ଅସୁସ୍ଥ ବାପାଙ୍କ ଜୀବନ ବଞ୍ଚାଇବା ପାଇଁ ତାଙ୍କର ୧୭ ବର୍ଷୀୟା ଝିଅ ନିଜ ଯକୃତର କିଛି ଅଂଶ ଦାନ କରିଛି। କେରଳର ୪୮ ବର୍ଷୀୟ ପ୍ରଥିଶ ହେପାଟୋସେଲୁଲାର କ୍ୟାନ୍ସର ସହ ଦୀର୍ଘଦିନ ହେଲା ଯକୃତ ରୋଗରେ ପୀଡ଼ିତ ଥିଲେ। ଭାରତରେ ଏହା ପ୍ରଥମ ମାମଲା ବୋଲି କୁହାଯାଉଛି। ଝିଅ ଦେବାନନ୍ଦ ଯକୃତ ଦାନ କରିବା ପରେ ଗତ ୯ ତାରିଖରେ କୋଚିର ରାଜଗିରି ହସ୍ପିଟାଲରେ ବାପାଙ୍କ ଅସ୍ତ୍ରୋପଚାର କରାଯାଇଥିଲା। ଉପଯୁକ୍ତ ଦାତା ନ ମିଳିବାରୁ ନିଜ ଯକୃତ ବାପାଙ୍କୁ ଦାନ କରିବା ନିମନ୍ତେ ଦେବାନନ୍ଦ କେରଳ ହାଇକୋର୍ଟରୁ ଅନୁମତି ଆଣିଥିଲେ। କାରଣ ମାନବ ଅଙ୍ଗ ପ୍ରତିରୋପଣ ଆଇନ, ୧୯୯୪ ଅନୁଯାୟୀ ନାବାଳକ କିମ୍ବା ନାବାଳିକା ଅଙ୍ଗ ଦାନ କରିବାକୁ ଅନୁମତି ନାହିଁ। ଦ୍ୱାଦଶ ଶ୍ରେଣୀରେ ପଢ଼ୁଥିବା ଦେବାନନ୍ଦ ବୟସକୁ ନେଇ ରହିଥିବା ସର୍ତ୍ତକୁ ବାଦ୍ ଦେବା ପାଇଁ ହାଇକୋର୍ଟଙ୍କୁ ଅନୁରୋଧ କରିଥିଲେ। ବିଚାରପତି ଭି.ଜି. ଅରୁଣ ଏଥିପାଇଁ ଅନୁମତି ଦେବା ସହ ଦେବାନନ୍ଦଙ୍କ ଉଦ୍ୟମକୁ ପ୍ରଶଂସା କରିଥିଲେ। ଅଙ୍ଗଦାନରେ ଦେବାନନ୍ଦ ଜଣେ ରୋଲ୍ ମଡେଲ ବୋଲି ହସ୍ପିଟାଲର କାର୍ଯ୍ୟନିର୍ବାହୀ ନିର୍ଦ୍ଦେଶକ ତଥା ସିଇଓ ଫାଦର ଜନ୍ସନ ଭାଝାପିଲ୍ଲୀ କହିଛନ୍ତି। ଲିଭର ଦାନ ଫଳରେ ପ୍ରଥିଶ ସୁସ୍ଥ ହୋଇଛନ୍ତି।
