ଭୁବନେଶ୍ୱର,୧୭।୮(ବ୍ୟୁରୋ): ରାସ୍ତାରୁ ୧୫ ବର୍ଷରୁ ଊଦ୍ଧର୍ବ ପୁରୁଣା ଗାଡ଼ି ହଟିବ। ଏ ନେଇ ପରିବହନ ମନ୍ତ୍ରୀ ପଦ୍ମନାଭ ବେହେରା ସୂଚନା ଦେଇଛନ୍ତି । ମନ୍ତ୍ରୀ କହିଛନ୍ତି, ଓଡ଼ିଶାରେ ପୁରୁଣା ଗାଡ଼ି ଚିହ୍ନଟ କାର୍ଯ୍ୟ ସରିଛି। ପରିବହନ ବିଭାଗ ଏଥିପାଇଁ ପ୍ରକ୍ରିୟା ଆରମ୍ଭ କରିସାରିଛି। ରାଜ୍ୟରେ ଏବେ ଲକ୍ଷାଧିକ ୧୫ ବର୍ଷରୁ ଊର୍ଦ୍ଧ୍ୱ ପୁରୁଣା ଗାଡ଼ି ଅଛି। କେନ୍ଦ୍ର ସରକାରଙ୍କ ନୂଆ ନିୟମ(ସ୍କ୍ରାପ୍ ପଲିସି) ଓଡ଼ିଶାରେ କାର୍ଯ୍ୟକାରୀ କରାଯିବ ବୋଲି ପରିବହନ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି।
ଏଥିସହିତ ପରିବହନ ଦୁର୍ଘଟଣାସ୍ଥଳ ତଥ୍ୟ ସଂଗ୍ରହ କରିବା ପାଇଁ ମନ୍ତ୍ରୀ ରବିବାର ଇଣ୍ଟିଗ୍ରେଟେଡ୍ ରୋଡ୍ ଆକ୍ସିଡେଣ୍ଟ ଡାଟାବେସ(ଆଇଆର୍ଏଡି)ଆପ୍ଲିକେଶନର ଶୁଭାରମ୍ଭ କରିଛନ୍ତି। ଏହି ନୂତନ ଆପ୍ କେନ୍ଦ୍ର ସଡ଼କ ପରିବହନ ଓ ଜାତୀୟ ରାଜପଥ ମନ୍ତ୍ରଣାଳୟ ଦ୍ୱାରା ଆରମ୍ଭ କରାଯାଇଥିବା ସଡ଼କ ଦୁର୍ଘଟଣା କାର୍ଯ୍ୟକ୍ରମର ଏକ ଅଂଶ ବିଶେଷ। ଏହି ଆପ୍ ଦ୍ୱାରା ସଡ଼କ ଦୁର୍ଘଟଣାର କାରଣଗୁଡ଼ିକୁ ବିଶ୍ଳେଷଣ କରାଯାଇ ପାରିବ। ଏହା ଦୁର୍ଘଟଣାଜନିତ ମୃତ୍ୟୁ ହାରକୁ ରୋକିବାରେ ବିଶେଷ ସହାୟକ ହେବ। ଏହି ଅବସରରେ ମନ୍ତ୍ରୀ କହିଛନ୍ତି ଯେ ଜାତୀୟ ସ୍ତରର ସଡ଼କ ଦୁର୍ଘଟଣା ଡାଟାବେସ୍ ପ୍ରସ୍ତୁତ କରାଯିବ । ଏହି ଆପ୍ ସଡ଼କ ଦୁର୍ଘଟଣାର ସମସ୍ତ ତଥ୍ୟ ଠିକ୍ ଭାବେ ପ୍ରଦାନ କରିବାରେ ସହାୟତା କରିବ। ଏହି ତଥ୍ୟ ଆଧାରରେ ଓଡ଼ିଶାରେ ରାସ୍ତା ଦୁର୍ଘଟଣା ହ୍ରାସ କରିବାରେ ସହାୟକ ହୋଇପାରିବ। ଏ ନେଇ ନୂତନ ନୀତି ଓ ଯୋଜନା ପ୍ରସ୍ତୁତ କରାଯାଇ ପାରିବ। ବାଣିଜ୍ୟ ଓ ପରିବହନ ସଚିବ ମଧୁସୂଦନ ପାଢ଼ୀ କହିଛନ୍ତି ଯେ ଏହି ଆପ୍ ଦ୍ୱାରା ସଂଗୃହୀତ ତଥ୍ୟକୁ ଆଧାର କରି ସରକାର ଡ୍ରାଇଭିଂ ରୁଲ୍, ରାସ୍ତାର ଅବସ୍ଥା, ଜିଲା ଓ ଜାତୀୟ ରାଜପଥ ରାସ୍ତାଗୁଡ଼ିକରେ ସୁରକ୍ଷା ପଦକ୍ଷେପ ନିଆଯାଇ ପାରିବ। ଏହିି ଆପ୍ ଦ୍ୱାରା ପୋଲିସ, ପରିବହନ ବିଭାଗ, ପୂର୍ତ୍ତ ଏବଂ ଜାତୀୟ ରାଜପଥ ପ୍ରାଧିକରଣ (ଏନ୍ଏଚ୍ଏଆଇ) ନିଜର ମୋବାଇଲ ମାଧ୍ୟମରେ ସ୍ପଟ୍ରୁ ଦୁର୍ଘଟଣାର ତଥ୍ୟ ସଂଗ୍ରହ କରିପାରିବେ।
