ନୂଆଦିଲ୍ଲୀ,୨୪ା୯: କାନାଡ଼ାରେ ଘୃଣିତ ଅପରାଧ, ସାମ୍ପ୍ରଦାୟିକ ହିଂସା ଏବଂ ଭାରତ ବିରୋଧୀ କାର୍ଯ୍ୟକଳାପ ଦ୍ରୁତ ବୃଦ୍ଧି ପାଉଛି। ଏହାକୁ ଦୃଷ୍ଟିରେ ରଖି ସେଠାରେ ଥିବା ଭାରତୀୟ ଏବଂ ପାଠ ପଢ଼ିବାକୁ ଯାଇଥିବା ଛାତ୍ରୀଛାତ୍ର ସତର୍କ ରହିବା ଲାଗି ନୂଆଦିଲ୍ଲୀ ପକ୍ଷରୁ ଶୁକ୍ରବାର ପରାମର୍ଶ ଦିଆଯାଇଛି। ଉପରୋକ୍ତ ଅପରାଧ ସମ୍ପର୍କରେ ଭାରତ କାନାଡ଼ା ସରକାରଙ୍କ ଦୃଷ୍ଟି ଆକର୍ଷଣ କରିବା ସହ ଏହାର ଉପଯୁକ୍ତ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅନୁରୋଧ କରାଯାଇଛି। ହିଂସା ପଛରେ ଥିବା ଅପରାଧୀମାନଙ୍କୁ ଏପର୍ଯ୍ୟନ୍ତ ଆଇନର କାଠଗଡ଼ା ମଧ୍ୟକୁ ଅଣାଯାଇ ନ ଥିବା ଭାରତର ବହିର୍ବ୍ୟାପାର ମନ୍ତ୍ରଣାଳୟ କହିଛି।
ଶିଖ୍ମାନଙ୍କ ଲାଗି ସ୍ବତନ୍ତ୍ର ରାଜ୍ୟ ଦାବି କରୁଥିବା ଖଲିସ୍ତାନୀ ସପକ୍ଷବାଦୀମାନଙ୍କର ତଥାକଥିତ ଗଣଭୋଟକୁ ନେଇ କୂଟନୈତିକ ବିବାଦ ଲାଗିରହିଥିବାବେଳେ ଭାରତ ଏଭଳି ଆଡଭାଇଜରି ଜାରି କରିଛି। ଉକ୍ତ ଗଣଭୋଟ ଉଗ୍ରପନ୍ଥୀ ଓ କଠୋରପନ୍ଥୀ ତତ୍ତ୍ୱମାନଙ୍କର ଏକ ଫାର୍ସ ବୋଲି ଗୁରୁବାର ଭାରତର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରିନ୍ଦମ ବାଗ୍ଚୀ କହିଥିଲେ। ଏକ ବନ୍ଧୁ ରାଷ୍ଟ୍ରରେ ଏଭଳି ଗଣଭୋଟକୁ ଅନୁମତି ଦିଆଯିବା ଅତ୍ୟନ୍ତ ଆପତ୍ତିଜନକ ବୋଲି ସେ ମତ ଦେଇଥିଲେ। କାନାଡ଼ାରେ ଏବେ ୧୬ ଲକ୍ଷ ଭାରତୀୟ ବଂଶୋଦ୍ଭବ ଏବଂ ପ୍ରବାସୀ ଭାରତୀୟ ରହିଛନ୍ତି। ଚଳିତ ବର୍ଷ ସେଠାରେ ଥିବା ଦୁଇଟି ହିନ୍ଦୁ ମନ୍ଦିର ଉପରେ ଆକ୍ରମଣ ହୋଇଥିଲା। ଗତ ୧୫ ତାରିଖରେ ଭାରତ ବିରୋଧୀ ବ୍ୟକ୍ତିମାନେ ଏକ ମନ୍ଦିରକୁ ବିକୃତ କରିଦେଇଥିଲେ।
