ନୂଆଦିଲ୍ଲୀ,୧୪।୩ : ଦେଶର ଭୟାବହ ଭୋପାଳ ଗ୍ୟାସ ଦୁର୍ଘଟଣାକୁ ନେଇ ଏକ ବଡ ଖବର ଆସିଛି। ପୀଡିତାଙ୍କୁ ୟୁନିଅନ କାର୍ବାଇଡ କମ୍ପାନୀରୁ ୭୪୦୦ କୋଟି ଟଙ୍କା ଅତିରିକ୍ତ କ୍ଷତିପୂରଣ ଦାବି ପାଇଁ କେନ୍ଦ୍ର ସରକାରଙ୍କ ପକ୍ଷରୁ କରାଯାଇଥିବା ଆବେଦନକୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି। ଏହା ସହିତ ସୁପ୍ରିମକୋର୍ଟ ଏହି ଦୁର୍ଘଟଣାର ଶିକାର ହୋଇଥିବା ଲୋକଙ୍କୁ କ୍ଷତିପୂରଣ ଦେବାରେ ଅବହେଳା ପାଇଁ କେନ୍ଦ୍ରକୁ ତାଗିଦ କରିଛନ୍ତି। ସୁପ୍ରିମକୋର୍ଟ କହିଛନ୍ତି ଯେ ବିଚାରାଧୀନ ମାମଲା ସମାପ୍ତ କରିବା ପାଇଁ ଭାରତ ସରକାର ଆରବିଆଇ ପାଖରେ ରଖାଯାଇଥିବା ୫୦ କୋଟି ଟଙ୍କା ବ୍ୟବହାର କରିବେ।
୨ ଡିସେମ୍ବର ୧୯୮୪ ର ରାତିରେ ମଧ୍ୟପ୍ରଦେଶର ରାଜଧାନୀ ଭୋପାଳରେ ଗ୍ୟାସ ଦୁର୍ଘଟଣା ଦେଶବାସୀଙ୍କ ମନରୁ ଲିଭି ନାହିଁ। ଭୋପାଳର ୟୁନିଅନ କାର୍ବାଇଡ କାରଖାନାରୁ ବାହାରୁଥିବା ବିଷାକ୍ତ ଗ୍ୟାସ ଯୋଗୁ ରାତିରେ ହଜାର ହଜାର ଲୋକଙ୍କର ମୃତ୍ୟୁ ଘଟିଥିଲା।
ଏହି ଦୁର୍ଘଟଣା ଯୋଗୁଁ କେବଳ ଭୋପାଳରେ ନୁହେଁ, ସମଗ୍ର ଦେଶରେ ଉତ୍ତେଜନା ଦେଖାଦେଇଥିଲା। ଏହି ଦୁର୍ଘଟଣାରେ ମୃତ୍ୟୁସଂଖ୍ୟା ୧୬ ହଜାରରୁ ଅଧିକ ବୋଲି କୁହାଯାଉଛି। ଏହା ସହିତ ପ୍ରାୟ ପାଞ୍ଚ ଲକ୍ଷ ଲୋକଙ୍କ ଠାରେ ଗୁରୁତର ଶ୍ୱାସକ୍ରିୟା ସମସ୍ୟା ସୃଷ୍ଟି କରିଥିଲା, ଯାହାର ପରିଣାମ ସେମାନେ ଏବେ ମଧ୍ୟ ଭୋଗୁଛନ୍ତି। କେବଳ ଏତିକି ନୁହେଁ, ପରବର୍ତ୍ତୀ ପିଢ଼ି ପର୍ଯ୍ୟନ୍ତ ଲୋକଙ୍କୁ ଏହି ଦୁର୍ଘଟଣାର ଶିକାର ହେବାକୁ ପଡିଛି। ପରବର୍ତ୍ତୀ ପିଢ଼ିରେ ଜନ୍ମ ହୋଇଥିବା ଅନେକ ପିଲାଙ୍କଠାରେ ଜନ୍ମରୁ ବିଭିନ୍ନ ଶାରୀରିକ ସମସ୍ୟା ରହିଥିବା ଜଣାପଡିଛି।
ଭୋପାଳ ଗ୍ୟାସ ଦୁର୍ଘଟଣାରେ ୟୁନିଅନ କାର୍ବାଇଡ କମ୍ପାନୀ ୪୭୦ ମିଲିୟନ ଆମେରିକୀୟ ଡଲାରର କ୍ଷତିପୂରଣ ପ୍ରଦାନ କରିଛି। ପୀଡ଼ିତମାନେ ଅତିରିକ୍ତ କ୍ଷତିପୂରଣ ପାଇଁ ସୁପ୍ରିମକୋର୍ଟରେ ଏକ ପିଟିଶନ ଦାଖଲ କରିଥିଲେ।
