ଅନ୍ତର୍ଜାତୀୟ ହକି ଫେଡେରେଶନ (ଏଫଆଇଏଚ୍) ଆନୁକୂଲ୍ୟରେ ୧୯୭୧ରେ ଆରମ୍ଭ ହୋଇଥିଲା ହକି ବିଶ୍ୱକପ। ପ୍ରତିଯୋଗିତାର ସର୍ବ ପ୍ରଥମ ସଂସ୍କରଣରେ ପାକିସ୍ତାନ ପିନ୍ଧିଥିଲା ବିଜୟ ମୁକୁଟ। ସ୍ପେନର ବାର୍ସିଲୋନାରେ ଅନୁଷ୍ଠିତ ଏହି ମେଗା ପ୍ରତିଯୋଗିତାର ଫାଇନାଲରେ ସ୍ପେନକୁ ହରାଇ ପାକିସ୍ତାନ ଚାମ୍ପିୟନ ହୋଇଥିଲା। ପ୍ଲେ-ଅଫ୍ରେ କେନିୟାକୁ ହରାଇ ଭାରତ ବ୍ରୋଞ୍ଜ ପଦକ ହାସଲ କରିଥିଲା। ୧୯୭୩ ନେଦରଲାଣ୍ଡର ଆମଷ୍ଟେଲଭିନଠାରେ ଅନୁଷ୍ଠିତ ଦ୍ୱିତୀୟ ସଂସ୍କରଣରେ ଘରୋଇ ନେଦରଲାଣ୍ଡ ଟାଇଟଲ ହାସଲ କରିଥିଲା। ଏଥିରେ ଭାରତ ଚମତ୍କାର ପ୍ରଦର୍ଶନ କରିଥିଲେ ହେଁ ଫାଇନାଲରେ ନେଦରଲାଣ୍ଡଠାରୁ ପେନାଲ୍ଟି ଷ୍ଟ୍ରୋକ୍ ୨-୪ ଗୋଲରେ ହାରି ରୌପ୍ୟ ପଦକରେ ସନ୍ତୁଷ୍ଟ ହୋଇଥିଲା। ପଶ୍ଚିମ ଜର୍ମାନୀ ତୃତୀୟ ଓ ପାକିସ୍ତାନ ୪ର୍ଥ ସ୍ଥାନ ପାଇଥିଲା। ୧୯୭୫ ମାଲେସିଆର କୁଆଲାଲମ୍ପୁରରେ ଅନୁଷ୍ଠିତ ୩ୟ ସଂସ୍କରଣରେ ଭାରତ ହୋଇଥିଲା ବିଶ୍ୱ ବିଜେତା। ଅଜିତ ପାଲ୍ସିଂଙ୍କ ନେତୃତ୍ୱାଧୀନ ଭାରତୀୟ ଦଳ ଫାଇନାଲରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୨-୧ ଗୋଲରେ ହରାଇ ଚାମ୍ପିୟନ ହୋଇଥିଲା। ପଶ୍ଚିମ ଜର୍ମାନୀ ଓ ମାଲେସିଆ ପରିବର୍ତ୍ତୀ ୨ ସ୍ଥାନ ଅଧିକାର କରିଥିଲେ। ୧୯୭୮ରେ ପାକିସ୍ତାନ, ନେଦରଲାଣ୍ଡ, ଅଷ୍ଟ୍ରେଲିଆ, ପଶ୍ଚିମ ଜର୍ମାନୀ, ୧୯୮୨ରେ ପାକିସ୍ତାନ, ପଶ୍ଚିମ ଜର୍ମାନୀ, ଅଷ୍ଟ୍ରେଲିଆ, ନେଦରଲାଣ୍ଡ, ୧୯୮୬ରେ ଅଷ୍ଟ୍ରେଲିଆ, ଇଂଲଣ୍ଡ, ପଶ୍ଚିମ ଜର୍ମାନୀ, ସୋଭିଏଟ୍ ୟୁନିୟନ, ୧୯୯୦ରେ ନେଦରଲାଣ୍ଡ, ଅଷ୍ଟ୍ରେଲିଆ, ପାକିସ୍ତାନ,ପଶ୍ଚିମ ଜର୍ମାନୀ, ୧୯୯୪ରେ ପାକିସ୍ତାନ, ନେଦରଲାଣ୍ଡ, ଅଷ୍ଟ୍ରେଲିଆ, ଜର୍ମାନୀ, ୧୯୯୮ରେ ନେଦରଲାଣ୍ଡ, ସ୍ପେନ, ଜର୍ମାନୀ, ଅଷ୍ଟ୍ରେଲିଆ, ୨୦୦୨ରେ ଜର୍ମାନୀ, ଅଷ୍ଟ୍ରେଲିଆ, ନେଦରଲାଣ୍ଡ, ଦକ୍ଷିଣ କୋରିଆ, ୨୦୦୬ରେ ଜର୍ମାନୀ, ଅଷ୍ଟ୍ରେଲିଆ, ସ୍ପେନ, ଦକ୍ଷିଣ କୋରିଆ, ୨୦୧୦ରେ ଅଷ୍ଟ୍ରେଲିଆ, ଜର୍ମାନୀ, ନେଦରଲାଣ୍ଡ, ଇଂଲଣ୍ଡ ଏବଂ ୨୦୧୪ରେ ଅଷ୍ଟ୍ରେଲିଆ, ନେଦରଲାଣ୍ଡ, ଆର୍ଜେଣ୍ଟିନା ଓ ଇଂଲଣ୍ଡ ପ୍ରଥମ ୪ ସ୍ଥାନ ଅଧିକାର କରିଥିଲେ। ରେକର୍ଡ ଅନୁସାରେ ପାକିସ୍ତାନ ସର୍ବାଧିକ ୪ଥର, ନେଦରଲାଣ୍ଡ ଓ ଅଷ୍ଟ୍ରେଲିଆ ୩ ଥର ଲେଖାଏ, ଜର୍ମାନୀ ୨ ଥର ଓ ଭାରତ ଥରେ ଚାମ୍ପିୟନ ହୋଇଛନ୍ତି।
