ନୂଆଦିଲ୍ଲୀ, ୨୪ା୨: ୧୦ଟି ଦଳକୁ ନେଇ ଇଣ୍ଡିଆନ ପ୍ରିମିୟର ଲିଗ୍-୧୫ (ଆଇପିଏଲ୍) ଆସନ୍ତା ମାର୍ଚ୍ଚ ୨୬ ଶନିବାର ମୁମ୍ବାଇଠାରେ ଆରମ୍ଭ ହେବ ଏବଂ ମେ ୨୯ରେ ଶେଷ ହେବ। ଟୁର୍ନାମେଣ୍ଟ ଆରମ୍ଭରେ ୪୦ ପ୍ରତିଶତ ଦର୍ଶକଙ୍କୁ ଅନୁମତି ରହିବ। ଗୁରୁବାର ଗଭର୍ନିଂ କାଉନ୍ସିଲ ବୈଠକ ପରେ ଆଇପିଏଲ୍ ଚେୟାରମ୍ୟାନ ବ୍ରିଜେଶ ପଟେଲ ଏହି ସୂଚନା ଦେଇଛନ୍ତି। ଏହି ବ୍ୟୟବହୁଳ ଟୁର୍ନାମେଣ୍ଟରେ ଏଥର ନୂଆ ଦଳ ଭାବେ ଲକ୍ଷ୍ନୌ ସୁପର ଜିଆଣ୍ଟ୍ସ ଓ ଗୁଜରାଟ ଟାଇଟାନ୍ସକୁ ସାମିଲ କରାଯାଇଛି। ଏଥର ମୋଟ ୭୪ଟି ମ୍ୟାଚ ମୁମ୍ବାଇସ୍ଥିତ ଓ୍ବାଙ୍ଖଡେ ଷ୍ଟାଡିୟମ ଓ ବ୍ରାବୋର୍ନ ଷ୍ଟାଡିୟମ ବ୍ୟତୀତ ନବି ମୁମ୍ବାଇର ଡିଓ୍ବାଇ ପାଟିଲ ଗ୍ରାଉଣ୍ଡ ଏବଂ ପୁଣେସ୍ଥିତ ଗାହେୁଞ୍ଜେ ଷ୍ଟାଡିୟମରେ ଖେଳାଯିବ। ମହାରାଷ୍ଟ୍ର ସରକାରଙ୍କ ଗାଇଡ୍ଲାଇନ୍ ଅନୁସାରେ ଦର୍ଶକମାନଙ୍କୁ ଅନୁମତି ମିଳିବ।
