ନୂଆଦିଲ୍ଲୀ,୧୫।୧୨ : ଅରୁଣାଚଳ ପ୍ରଦେଶର ତୱାଙ୍ଗ ସେକ୍ଟରରେ ଭାରତୀୟ ଏବଂ ଚାଇନା ସୈନିକଙ୍କ ମଧ୍ୟରେ ସଂଘର୍ଷ ପରେ ପୂର୍ବତନ ବୈଦେଶିକ ସଚିବ ବିଜୟ ଗୋଖଲେଙ୍କ ବିବୃତ୍ତି ସାମ୍ନାକୁ ଆସିଛି। ଚାଇନାକୁ ତାଗିଦ କରି ଗୋଖଲେ କହିଛନ୍ତି ଯେ ଚାଇନା ଭ୍ରମରେ ରହିବା ଉଚିତ୍ ନୁହେଁ ଯେ ଭାରତ ଏଲଏସି କୁ ନେଇ ଏହାର ଉଚିତ ଉତ୍ତର ଦେବ ନାହିଁ। ଭାରତ ଏହାର ସମସ୍ତ ଭୁଲ ନୀତିର ଉପଯୁକ୍ତ ଉତ୍ତର ଦେବ। ୨୦୨୦ର ଗଲଓ୍ବାନ ଘାଟି ଘଟଣାରେ ଚାଇନ ସମ୍ପର୍କରେ ଜାତୀୟ ଜନମତ ସକ୍ରିୟ ହୋଇଥିଲା। ଆମର ସେନା ପ୍ରତ୍ୟେକ ପଦକ୍ଷେପ ପାଇଁ ପ୍ରସ୍ତୁତ ।
ବିଜୟ ଗୋଖଲେ କହିଛନ୍ତି ଯେ ଅଗଷ୍ଟ ୨୦୨୦ରେ ରେଜାଙ୍ଗ ଲା-ରେଚିନ ଲା ରେ ସ୍ନୋ ଲିଓପାର୍ଡ କାଉଣ୍ଟର ଅପରେଶନ କରାଯାଇଥିଲା। ଭାରତ ଏହି ଅପରେଶନକୁ ବୁଝିଶୁଝି କାର୍ଯ୍ୟକାରୀ କରିଥିଲା। ମାତ୍ର ଚାଇନା ଏ ବିଷୟରେ ଚିନ୍ତା କରି ନଥିଲା। ସ୍ନୋ ଲିଓପାର୍ଡ କାଉଣ୍ଟର ଅପରେଶନ ମାଧ୍ୟମରେ ଚାଇନା ସୈନ୍ୟଙ୍କୁ ପୋଙ୍ଗଙ୍ଗ ତ୍ସୋ ହ୍ରଦରୁ ପଛକୁ ଯିବାକୁ ଭାରତୀୟ ସେନା ବାଧ୍ୟ କରିଥିଲା। ଏଭଳି ପରିସ୍ଥିତିରେ ଚାଇନାର ଧାରଣା ରହିଛି ଯେ ଏଲଏସିରେ ଛୋଟ ଛୋଟ ଘଟଣାରେ ଭାରତ ପ୍ରତିଶୋଧ ନେବ ନାହିଁ କାରଣ ଭାରତ ରିସ୍କ ନେବାକୁ ଚାହିଁବ ନାହିଁ। ମାତ୍ର ଏବେ ଆଉ ସେଭଳି ହେବ ନାହିଁ।
ଗୋଖଲେ କହିଛନ୍ତି ଯେ ଚାଇନାର ଦୁଇଟି ଧାରଣା ରହିଛି। ପ୍ରଥମଟି ହେଉଛି ଏକ ପୃଥକ ଘଟଣାର ଜବାବରେ ଭାରତ ଏକ ବଡ଼ ଧରଣର ସାମରିକ ପ୍ରତିଶୋଧ ନେବାକୁ ନିଷ୍ପତ୍ତି ନେବ ନାହିଁ। ଦ୍ୱିତୀୟରେ ଭାରତ ଅନ୍ୟ ଦେଶ ସହିତ ମି ମିଶି ଆକ୍ରମଣ କରିବ ନାହିଁ।
ଗୋଖଲେ କହିଛନ୍ତି ଯେ ଚାଇନା ରାଜନେତାମାନେ ମଧ୍ୟ ସେମାନଙ୍କର ବିଶ୍ୱାସ ତ୍ୟାଗ କରିବା ଉଚିତ ଯେ ଆଗାମୀ ସମୟରେ କୌଣସି ସାମରିକ ମୁକାବିଲା ପରେ ଭାରତୀୟ ପ୍ରତିକ୍ରିୟା ଅତ୍ୟନ୍ତ ନମନୀୟ ହେବ କାରଣ ଭାରତ ନିଜର ସାମରିକ ସାମର୍ଥ୍ୟ ଏବଂ ଆହ୍ବାନକୁ ଦୃଷ୍ଟିରେ ରଖି ଏଲଏସିରେ ସୁରକ୍ଷା ବ୍ୟବସ୍ଥାକୁ କଡାକଡି କରୁଛି।
