ନୂଆଦିଲ୍ଲୀ/ନ୍ୟୁୟର୍କ,୧୬।୧୨: ଆମେ ଆଉ ଏକ ୯/୧୧ କିମ୍ବା ୨୬/୧୧ ହେବାକୁ ଦେବୁ ନାହିଁ ବୋଲି ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ମିଳିତ ଜାତିସଂଘ ସୁରକ୍ଷା ପରିଷଦ ବୈଠକରେ କହିଛନ୍ତି। ଏହି ବୈଠକରେ ଆତଙ୍କବାଦ ବିରୋଧରେ ବିଶ୍ୱ ଆଭିମୁଖ୍ୟ ଉପରେ ନିଜ ମତ ରଖି ଜୟଶଙ୍କର ୯/୧୧ ଏବଂ ୨୮/୧୧ ଆତଙ୍କବାଦୀ ଆକ୍ରମଣ ବିଷୟରେ ଉଲ୍ଲେଖ କରିଛନ୍ତି। ଏଥି ସହିତ ସେ ଚାଇନା ଏବଂ ପାକିସ୍ତାନକୁ ନାଁ ନ ନେଇ ଟାର୍ଗେଟ୍ କରିଥିଲେ।
ଜୟଶଙ୍କର କହିଛନ୍ତି, ଆମେ ଆଉ ଏକ ‘ନ୍ୟୁୟର୍କର ୯/୧୧’ କିମ୍ବା ‘ମୁମ୍ବାଇର ୨୬/୧୧’ ପୁନର୍ବାର ଘଟିବାକୁ ଦେଇପାରିବୁ ନାହିଁ। ଆତଙ୍କବାଦରୁ କୌଣସି ଦେଶ ରାଜନୈତିକ ଫାଇଦା ନେବାକୁ ଚେଷ୍ଟା କରିବା ଉଚିତ ନୁହେଁ। ଯେତେବେଳେ ଆତଙ୍କବାଦ ମୁକାବିଲା ପାଇଁ ଆସେ, ସେତେବେଳେ ଆମେ ଆମର ରାଜନୈତିକ ମତଭେଦକୁ ଦୂର କରି ଏକ ଶୂନ୍ୟ-ସହନଶୀଳତା ଆଭିମୁଖ୍ୟ ପ୍ରକାଶ କରିବା ଆବଶ୍ୟକ। ଆତଙ୍କବାଦରୁ କୌଣସି ଦେଶ ରାଜନୈତିକ ଫାଇଦା ନେବାକୁ ଚେଷ୍ଟା କରିବା ଉଚିତ ନୁହେଁ ବୋଲି ସେ କହିଛନ୍ତି।
ଡିସେମ୍ବର ୨୦୨୨ ମାସ ପାଇଁ ଭାରତ ୟୁଏନଏସସିର ଅଧ୍ୟକ୍ଷତା କରୁଛି। ଏସ ଜୟଶଙ୍କର ମଧ୍ୟ ଜାତିସଂଘର ସେକ୍ରେଟେରୀ ଜେନେରାଲ ଆଣ୍ଟୋନିଓ ଗୁଟେରସଙ୍କୁ ଭେଟି ଭାରତର ଜି-୨୦ ଅଧ୍ୟକ୍ଷତାରେ ଏକାଠି କାମ କରିବା ବିଷୟରେ ମତ ବିନିମୟ କରିଥିଲେ।
