ପ୍ୟାରିସ୍,୨୪।୧୧: ବୈଦ୍ୟୁତିକ ଶକ୍ତି ଉତ୍ପାଦନର ପ୍ରମୁଖ ସମ୍ବଳ ହେଉଛି କୋଇଲା। ଜଳବାୟୁ ପରିବର୍ତ୍ତନ କାରଣରୁ ବିଶ୍ୱର ବିଭିନ୍ନ ପ୍ରାନ୍ତରେ ଏବେ କୋଇଲା ସଙ୍କଟ ମୁଣ୍ଡ ଟେକିଛିି। ଏଥିଯୋଗୁ ଭବିଷ୍ୟତରେ ବିଦ୍ୟୁତ୍ ଶକ୍ତିର ଘୋର ଅଭାବ ବିଶ୍ୱବାସୀଙ୍କ ପାଇଁ ବିପଦ ସାଜିପାରେ। ଏ ପ୍ରକାର ଅସୁବିଧାକୁ ଦୂର କରିବା ସକାଶେ ୟୁରୋପୀୟ ବୈଜ୍ଞାନିକମାନେ ମହାକାଶରେ ସୋଲାର ଫାର୍ମ ପ୍ରତିଷ୍ଠା ଉପରେ ଗୁରୁତ୍ୱ ଦେଇଛନ୍ତି। ପ୍ରାକୃତିକ ଉତ୍ସ ସୂର୍ଯ୍ୟାଲୋକ ବ୍ୟବହାର ଦ୍ୱାରା ଅଧିକମାତ୍ରାରେ ବିଦ୍ୟୁତ୍ ଶକ୍ତି ଉତ୍ପାଦନ କରାଯାଇପାରିବ। ସେହି ବିଦ୍ୟୁତ୍ ଶକ୍ତି ପୃଥିବୀବାସୀଙ୍କୁ ଆଲୋକିତ କରିବ ବୋଲି ୟୁରୋପୀୟ ମହାକାଶ ସଂସ୍ଥା (ଇଏସ୍ଏ) ଆଶା ବାନ୍ଧିଛି। ଏହି ଲକ୍ଷ୍ୟ ହାସଲ ପାଇଁ ସ୍ପେସ୍ରେ ସୋଲାର ଫାର୍ମ ସ୍ଥାପନ ଯୋଜନା ଚାଲିଛି।
ପଡ଼ୁଥିବା ସୂର୍ଯ୍ୟାଲୋକର ୧୦ ଗୁଣା ଆଲୋକ ମହାକାଶରେ ପଡ଼ିଥାଏ। ସୂର୍ଯ୍ୟଙ୍କ ଆଲୋକରୁ ପ୍ରଚୁର ପରିମାଣର ବିଦ୍ୟୁତ୍ ଶକ୍ତି ଉତ୍ପାଦନ ସମ୍ଭବ। ଏ ନେଇ ଇଏସ୍ଏ ବୈଜ୍ଞାନିକଙ୍କ ଦ୍ୱାରା ଏକ ଅଧ୍ୟୟନ ଆରମ୍ଭ କରାଯିବ। ନିଷ୍କର୍ଷରେ ପହଞ୍ଚିବାକୁ ପାଖାପାଖି ୩ ବର୍ଷ ସମୟ ଲାଗିପାରେ। ଏହି ସୌର ପ୍ରକଳ୍ପ ଦ୍ୱାରା ଜାଏଣ୍ଟ ଅର୍ବିଟ୍ ସାଟେଲାଇଟ୍ଗୁଡ଼ିକ ସୂର୍ଯ୍ୟାଲୋକ ସଂଗ୍ରହ କରି ଏହାକୁ ଲୋ ପାଓ୍ବାର୍ ଡେନ୍ସିଟି ମାଇକ୍ରୋଓ୍ବେଭ୍ରେ ରୂପାନ୍ତରିତ କରିବ। ସୁରକ୍ଷିତ ଭାବେ ବିମ୍ ଆକାରରେ ଏହି ମାଇକ୍ରୋଓ୍ବେଭ୍ ପୃଥିବୀର ରିସିଭର୍ ଷ୍ଟେଶନ୍ରେ ପହଞ୍ଚିବ, ଯେଉଁଠାରୁ ବିଦ୍ୟୁତ୍ ଉତ୍ପାଦନ କରାଯିବ। ମାଇକ୍ରୋଓ୍ବେଭ୍ ଜରିଆରେ ମଣିଷ, ପଶୁ, ପକ୍ଷୀ, ବୃକ୍ଷ ସାଙ୍ଗକୁ ବିମାନ ଚଳାଚଳ ଯେପରି ପ୍ରଭାବିତ ନ ହେବ ସେ ଦିଗକୁ ଦୃଷ୍ଟିରେ ରଖାଯିବ।
ଜେନେରେଟିଂ ସୋଲାର ପାର୍କର ଓଜନ ୧ ଟନ୍ରୁ ଅଧିକ ହୋଇପାରେ। ପୃଥିବୀପୃଷ୍ଠରେ ୬ ନିୟୁତ ସୋଲାର ପ୍ୟାନେଲ୍ରୁ ୨ ଗିଗାବାଇଟ୍ ବିଦ୍ୟୁତ୍ ଶକ୍ତି ମିଳୁଥିବାବେଳେ ଗୋଟିଏ ବୃହତ୍ ଉପଗ୍ରହ ସମାନ ପରିମାଣର ବିଦ୍ୟୁତ୍ ଉତ୍ପାଦନ ପାଇଁ ସକ୍ଷମ। ଜଳବାୟୁ ପରିବର୍ତ୍ତନ ଯୋଗୁ ଭବିଷ୍ୟତରେ ଯେଉଁ ଶକ୍ତି ସଙ୍କଟ ଦେଖାଯିବା ଆଶଙ୍କା ରହିଛି, ତାହାକୁ ସୋଲାର ପାର୍କ ଦ୍ୱାରା ହିଁ ଦୂର କରାଯାଇ ପାରିବ ବୋଲି ପ୍ରୋଜେକ୍ଟ୍ ମୁଖ୍ୟ ସଞ୍ଜୟ ବିଜେନ୍ଦ୍ରନ କହିଛନ୍ତି। ତେବେ ଏଥିଲାଗି ବହୁ ପରିମାଣର ଅର୍ଥ ସାଙ୍ଗକୁ ସରକାରୀ ସହାୟତା ଲୋଡ଼ା। ଇଏସ୍ଏ ବ୍ୟତୀତ ଆମେରିକା, ଜାପାନ ମଧ୍ୟ ସ୍ପେସ୍ରେ ସୋଲାର ଫାର୍ମ ପ୍ରତିଷ୍ଠା ଲକ୍ଷ୍ୟରେ ଦିଗରେ ଉଦ୍ୟମ ଜାରି ରଖିଛନ୍ତି।
