ଶ୍ରୀନଗର,୧୧।୧୨ : ଜମ୍ମୁ-କଶ୍ମୀରରେ ୨୦ ଜଣ ରାଜନେତାଙ୍କ ସୁରକ୍ଷା ପ୍ରତ୍ୟାହାର କରାଯାଇଛି। ଡିସେମ୍ବର ୧୦ ରେ ଏହି ନିର୍ଦ୍ଦେଶ ଜାରି କରାଯାଇଛି। କିଛି ନେତାଙ୍କ ସୁରକ୍ଷା ବ୍ୟବସ୍ଥାକୁ କମାଇ ଦିଆଯାଇଛି। ରାଜନେତାମାନଙ୍କୁ ସୁରକ୍ଷା କର୍ମୀ ପ୍ରଦାନ କରାଯିବା ବ୍ୟତୀତ ସେମାନଙ୍କ ଏସକର୍ଟ ସୁବିଧା ମଧ୍ୟ ପ୍ରତ୍ୟାହାର କରାଯାଇଛି।
ଏହି ନେତାମାନଙ୍କ ମଧ୍ୟରୁ ଅଧିକାଂଶ ପୂର୍ବତନ ବିଧାୟକ ହୋଇଥିବାବେଳେ ଜଣେ ପୂର୍ବତନ ଏମ୍ପି ମଧ୍ୟ ଅଛନ୍ତି। ଏତଦ ବ୍ୟତୀତ ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲାଙ୍କ ଜ୍ୱାଇଁ ମହମ୍ମଦ ଅସୀମ ଖାନଙ୍କ ସୁରକ୍ଷାକୁ ହଟାଇ ଦିଆଯାଇଛି। ଅନେକ ନେତାଙ୍କ ସୁରକ୍ଷାର ଗୋଟିଏ କିମ୍ବା ଦୁଇଟି ବିଭାଗ ହ୍ରାସ କରାଯାଇଛି। ସୁରକ୍ଷା ପ୍ରତ୍ୟାହାର କରାଯାଇଥିବା ବ୍ୟକ୍ତିଙ୍କ ତାଲିକାରେ ନ୍ୟାଶନାଲ କନଫରେନ୍ସ ଏବଂ ପିଡିପି ନେତା ଅଛନ୍ତି।
ଏହାପୂର୍ବରୁ ଜାନୁଆରୀ ମାସରେ ଜମ୍ମୁ-କଶ୍ମୀରର ପୂର୍ବତନ ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା,ଗୁଲାମ ନବୀ ଆଜାଦଙ୍କ , ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଏବଂ ମେହବୁବା ମୁଫତି ପ୍ରମୁଖ ଚାରିଜଣ ମୁଖ୍ୟମନ୍ତ୍ରୀଙ୍କ ସ୍ବତନ୍ତ୍ର ସୁରକ୍ଷା ଗୋଷ୍ଠୀ (ଏସଏସଜି) କଭରକୁ କମ କରି ଦିଆଯାଇଥିଲା। ତେବେ, ଫାରୁକ ଅବଦୁଲ୍ଲା ଏବଂ ଗୁଲାମ ନବୀ ଆଜାଦଙ୍କୁ ଜାତୀୟ ସୁରକ୍ଷା ଗାର୍ଡର ସୁରକ୍ଷା କଭର ଯୋଗାଇ ଦିଆଯାଇଛି, ଯାହାକୁ ବ୍ଲାକ କ୍ୟାଟ କମାଣ୍ଡୋ ମଧ୍ୟ କୁହାଯାଏ। ଏହି କାରଣରୁ ସେମାନଙ୍କର ଜେଡ-ପ୍ଲସ ସୁରକ୍ଷା ରହିଛି। ଫେବୃଆରୀ ୨୦୧୯ ରେ ପୁଲୱାମା ଆକ୍ରମଣ ପରେ ଜମ୍ମୁ-କଶ୍ମୀର ପ୍ରଶାସନ ୧୮ ବିଚ୍ଛିନ୍ନତାବାଦୀ ଏବଂ ୧୫୫ ନେତାଙ୍କ ସୁରକ୍ଷା ପ୍ରତ୍ୟାହାର କରିନେଇଥିଲା।
