ରାବାଟ,୨୨ା୧୨(ପି.ଟି): କାତାର ଫିଫା ବିଶ୍ୱକପ୍-୨୦୨୨ରେ ୪ର୍ଥ ସ୍ଥାନ ହାସଲ ସହ ଇତିହାସ ସୃଷ୍ଟି କରି ଫେରିଥିବା ମରକ୍କୋ ଦଳକୁ ମିଳିଛି ଭବ୍ୟ ସ୍ବାଗତ। ବିଶ୍ୱକପ୍ର ହିରୋମାନେ ରାଜଧାନୀ ରାବାଟରେ ବିମାନରୁ ଅବତରଣ କରିବା ପରେ ଫ୍ୟାନମାନଙ୍କ ମଧ୍ୟରେ ଦେଖିବାକୁ ମିଳିଥିଲା ଅଫୁରନ୍ତ ଉଦ୍ଦୀପନା। ବିଭିନ୍ନ ସଡକ ଓ ଗଳିରେ ଜାତୀୟ ପତାକା ଓ ପାରମ୍ପରିକ ବାଦ୍ୟ ସହିତ ଫ୍ୟାନମାନେ ଜାତୀୟ ଦଳର ଖେଳାଳିଙ୍କୁ ସ୍ବାଗତ କରିଥିଲେ। ଏକ ଖୋଲାଛାତର ବସ୍ରେ ଖେଳାଳିମାନେ କଡା ସୁରକ୍ଷା ମଧ୍ୟରେ ରାବାଟ ସହର ପରିକ୍ରମା କରିଥିଲେ। ସମସ୍ତ ଖେଳାଳି ଓ କୋଚ୍ ଓ୍ବାଲିଦ୍ ରେଗରାଗୁଇ ଫ୍ୟାନ୍ମାନଙ୍କୁ ହାତ ହଲାଇବା ସହିତ ଫ୍ଲାଇଂ କିସ୍ ଦେଇଥିଲେ। ୪ ଲେନ୍ ବିଶିଷ୍ଟ ରାସ୍ତାକୁ ଖାଲି କରାଯାଇ ବସ୍ ଅତ୍ୟନ୍ତ ଧିମା ଗତିରେ ଯାତ୍ରା କରିଥିଲା। ରାସ୍ତାର ଉଭୟ ପାର୍ଶ୍ୱରେ ଜନସମୁଦ୍ର ରହିଥିବା ବେଳେ ଖେଳାଳିଙ୍କ ବସ୍ ରାଜା ମହମ୍ମଦ-୬ଙ୍କୁ ଭେଟିବାକୁ ରାଜପ୍ରାସାଦରେ ପହଞ୍ଚିଥିଲେ। ରାଜପ୍ରାସାଦରେ ପହଞ୍ଚିବା ପରେ ରାଜାଙ୍କ ସହିତ ଏହି ଐତିହାସିକ ସଫଳତାକୁ ସେଲିବ୍ରେଟ୍ କରିଥିଲେ ଖେଳାଳି। ପ୍ରଥମ ଆଫ୍ରିକୀୟ ତଥା ଆରବ ଦେଶ ଭାବରେ ମରକ୍କୋ ସେମିଫାଇନାଲ ଖେଳିବାକୁ ଯୋଗ୍ୟତା ହାସଲ କରିଥିଲା।
ପୂର୍ବରୁ ଦେଶ ଉପରେ କରିଥିବା ୟୁରୋପୀୟ ଉପନିବେଶବାଦ ଶକ୍ତି ବେଲଜିୟମ, ସ୍ପେନ ଓ ପର୍ତ୍ତୁଗାଲକୁ ଦଳ ପରାସ୍ତ କରିଥିଲା। ଏହି ସଫଳତା ପରେ ମରକ୍କୋ ଜାତୀୟ ଦଳକୁ ଦେଶରେ ହିରୋର ସମ୍ମାନ ପ୍ରଦାନ କରାଯାଇଥିଲା। ମରକ୍କୋର ଏହି ସଫଳତା ସର୍ବଦା ଇତିହାସରେ ସ୍ବର୍ଣ୍ଣିମ ଅକ୍ଷରରେ ଲିପିବଦ୍ଧ ହୋଇ ରହିବ। ମରକ୍କୋବାସୀ ଫୁଟବଲକୁ ଭଲ ପାଉଥିବା ବେଳେ ଏହି ସଫଳତା ଆମକୁ ମନ୍ତ୍ରମୁଗ୍ଧ କରିଛି ବୋଲି ରେଦା ଘାଜି ନାମକ ଜଣେ ଫ୍ୟାନ୍ ପ୍ରକାଶ କରିଛନ୍ତି। ଦଳ ବର୍ତ୍ତମାନ ଏହାର ସ୍ତର ଏତେ ଉଚ୍ଚ ରଖିଛି ଯେ ଆମକୁ ଆଫ୍ରିକାନ୍ କପ୍ ଅଫ୍ ନେସନ୍ସ ନିହାତି ବିଜୟୀ ହେବାକୁ ପଡିବ ବୋଲି କହିଛନ୍ତି ଆଉ ଜଣେ ଫ୍ୟାନ। ମରକ୍କୋ ଦଳ ଏହି ବିଜୟ ପରେ ପାଲେଷ୍ଟାଇନ୍ ପତାକା ଧରି ସେଲିବ୍ରେସନ କରିବା ସହିତ ଏକ ବାର୍ତ୍ତା ଦେବାକୁ ପ୍ରୟାସ କରିଥିଲା ବୋଲି ରାବାଟ ବାସିନ୍ଦା ଓମାର ଜୋର୍ଗେନ୍ ପ୍ରକାଶ କରିଛନ୍ତି। ଆଫ୍ରିକୀୟ ରାଷ୍ଟ୍ର ଭାବରେ ଆମେ ଅନେକ ରେକର୍ଡ ଭାଙ୍ଗିଛୁ। ତେବେ ଆମକୁ ଆହୁରି ଅନେକ ପଥ ଅତିକ୍ରମ କରିବାକୁ ଅଛି। ଉଲ୍ଲେଖଯୋଗ୍ୟ ଯେ ୨୦୧୦ରେ ଘାନା ଏକମାତ୍ର ଆଫ୍ରିକୀୟ ରାଷ୍ଟ୍ର ଭାବରେ କ୍ୱାର୍ଟର ଯାଏ ପହଞ୍ଚିଥିଲା। ବିଶ୍ୱର ଏହି ସର୍ବବୃହତ୍ ଫୁଟବଲ ଟୁର୍ନାମେଣ୍ଟରେ ଆମର ପ୍ରଦର୍ଶନ ଆମ ପାଇଁ ଏକ ନୂତନ ସମ୍ଭାବନା ସୃଷ୍ଟି କରିଛି। ଆଗାମୀ ଦିନରେ ବିଶ୍ୱ ଫୁଟବଲ ବକ୍ଷରେ ଆମକୁ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିବାକୁ ହେବ ବୋଲି ଜଣେ ଫ୍ୟାନ୍ ପ୍ରକାଶ କରିଛନ୍ତି।
