ହାଟଡିହୀ,୧୮।୭ (ଡି.ଏନ.ଏ.) – ଶିକ୍ଷାର ମାନ ବୃଦ୍ଧି ପାଇଁ ସରକାର ନୂଆ ନୂଆ ଯୋଜନା କରିବା ସହ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ଏତେ ସବୁ ପରେ ବି ଆଜିର ଦିନ ରେ ବହୁ ଅଭିଭାବକ ସରକାରୀ ସ୍କୁଲ ଛାଡି ଘରୋଇ ସ୍କୁଲମୁହାଁ ହେଉଛନ୍ତି। ଅଧିକାଂଶ ସ୍କୁଲରେ ଆବଶ୍ୟକୀୟ ଶିକ୍ଷକ ନ ଥିବାରୁ ଅଭିଭାବକ ମାନେ ଅସନ୍ତୋଷ ହେଉଛନ୍ତି। ଜିଲା ହାଟଡିହୀ ବ୍ଲକ ସୋସୋ ପଞ୍ଚାୟତରେ ଅବସ୍ଥିତ ସୋସୋ-କାନପୁର ବିକେ ହାଇସ୍କୁଲ ଏହାର ଏକ ଉଦାହରଣ ସାଜିଛି। ୧୯୬୨ ମସିହାରୁ ଉକ୍ତ ସ୍କୁଲଟି ବହୁ କ୍ଷେତ୍ରରେ ଗୁରୁତ୍ୱ ବହନ କରୁଥିବା ବେଳେ ଏଠାରେ ଏବେ ସଂସ୍କୃତ ଏବଂ ବିଜ୍ଞାନ ଶିକ୍ଷକ ନାହାନ୍ତି। ଗତ ବର୍ଷ ଦଶମ ଶ୍ରେଣୀ ଛାତ୍ରୀଛାତ୍ରଙ୍କୁ ସଂସ୍କୃତ ବିଷୟ ପଢାଇବା ପାଇଁ ସ୍କୁଲ ତରଫରୁ ଅନୁରୋଧ କରି ବାହାରୁ ଜଣେ ଶିକ୍ଷକଙ୍କୁ ଅଣାଯାଇଥିଲା। ଗଣିତ ଶିକ୍ଷକ ଛାତ୍ରୀଛାତ୍ରଙ୍କୁ ବିଜ୍ଞାନ ପଢ଼ାଉଛନ୍ତି। ପ୍ରାୟ ଏକ ବର୍ଷରୁ ଉର୍ଦ୍ଧ୍ୱ ହେବ ଏହି ଦୁଇ ପଦବୀ ଫାଙ୍କା ପଡିଛି। ଅନୁରୋଧରେ ଆସିଥିବା ସଂସ୍କୃତ ଶିକ୍ଷକ ପ୍ରାୟ ୫ ମାସ ହେବ ଆଉ ଆସୁ ନ ଥିବାରୁ ସ୍କୁଲରେ ସଂସ୍କୃତ ବିଷୟ ପଢାଇବା ପୁରା ବନ୍ଦ ହୋଇଯାଇଥିବା ପ୍ରଧାନଶିକ୍ଷକ ଅଶୋକ ଜେନା କହିଛନ୍ତି। ଆହୁରି ମଧ୍ୟ କିରାଣୀ ଏବଂ ପିଅନ ପଦବୀ ଫାଙ୍କା ପଡିଛି। ନବମ ଶ୍ରେଣୀରେ ୬୦ ଜଣ ଏବଂ ଦଶମ ଶ୍ରେଣୀରେ ୩୬ ଜଣ ମୋଟ ୯୬ ଛାତ୍ରୀଛାତ୍ର ପାଠ ପଢୁଛନ୍ତି। ପ୍ରଧାନଶିକ୍ଷକ ଏବଂ ଖେଳ ଶିକ୍ଷକଙ୍କୁ ମିଶାଇ ମୋଟ ୬ଜଣ ଶିକ୍ଷୟିତ୍ରୀଶିକ୍ଷକ ଏଠାରେ କାର୍ଯ୍ୟ କରୁଛନ୍ତି। ସୋସୋ, ନିଉଦାନୀ, ମରିଚିପଦା, କାନପୁର, କଖାରୁଗ ପ୍ରଭୃତି ଗ୍ରାମର ଛାତ୍ରୀଛାତ୍ରମାନେ ପାଠ ପଢିବା ପାଇଁ ଉକ୍ତ ସ୍କୁଲ ଉପରେ ନିର୍ଭର କରନ୍ତି। ୫-ଟିରେ ସ୍କୁଲ ଗୃହ ଉନ୍ନତିକରଣ କରାଯାଇ ଚିକ୍କଣ କରାଯାଉଛି। କିନ୍ତୁ ଛାତ୍ରୀଛାତ୍ର ମାନେ ପାଠ କିପରି ପଢିବେ ଏବଂ ତାଙ୍କୁ କିଏ ପାଠ ପଢାଇବେ ସେଥିପ୍ରତି ଧ୍ୟାନ ଦିଆଯାଉ ନ ଥିବା ଏବଂ ଆବଶ୍ୟକୀୟ ଶିକ୍ଷକ ନିଯୁକ୍ତି ହେଉ ନ ଥିବା ନେଇ ଗୌରାଙ୍ଗ ଚରଣ ବାରିକ, ରାଧାଶ୍ୟାମ ମଲିକ, ବିନୋଦ ରାଉତ, ଦୀପକ ରାଉତଙ୍କ ସମେତ ବହୁ ଅଭିଭାବକ ଅସନ୍ତୋଷ ପ୍ରକାଶ କରିଛନ୍ତି l
ଏସମ୍ପର୍କରେ ହାଟଡିହୀ ବିଇଓ ସୁରେଶ ଜେନାଙ୍କୁ ପଚାରିବାରୁ ପ୍ରଥମ ପର୍ଯ୍ୟାୟ ଶିକ୍ଷକ ନିଯୁକ୍ତି ପ୍ରକ୍ରିୟାରେ ବହୁସଂଖ୍ୟକ ଶିକ୍ଷକଙ୍କୁ ନିୟୁକ୍ତି ମିଳିଛି। ଏହି ସ୍କୁଲର ପାଳି ନ ପଡ଼ିବାରୁ ଶିକ୍ଷକ ପଦବୀ ଫାଙ୍କା ପଡ଼ିଛି। ଦ୍ୱିତୀୟ ପର୍ଯ୍ୟାୟ ନିଯୁକ୍ତି ବେଳେ ଶିକ୍ଷକ ପଦବୀ ପୂରଣ ହେବ ବୋଲି ସେ କହିଛନ୍ତି।
