ନୂଆଦିଲ୍ଲୀ,୨୪ା୯(ପି.ଟି.): ସ୍ବଳ୍ପ ପରିମାଣର ମଦ ପିଇବା ସ୍ବାସ୍ଥ୍ୟ ପାଇଁ ଭଲ। ଅନେକ ଏଭଳି ପ୍ରସ୍ତାବ ଦେଇଥାନ୍ତି ବୋଲି ସୁପ୍ରିମକୋର୍ଟ ଖଣ୍ଡପୀଠ ଶୁକ୍ରବାର ଏକ ଜନସ୍ବାର୍ଥ ମାମଲାର ଶୁଣାଣି ବେଳେ କହିଛନ୍ତି। ତମାଖୁ ସେବନ ସ୍ବାସ୍ଥ୍ୟ ପାଇଁ ହାନିକାରକ। ସେଥିପାଇଁ ତମାଖୁ ପ୍ୟାକେଟରେ ଫଟୋଚିତ୍ର ସହ ବୈଧାନିକ ସତର୍କ ସୂଚନାକୁ ବାଧ୍ୟତାମୂଳକ କରାଯାଇଛି। ସେହିଭଳି ମଦ ବୋତଲଗୁଡ଼ିକରେ ବୈଧାନିକ ସତର୍କ ସୂଚନା ରଖିବାକୁ ସରକାରଙ୍କୁ ନିର୍ଦ୍ଦେଶ ଦେବା ନିମନ୍ତେ ସୁପ୍ରିମକୋର୍ଟରେ ଏକ ଜନସ୍ବାର୍ଥ ମାମଲା (ପିଆଇଏଲ୍) ଦାଏର ହୋଇଥିଲା। ତେବେ ଏଥିରେ ହସ୍ତକ୍ଷେପ କରିବାକୁ ସୁପ୍ରିମକୋର୍ଟ ମନା କରିଦେଇଛନ୍ତି। ଏହା ସରକାରଙ୍କ ନୀତିଗତ ନିଷ୍ପତ୍ତି ପରିସରରେ ଆସୁଥିବାରୁ, ଅଦାଲତ ହସ୍ତକ୍ଷେପ କରିପାରିବେ ନାହିଁ ବୋଲି ପ୍ରଧାନ ବିଚାରପତି ଉଦୟ ଉମେଶ ଲଳିତ, ଜଷ୍ଟିସ୍ ଇନ୍ଦିରା ବାନାର୍ଜୀ ଏବଂ ଏସ୍. ରବୀନ୍ଦ୍ର ଭଟ୍ଟଙ୍କ ଖଣ୍ଡପୀଠ ସ୍ପଷ୍ଟ କରିଛନ୍ତି।
ଆଇନଜୀବୀ ଅଶ୍ୱିନୀ ଉପାଧ୍ୟାୟ ଦାଏର କରିଥିବା ପିଆଇଏଲ୍ରେ ଉଲ୍ଲେଖ କରିଥିଲେ, ସିଗାରେଟ୍ ତୁଳନାରେ ମଦ ୧୦ ଗୁଣ ଅଧିକ ହାନିକାରକ। କୋର୍ଟ ନିର୍ଦ୍ଦେଶ ବଳରେ ସିଗାରେଟ୍ ପ୍ୟାକେଟଗୁଡ଼ିକରେ ସତର୍କ ସୂଚନାକୁ ବାଧ୍ୟତାମୂଳକ କରାଯାଇଛି। ମଦ କ୍ଷେତ୍ରରେ ସେଭଳି ନିର୍ଦ୍ଦେଶ ଦେବା ଲାଗି ଆବେଦନକାରୀ ଅଦାଲତଙ୍କୁ ନିବେଦନ କରିଥିଲେ। ଏଥିସହିତ କୌଣସି ମଦକୁ ମାନବ ବ୍ୟବହାର ଲାଗି ଉପଯୁକ୍ତ ଘୋଷଣା କରିବା ପୂର୍ବରୁ ସ୍ବାସ୍ଥ୍ୟ ପ୍ରଭାବ ଆକଳନ (ଏଚ୍ଆଇଏ)କୁ ବାଧ୍ୟତାମୂଳକ କରିବା ଲାଗି ମଧ୍ୟ ଉପାଧ୍ୟାୟ ତାଙ୍କ ପିଟିଶନରେ ପ୍ରାର୍ଥନା କରିଥିଲେ।
