ପ୍ରେମକୁ ଆଧାର କରି ଏକ ଭିନ୍ନ ଧରଣର ଓଡ଼ିଆ ସିନେମା ନିର୍ମିତ ହେବାକୁ ଯାଉଛି, ଯାହାର ଟାଇଟଲ ରହିଛି ‘ପ୍ରେମ ସାଥୀ-ଦ ଟ୍ରୁ ଲଭ୍ମେଟ୍’। ନବାଗତ ପ୍ରଯୋଜକ ସତ୍ୟବ୍ରତ ଜେନା ଏବଂ ଜଗନ୍ନାଥ ପାଣିଙ୍କ ପ୍ରଯୋଜନାରେ ଏହାର ପ୍ରାରମ୍ଭିକ କାମ ଶେଷ ହୋଇଛି ଏବଂ ମହୁରତ ସହ ଶୁଟିଂ ଖୁବ୍ ଶୀଘ୍ର ଆରମ୍ଭ ହେବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ସୂଚନା ଦିଆଯାଇଛି। ଏନ୍.ଆର. ଫିଲ୍ମ ବ୍ୟାନରରେ ଏହି ଚିତ୍ରରୁ ଜଣେ ନବାଗତା ଓଡ଼ିଆ ସିନେମାରେ ନିଜର କ୍ୟାରିୟର ଆରମ୍ଭ କରିବାକୁ ଯାଉଛନ୍ତି। ସେ ହେଲେ ଅନୁଷ୍କା ପ୍ରିୟଦର୍ଶିନୀ। ସଞ୍ଜୟ ଭଟ୍ଟଙ୍କ କାହାଣୀକୁ ଆଧାର କରି ସଂଳାପ ରଚନା କରିଛନ୍ତି ଓଲିଉଡ୍ର ଆଗଧାଡ଼ିର ତଥା ବରିଷ୍ଠ ସଂଳାପକାର ଡ. ରଜନୀ ରଞ୍ଜନ। ଏହାର ନିର୍ଦ୍ଦେଶନା ଭାର ସମ୍ଭାଳୁଛନ୍ତି ପୂର୍ବରୁ ‘ରସିକ ନାଗର’, ‘କ୍ରିମିନାଲ୍’, ‘ହିରୋ’, ‘ଦିଲ୍ କା ରାଜା’, ‘ମେଣ୍ଟାଲ’, ‘ତୁ ମୋ ହିରୋ’ ଆଦି ହିଟ୍ ସିନେମାର ନିର୍ଦ୍ଦେଶନ ଏସ୍. ଦିଲୀପ ପଣ୍ଡା। ବଡ଼ ପରଦାରେ ନାୟିକା ଭାବରେ ଏଣ୍ଟ୍ରି କରିବା ପୂର୍ବରୁ ଅନୁଷ୍କା ଦୁଇଟି ଶର୍ଟ ଫିଲ୍ମ ‘ସମ୍ଭାବନା’ ଏବଂ ‘ଦ ସସ୍ପେନ୍ସ ଇନ୍ ଲକ୍ଡାଉନ୍’ ନିର୍ମାଣ କରିବା ସହ ନିର୍ଦ୍ଦେଶନା ମଧ୍ୟ ଦେଇଛନ୍ତି। ତେବେ ନିଜର ପ୍ରଥମ ସିନେମାର ଭୂମିକାକୁ ନେଇ ବେଶ୍ ଆଶାବାଦୀ ଅଛନ୍ତି ଅନୁଷ୍କା। ଏହି ଫିଲ୍ମରେ ସଂଯୋଜିତ ତଥା ବସନ୍ତରାଜ ସାମଲ, ସୁବ୍ରତ ସ୍ବାଇଁ ଏବଂ ଡ. ସୁରଭି ଭଟ୍ଟଙ୍କ ରଚିତ ଗୀତଗୁଡ଼ିକୁ ସ୍ବର ଦେଉଛନ୍ତି ଆଗଧାଡ଼ିର ସ୍ବର ସଂଯୋଜକ ପ୍ରେମ ଆନନ୍ଦ। ଉକ୍ତ ଚିତ୍ରର ଅବଶିଷ୍ଟ କାଷ୍ଟିଂ ଚାଲୁ ରହିଛି ଏବଂ ଖୁବ୍ ଶୀଘ୍ର ଏହା ଫାଇନାଲ ହେବ ବୋଲି କହନ୍ତି ନିର୍ଦ୍ଦେଶକ ଦିଲୀପ।
