ନୂଆଦିଲ୍ଲୀ,୬।୩: ଆଇସିସି ମହିଳା ବିଶ୍ୱକପ୍ ୨୦୨୨ରେ ରବିବାର ଭାରତ ତା’ର ଅଭିଯାନ ଆରମ୍ଭ କରିଛି। ପାକିସ୍ତାନ ସହ ମୁକାବିଲାରେ ଭାରତ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଛି। ତେବେ ଏହି ମ୍ୟାଚ୍ରେ ଅଧିନାୟକ ମିତାଲି ରାଜ ମଇଦାନକୁ ଓହ୍ଲାଇବା ମାତ୍ରେ ବଡ଼ ରେକର୍ଡ ନିଜ ନାମରେ କରିଛନ୍ତି। ପ୍ରଥମ ମହିଳା କ୍ରିକେଟର ଭାବେ ମିତାଲି ୬ଟି ବିଶ୍ୱକପ୍ରେ ଖେଳିବାର ଗୌରବ ଅର୍ଜନ କରିଛନ୍ତି। ଏହି ମାଇଲଖୁଣ୍ଟ ଅତିକ୍ରମ କରିବାରେ ମିତାଲି ହେଉଛନ୍ତି ସଚିନ ତେନ୍ଦୁଲକରଙ୍କ ପରେ ଦ୍ୱିତୀୟ ଭାରତୀୟ କ୍ରିକେଟର।
ସଚିନ ୧୯୯୨, ୧୯୯୬, ୧୯୯୯, ୨୦୦୩, ୨୦୦୭ ଓ ୨୦୧୧ ବିଶ୍ୱକପ ଖେଳିଥିଲେ। ସେହିଭଳି ସଚିନ ଓ ପାକିସ୍ତାନର ପୂର୍ବତନ କ୍ରିକେଟର ଜାଭେସ ମିଆଁଦାଦାଙ୍କ ପରେ ମିତାଲି ହେଉଛନ୍ତି ତୃତୀୟ କ୍ରିକେଟର ଯିଏ ୬ଟି ବିଶ୍ୱକପ୍ ଖେଳିଛନ୍ତି। ୨୦୦୦ରେ ମିତାଲି ପ୍ରଥମ ବିଶ୍ୱକପ ଖେଳିଥିଲେ। ତା’ପରେ ୨୦୦୫, ୨୦୦୯, ୨୦୧୩ ଓ ୨୦୧୭ ବିଶ୍ୱକପ ଟିମ୍ରେ ସେ ସାମିଲ ହୋଇଥିଲା। ଏବେ ୨୦୨୨ ବିଶ୍ୱକପ ଟିମ୍ରେ ସାମିଲ ହେବା ସହିତ ସେ ନ୍ୟୁଜିଲ୍ୟାଣ୍ଡର ପୂର୍ବତନ ଖେଳାଳି ଡ୍ୟାବି ହୋକ୍ଲି ଓ ଇଂଲଣ୍ଡର ଚାରଲୋଟ ଏଡୱାର୍ଡସଙ୍କୁ ପଛରେ ପକାଇ ଦେଇଛନ୍ତି।
