ଲକ୍ଷ୍ନୌ, ୧୭ା୧୦: ଉତ୍ତରପ୍ରଦେଶର ସବ୍ଅର୍ଡିନେଟ୍ ସର୍ଭିସ୍ ସିଲେକ୍ସନ କମିଶନର ପ୍ରିଲିମିନାରୀ ଏଲିଜିବିଟି ଟେଷ୍ଟ (ପିଇଟି) ଦେବା ପାଇଁ ଶୁକ୍ରବାର ଓ ଶନିବାର ବିଭିନ୍ନ ବସ୍ଷ୍ଟାଣ୍ଡ ଏବଂ ରେଳଷ୍ଟେଶନରେ ଅସମ୍ଭାଳ ଭିଡ଼ ଦେଖିବାକୁ ମିଳିଥିଲା। ରବିବାର ଏହ ପରୀକ୍ଷା ଅନୁଷ୍ଠିତ ହୋଇଥିବାବେଳେ ପରୀକ୍ଷା କେନ୍ଦ୍ରରେ ପହଞ୍ଚିବା ପାଇଁ ଲକ୍ଷାଧିକ ପରୀକ୍ଷାର୍ଥୀ ବସ୍ ଓ ଟ୍ରେନ୍କୁ ଅପେକ୍ଷା କରିଥିଲେ।
ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଟ୍ରେନ୍ ଓ ବସ୍ ପାଇବା ପାଇଁ ଦୁଇ ଦିନ ଆଗରୁ ଛାତ୍ରୀଛାତ୍ରମାନେ ଷ୍ଟେଶନ ଏବଂ ଷ୍ଟାଣ୍ଡ୍ରେ ଶୋଇଥିବା ମଧ୍ୟ ଦେଖିବାକୁ ମିଳିଥିଲା। ଦୂରରେ ପରୀକ୍ଷାକେନ୍ଦ୍ର କରାଯାଇଥିବାରୁ ପରୀକ୍ଷାର୍ଥୀଙ୍କୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାକୁ ପଡ଼ିଥିବା ଅଭିଯୋଗ ହୋଇଛି। ତେବେ ଏପରି ଫଟୋ ଓ ଭିଡିଓ ମିଛ ଏବଂ ବିରୋଧୀ ଦଳଗୁଡ଼ିକ ତାହାର ପ୍ରସାର କରିଥିବା ସରକାରଙ୍କ ପକ୍ଷରୁ କୁହାଯାଇଛି। ପିଲାମାନଙ୍କ ପାଇଁ ସ୍ବତନ୍ତ୍ର ଭାବେ ଅତିରିକ୍ତ ବସ୍ ଓ ଟ୍ରେନ୍ ବ୍ୟବସ୍ଥା କରାଯାଇଥିବା ବୋଲି ୟୁପି ସରକାର ସଫେଇ ଦେଇଛନ୍ତି।
