ନୂଆଦିଲ୍ଲୀ,୪।୫ (ପି.ଟି.): ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଫ୍ରାନ୍ସ ଗସ୍ତର ଦିନକ ପୂର୍ବରୁ ସେଠାର ନାଭାଲ ଗ୍ରୁପ୍ ଭାରତ ସହ ବୁଡାଜାହାଜ ପ୍ରକଳ୍ପ (ପି-୭୫ଆଇ) ବୁଝାମଣାରୁ ଓହରିଯାଇଛି। ପ୍ରସ୍ତାବ ପାଇଁ ଅନୁରୋଧ (ଆର୍ଏଫ୍ପି)ରେ ଏୟାର ଇଣ୍ଡିପେଣ୍ଡେଣ୍ଟ ପ୍ରପଲ୍ଶନ (ଏଆଇପି) ସିଷ୍ଟମକୁ ନେଇ ଭାରତର ସର୍ତ୍ତ ଯୋଗୁ ପି-୭୫ଆଇ ପ୍ରୋଜେକ୍ଟରେ ସାମିଲ ହେବା ସମ୍ଭବ ନୁହେଁ ବୋଲି ଫ୍ରାନ୍ସର ନାଭାଲ ଗ୍ରୁପ୍ ମଙ୍ଗଳବାର କହିଛି। ଏହି ପ୍ରକଳ୍ପରେ ନୌସେନା ଲାଗି ୬ଟି ପାରମ୍ପରିକ ବୁଡ଼ାଜାହାଜ ଭାରତରେ ନିର୍ମାଣ ହୋଇଥାନ୍ତା। ସୂଚନାଯୋଗ୍ୟ, ଏଆଇପି ସିଷ୍ଟମ ଯୋଗୁ ପାରମ୍ପରିକ ବୁଡ଼ାଜାହାଜ ପାଣି ଭିତରେ ଦୀର୍ଘଦିନ ବୁଡ଼ିରହି ଅଧିକ ବେଗରେ ଗତି କରିଥାନ୍ତି। ପ୍ରଧାନମନ୍ତ୍ରୀ ମୋଦି ବୁଧବାର ପ୍ୟାରିସ୍ ଯାଇ ପୁନଃ ନିର୍ବାଚିତ ଫ୍ରାନ୍ସ ରାଷ୍ଟ୍ରପତି ଏମାନୁଏଲ୍ ମାକ୍ରଁଙ୍କୁ ଭେଟିବା କାର୍ଯ୍ୟକ୍ରମ ଥିବାବେଳେ ଏହା ପୂର୍ବରୁ ଫ୍ରାନ୍ସ କମ୍ପାନୀ ଚୁକ୍ତିରୁ ଓହରିଯିବା ଏକ ଶକ୍ତ ଝଟ୍କା ହୋଇଛି।
ଗତବର୍ଷ ଜୁନ୍ରେ ପି-୭୫ଆଇ ପ୍ରକଳ୍ପକୁ ପ୍ରତିରକ୍ଷା ମନ୍ତ୍ରଣାଳୟ ମଞ୍ଜୁରୀ ପ୍ରଦାନ କରିବା ସହ ଏହି କାର୍ଯ୍ୟରେ ଭାରତର ଘରୋଇ କମ୍ପାନୀ ଲାର୍ସେନ ଆଣ୍ଡ ଟୁବ୍ରୋ ଏବଂ ରାଷ୍ଟ୍ରାୟତ୍ତ କମ୍ପାନୀ ମାଜାଗାଁଓ ଡକ୍ସ ଲିମିଟେଡକୁ ଆର୍ଏଫ୍ପି ଇସ୍ୟୁ କରିଥିଲା। ଏହି ଦୁଇ କମ୍ପାନୀ (ଷ୍ଟ୍ରାଟେଜିକ୍ ପାର୍ଟନର) ୫ ସଂକ୍ଷିପ୍ତ ତାଲିକାଭୁକ୍ତ ବିଦେଶୀ କମ୍ପାନୀ ମଧ୍ୟରୁ ଗୋଟିଏ ସହିତ ସହବନ୍ଧିତ ହେବା ପରେ ଆର୍ଏଫ୍ପିର ଜବାବ ରଖିବେ ବୋଲି ମନ୍ତ୍ରଣାଳୟ କହିଥିଲା। ଏହି ବିଦେଶୀ କମ୍ପାନୀ ମଧ୍ୟରେ ଫ୍ରାନ୍ସର ନାଭାଲ ଗ୍ରୁପ୍ ରହିଛି। ୨ ଷ୍ଟ୍ରାଟେଜିକ୍ ପାର୍ଟନରଙ୍କ ଜବାବକୁ ଅନୁଧ୍ୟାନ କରିବା ପରେ ପ୍ରତିରକ୍ଷା ମନ୍ତ୍ରଣାଳୟ ୪୩,୦୦୦ କୋଟି ଟଙ୍କାର ଚୁକ୍ତିନାମାକୁ ଅନୁମୋଦନ କରିଥାନ୍ତା। ତେବେ ଆର୍ଏଫ୍ପିର କେତେକ ସର୍ତ୍ତ ପାଇଁ ଦୁଇ ଭାରତୀୟ କମ୍ପାନୀ ବିଦେଶୀ କମ୍ପାନୀ ନିକଟକୁ ଅନୁରୋଧ ପଠାଇଲେ ନାହିଁ। ସେଥିପାଇଁ ଆମେ ଆନୁଷ୍ଠାନିକ ବିଡ୍ ଦାଖଲ କରିପାରିଲୁ ନାହିଁ ବୋଲି ନାଭାଲ ଗ୍ରୁପ୍ ଇଣ୍ଡିଆର ପରିଚାଳନା ନିର୍ଦ୍ଦେଶକ ଲାଉରେଣ୍ଟ ଭିଡିଉ ମଙ୍ଗଳବାର ଏକ ବିବୃତିରେ କହିଛନ୍ତି।
