ବୟସ ମାତ୍ର ୩ ବର୍ଷ। ଯେଉଁ ବୟସରେ ସେ ନିଜ କୁନି କୁନି ହାତରେ ଖେଳଣା କାର୍ ଚଳାଇବା କଥା, ସେଇ ବୟସରେ ସେ ଚଳାଉଛି ସୁପର୍ କାର୍ । ଜ୍ୟେନ୍ ସୋଫୁଓଗ୍ଲୁ ନାମକ ଏହି ବାଳକଟି ଏକ ବିସ୍ମୟଠୁ କମ୍ ନୁହେଁ। କାର୍ ସିଟ୍ରେ ବସି ଷ୍ଟିୟରିଂ ହୁଇଲ୍ ଧରିଲେ ଓ୍ିଣ୍ଡସିଲ୍ଡ ଦେଇ ବାହାରକୁ ଦେଖିପାରେନା ଜ୍ୟେନ୍। ଗୋଡ କ୍ଲଚ୍, ବ୍ରେକ ପାଖକୁ ବି ପହଞ୍ଚେନା। ତଥାପି ବାପାଙ୍କ ସୁପର୍ କାର୍ ଫରାରୀ ଏସ୍ଏଫ୍ ୯୦କୁ ପେସାଦାର କାର୍ ଚାଳକ ଭାବେ ବେଶ୍ ଆରାମରେ ଗ୍ୟାରେଜ୍ରୁ ବାହାର କରିପାରେ। ଏହି କାମକୁ ଜ୍ୟେନ୍ କାର୍ରେ ଲାଗିଥିବା ଗୋପ୍ରୋ କ୍ୟାମେରା, ଯାହାକି କାର୍ ଭିତରେ ଥିବା ଟାବଲେଟ୍ ସହ ଲିଙ୍କ୍ ଥାଏ ତା’ ସାହାଯ୍ୟରେ କରିପାରୁଛି। ସୁପର୍ କାର୍ ଚଳାଇବାକୁ ଯେଉଁଠି ବୟସ୍କ ଗାଡି ଚାଳକ ଡରି ଯାଆନ୍ତି, ସେଠି କୁନି ଜ୍ୟେନ୍ ବେଶ ସହଜରେ କରି ଦେଇପାରୁଛି। ତେବେ ଏହି କାମକୁ ସହଜରେ କରିପାରିବା ପଛରେ ତାଙ୍କ ବାପା କେନାନ ସୋଫୁଓଗ୍ଲୁଙ୍କ ହାତ ଅଛି। କେନାନ ହେଉଛନ୍ତି ତୁର୍କର ମୋଟର ସାଇକେଲ ଓ ସୁପର୍ କାର୍ ରେସର୍। ତାଙ୍କ ନାମରେ ପାଞ୍ଚୋଟି ସୁପରସ୍ପୋର୍ଟସ୍ ଓ୍ବାର୍ଲଡ ଚାମ୍ପିୟନ ଟାଇଟଲ୍ ଥିବାର ରେକର୍ଡ ଅଛି। ତାଙ୍କର ପୁଅଭାବେ ଜ୍ୟେନ୍ ଛୋଟବେଳୁ ସ୍ପୋର୍ଟସ୍ କାର୍ ଦେଖିଛି। ଆଉ ଜ୍ୟେନ୍ଙ୍କୁ ତାଙ୍କ ବାପା କେନାନ ବାଇକ୍ ସହ ସ୍ପୋର୍ଟସ୍ କାର୍ ଚଳାଇବା ବି ଶିଖାଇଛନ୍ତି। ତେବେ ଏତେ ଛୋଟ ପିଲାକୁ ସ୍ପୋର୍ଟସ୍ କାର୍ ଓ ବାଇକ ଚଳାଇବାକୁ ଦେଉଥିବାରୁ ଅନେକେ ତାଙ୍କୁ ନିନ୍ଦା କରନ୍ତି। ହେଲେ କେନାନ କୁହନ୍ତି, ‘ମୋ ପୁଅ ଗାଡି ଚଳାଇବାବେଳେ ମୁଁ ସବୁବେଳେ ପାଖରେ ଥାଏ, ସବୁ ସତର୍କତା ଅବଲମ୍ବନ କରେ। ଯେମିତିକି ତା’ର କିଛି କ୍ଷତି ହେବନି।’
