ବର୍ଲିନ,୭ା୫: ଜର୍ମାନର ଏକ ଜଙ୍ଗଲରୁ ହାତଗୋଡ଼ ବନ୍ଧା ଥିବା ଜଣେ ବ୍ୟକ୍ତିଙ୍କୁ ଜୀବିତ ଭାବେ ଉଦ୍ଧାର କରିଛି ପୋଲିସ। ଜଣେ ୫୧ ବର୍ଷୀୟ ବ୍ୟକ୍ତିଙ୍କୁ ଜଙ୍ଗଲରେ ବନ୍ଧା ହୋଇଥିବା ପୋଲିସ ଦେଖିବାକୁ ପାଇଥିଲା। ପୋଲିସ ପରେ ତାଙ୍କଠାରୁ ଯାହା ଶୁଣିଲା ଆଶ୍ଚର୍ଯ୍ୟ ହୋଇଗଲା। ଜଣେ ସାଇକେଲ ଚାଳକ ଏବଂ ଶିକାରୀ ସେହି ବାଟରେ ଯାଉଥିବା ବେଳେ ଚିତ୍କାର ଶୁଣିଥିଲେ। ପରେ ଜଙ୍ଗଲ ଭିତରକୁ ଯାଇ ଦେଖନ୍ତି ତ ବ୍ୟକ୍ତି ଜଣକ ଏମିତି ହାତଗୋଡ଼ ବନ୍ଧା ହୋଇପଡ଼ିଛନ୍ତି। ପରେ ପୋଲିସକୁ ଖବର ଦେବାରୁ ପୋଲିସ ଘଟଣାସ୍ଥଳରେ ପହଞ୍ଚି ବ୍ୟକ୍ତି ଜଣଙ୍କୁ ଉଦ୍ଧାର କରିଛି। ବ୍ୟକ୍ତି ଜଣକ ପ୍ୟାଣ୍ଟ ଶର୍ଟ ପିନ୍ଧି ଦଉଡ଼ିରେ ବନ୍ଧା ହୋଇଥିଲେ।
ପୋଲିସ ଏକ ବିବୃତ୍ତିରେ କହିଛି, ଜଣେ ମହିଳା ଏବଂ ଏହି ପୁରୁଷ ଅନ୍ଲାଇନରେ ଭେଟିଥିଲେ। ଦୁହେଁ କଥାବାର୍ତ୍ତା ହେବା ପରେ ସେମାନେ ଜଙ୍ଗଲକୁ ଯାଇଥିଲେ। ଯେଉଁଠାରେ ମହିଳା ଜଣଙ୍କ ପୁରୁଷଙ୍କ ହାତ ବାନ୍ଧିଥିଲେ। ମହିଳା ଜଣକ ଏକ ଖେଳ ଖେଳିବାକୁ ଚାହୁଁଥିଲେ। ଠିକ୍ ଏହି ସମୟରେ ତାଙ୍କର ଏକ ଫୋନ୍ କଲ୍ ଆସିଥିଲା। ଆଉ ସେ ହଠାତ୍ ସେହି ବ୍ୟକ୍ତିଙ୍କୁ ଜଙ୍ଗଲରେ ଛାଡ଼ି ପଳାଇଥିଲେ।
ପୋଲିସ କହିଛି, ଏହି ବ୍ୟକ୍ତି ଜଣକ ଅଧିକାରୀମାନଙ୍କୁ କହିଥିଲେ ଯେ, ଏହିପରି ପରିସ୍ଥିତି ପାଇଁ ସେ ଏକ ବକ୍ସ କଟର ରଖିଥିଲେ, କିନ୍ତୁ ଯେଉଁଠି କଟର ଥିଲା, ସେପର୍ଯ୍ୟନ୍ତ ପହଞ୍ଚି ପାରିଲେନାହିଁ। ସେ ମହିଳାଙ୍କ ବାନ୍ଧିବାର କ୍ଷମତାକୁ ଭୁଲ୍ ଭାବିଥିଲେ।
ଉକ୍ତ ବ୍ୟକ୍ତି ଜଣକ ଆହତ ହୋଇ ମଧ୍ୟ ମହିଳାଙ୍କ ପରିଚୟ ପ୍ରକାଶ କରିବାକୁ ମନା କରିଦେଇଛନ୍ତି। ପୋଲିସ ବିଭିନ୍ନ ଦିଗକୁ ଲକ୍ଷ୍ୟ କରି ସନ୍ଦେହରେ ନିଜ ଆଡୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
