ଆମ୍ବ ପ୍ରେମୀମାନେ ବର୍ତ୍ତମାନ ସେମାନଙ୍କର ପ୍ରିୟ ପ୍ରଜାତିର ଆମ୍ବ ଖାଇବାର ମଜା ନେଉଛନ୍ତି। କିଛି ଆମ୍ବ ମାର୍ଚ୍ଚରୁ ବଜାରକୁ ଆସିଥିବା ବେଳେ ଏବେ ବର୍ଷା ଆରମ୍ଭରେ ବି କିଛି ଆମ୍ବ ବଜାରରେ ଉପଲବ୍ଧ ହେଉଛି। ଯଦିଓ ଭାରତକୁ ଆମ୍ବର ଦେଶ କୁହାଯାଏ। ତଥାପି ବିଦେଶରେ ମଧ୍ୟ ଆମ୍ବ ଫଳୁଛି। ଯାହାର ଦାମ୍ ଜାଣିଲେ ଆଶ୍ଚର୍ଯ୍ୟ ହେବେ।
ଜାପାନର ମିୟାଜାକିରେ ଏପରି ଦାମୀ ଆମ୍ବ ମିଳିଥାଏ। ଏହା ଦକ୍ଷିଣ ପୂର୍ବ ଏସିଆର କିଛି ଅଂଶରେ ବି ମିଳିଥାଏ। ଏହି ଆମ୍ବକୁ ‘ସୂର୍ଯ୍ୟ ଅଣ୍ଡା’ ମଧ୍ୟ କୁହାଯାଏ। ଏହି ଆମ୍ବ ଲାଲ୍ ଆଉ ବାଇଗଣୀ ମିଶା ରଙ୍ଗର। ଏତେ ମିଠା ଯେ, ଯେଉଁମାନେ ଏହାକୁ ଖାଆନ୍ତି ସେମାନେ ଏହାର ସ୍ବାଦକୁ ବେଶ୍ ଅନୁଭବ କରିଥାନ୍ତି। ମାତ୍ର ଆଶ୍ଚର୍ଯ୍ୟଜନକ କଥା ଏହି ଆମ୍ବକୁ କେହି ସହଜରେ ପାଆନ୍ତି ନାହିଁ। କାରଣ ଏହାର ଦାମ୍ ବହୁ ଅଧିକ। ଯାହାକି ଜଣେ ସାଧାରଣ ଲୋକ ପକ୍ଷେ କିଣି ଖାଇବା କଷ୍ଟକର।
ଏକ ରିପୋର୍ଟ ଅନୁଯାୟୀ, ମଧ୍ୟପ୍ରଦେଶର ଜଣେ ବ୍ୟକ୍ତି ତାଙ୍କ ବଗିଚାରେ ଏହି ଆମ୍ବ ଗଛ ଲଗାଇଥିଲେ। ଏହା ଜବଲପୁରର ବାସିନ୍ଦା ସଙ୍କଳ୍ପ ପ୍ୟାରୀ ଏବଂ ତାଙ୍କ ପତ୍ନୀ ରାନୀ ପ୍ୟାରୀଙ୍କ ଦ୍ୱାରା ଲଗାଯାଇଥିଲା। ଆମ୍ବ ଏତେ ମୂଲ୍ୟବାନ ଯେ, ଏହାର ସୁରକ୍ଷା ପାଇଁ ଚଳିତ ବର୍ଷ ସେମାନେ ୪ ଜଣ ସୁରକ୍ଷାକର୍ମୀ ଏବଂ କୁକୁର ନିଯୁକ୍ତ କରିଛନ୍ତି।
ଅନ୍ତର୍ଜାତୀୟ ବଜାରରେ ଏହି ଆମ୍ବ ମୂଲ୍ୟ କିଲୋଗ୍ରାମ ପ୍ରତି ୨.୭୦ ଲକ୍ଷ ଟଙ୍କା। ଭାରତରେ ଏହା ଅତ୍ୟନ୍ତ ବିରଳ। ଲୋକମାନେ ଗୋଟିଏ ଆମ୍ବକୁ ୨୦ ହଜାର ଟଙ୍କା ପର୍ଯ୍ୟନ୍ତ ଦେବା ପାଇଁ ପ୍ରସ୍ତୁତ କିନ୍ତୁ ବର୍ତ୍ତମାନ ଏହି ଆମ୍ବ ମିଳୁନାହିଁ। ଗୋଟିଏ ଆମ୍ବର ଓଜନ ପ୍ରାୟ ୩୫୦ ଗ୍ରାମ୍। ଅନ୍ୟ ଆମ୍ବ ତୁଳନାରେ ଏହା ୧୫ ପ୍ରତିଶତ ଅଧିକ ମିଠା ହୋଇଥାଏ। ଏହି ଆମ୍ବ ଏପ୍ରିଲରୁ ଅଗଷ୍ଟ ମଧ୍ୟରେ ପାଚିଥାଏ। ଏଥିରେ ଆଣ୍ଟିଅକ୍ସିଡାଣ୍ଟ, ଭିଟାକାରୋଟିନ ଏବଂ ଫଲିକ୍ ଏସିଡ୍ ଥିବାରୁ ଦୃଷ୍ଟିଶକ୍ତି ପ୍ରଖର ହୋଇଥାଏ।
