଫଟୋ ଭାଇରାଲ ହେବାରେ ଲାଗିଛି।
ଦେଶର ଅଧିକାଂଶ ସ୍ଥାନ ସରଥ ମା’ଙ୍କ ସହ ଯାତ୍ରା କରିସାରିଛନ୍ତି। ଅତୀତରେ ସେ ଏଭଳି କରିବା ପଛରେ ଥିବା କାରଣ ବିଷୟରେ ଉଲ୍ଲେଖ କରିଛନ୍ତି। ଦିନେ ସରଥ ମା’ଙ୍କ ହାତ ଧରି ବାରାଣସୀ ଘାଟରେ ବୁଲୁଥିବାର ଏକ ସ୍ପପ୍ନ ଦେଖିଥିଲେ। ହେଲେ ଆଖି ଖୋଲିବା ପରେ ଅନୁଭବ କରିଥିଲେ ଯେ ସେ ବାରାଣସୀରେ ନୁହେଁ ବରଂ ତ୍ରିଶୁରରେ ଅଛନ୍ତି। ଏହାପରେ ସେ ୨ଟି ବିମାନ ଟିକେଟ ବୁକ୍ କରି ମା’ ଗୀତା ରାମଚନ୍ଦ୍ରନଙ୍କୁ ସରପ୍ରାଇଜ୍ ଦେଇଥିଲେ। ମା’ ଯେତେ ମନାକଲେ ବି ସରଥ ନିଜ ଜିଦ୍ରେ ଅଟଳ ରହିଥିଲେ। ୩ଦିନ ପାଇଁ ମା’ପୁଅ ବାରାଣସୀ ପାଇଁ କୋଚି ଅନ୍ତର୍ଜାତୀୟ ବିମାନ ବନ୍ଦରରେ ପହଞ୍ଚିଥିଲେ।
ସେଠାରେ ବୁଲାବୁଲି କରି ଦୁହେଁ ବେଶ୍ ମଜା ଉଠାଇଥିଲେ। ସେହିଦିନଠାରୁ ପ୍ରତ୍ୟେକ ୩ମାସରେ ଥରେ ମା’ ପୁଅ ବିଭିନ୍ନ ସ୍ଥାନକୁ ଯାତ୍ରା କରିବାକୁ ବାହାରିପଡ଼ନ୍ତି। ମା’ଙ୍କ ସହ ବୁଳାବୁଲି କରିବାକୁ ତାଙ୍କୁ ଭଲ ଲାଗେ ବୋଲି ସରଥ କହିଛନ୍ତି। ପ୍ରଥମ ଯାତ୍ରା ତାଙ୍କର ମୁମ୍ବାଇରୁ ନାସିକ, ଶିରଡ଼ି ଓ ଅଜନ୍ତା-ଏଲୋରା ଗୁମ୍ଫା ରହିଥିଲା। ଏହି ଯାତ୍ରା ୧୧ ଦିନର ରହିଥିଲା। ଏପର୍ଯ୍ୟନ୍ତ ପୁଅ ସହ ଗୀତା ଦିଲ୍ଲୀ, ଅମୃତଶର, ଓ୍ବାଘା ବର୍ଡର, ତିବ୍ବତ, ନେପାଳ ଓ ମାଉଣ୍ଟ ଏଭରେଷ୍ଟ ମଧ୍ୟ ଯାଇସାରିଛନ୍ତି ବୋଲି କହିଛନ୍ତି। ସରଥଙ୍କ ଏଭଳି ମହାନ କାର୍ଯ୍ୟକୁ ସବୁ ମହଲରେ ବେଶ୍ ପ୍ରଶଂସା କରାଯାଉଛି।
