ଆସୁଛି ବଡ଼ଦିନ। ରାଜଧାନୀରେ ଧୀରେ ଧୀରେ ଜମିଲାଣି ସାନ୍ତାକ୍ଲଜ, କ୍ରିସ୍ମାସ ଟ୍ରି, ଲାଇଟିଂ ଷ୍ଟାର ଓ ସାଜସଜ୍ଜା ସାମଗ୍ରୀର ବେପାର। ଭଳିକି ଭଳି ସୁସ୍ବାଦୁ କେକ୍ ପ୍ରସ୍ତୁତି ଆରମ୍ଭ ହୋଇଗଲାଣି। ବିଭିନ୍ନ ଚର୍ଚ୍ଚକୁ ମଧ୍ୟ ସଜ୍ଜିତ କରାଯାଉଛି। କରୋନା ମହାମାରୀ ଆତଙ୍କ ଭିତରେ ଖ୍ରୀଷ୍ଟ ଧର୍ମାବଲମ୍ବୀଙ୍କ ପାଇଁ ବଡ଼ଦିନ ପବର୍ର୍ ଖୁସି ଓ ଉତ୍ସାହ ଆଣିଛି। କିପରି ହସଖୁସିରେ ସେମାନେ ଏହି ପର୍ବ ପାଳନ କରିବେ ସେନେଇ ପ୍ରସ୍ତୁତିରେ ଲାଗିପଡ଼ିଛନ୍ତି।
ଭୁବନେଶ୍ୱର,୨୨ା୧୨(ବ୍ୟୁରୋ): ଭୁବନେଶ୍ୱରର ୟୁନିଟ-୪, ସତ୍ୟନଗର, ନୀଳାଦ୍ରିବିହାର, ଆଚାର୍ଯ୍ୟ ବିହାର, ନୟାପଲ୍ଲୀ, ଖାରବେଳନଗର, ବରମୁଣ୍ଡା ପ୍ରଭୃତି ବିଭିନ୍ନ ସ୍ଥାନରେ ୧୦ରୁ ଊର୍ଦ୍ଧ୍ୱ ବାପ୍ଟିଷ୍ଟ ଓ କ୍ୟାଥୋଲିକ୍ ଚର୍ଚ୍ଚ ରହିଛି। ଏସବୁ ଚର୍ଚ୍ଚଗୁଡ଼ିକରେ ବଡ଼ଦିନ ପ୍ରାର୍ଥନା କାର୍ଯ୍ୟକ୍ରମ ଆୟୋଜନ ଲାଗି ପ୍ରସ୍ତୁତି ଚାଲିଛି। ସେହିପରି ଖ୍ରୀଷ୍ଟ ଧର୍ମାବଲମ୍ବୀମାନେ ନିଜ ଘର ସାଜସଜ୍ଜାରେ ଲାଗିପଡ଼ିଛନ୍ତି। ଅନ୍ୟପକ୍ଷରେ ବଜାରରେ ବ୍ୟବସାୟୀମାନେ ବିଭିନ୍ନ ସାମଗ୍ରୀର ପସରା ମେଲାଇଛନ୍ତି।
ଗତ ବର୍ଷ ବେପାର ମାନ୍ଦା ଥିଲା
ସତ୍ୟନଗର ମୁଖ୍ୟରାସ୍ତା ପାର୍ଶ୍ୱରେ ଅଶୋକ କୁମାର ମହାନ୍ତି ସାନ୍ତାକ୍ଲଜ୍, ଲାଇଟିଂ ଷ୍ଟାର, ମ୍ୟୁଜିକ ସାନ୍ତାକ୍ଲଜ, ଖ୍ରୀଷ୍ଟମାସ୍ ଟ୍ରି ପ୍ରଭୃତି ବିଭିନ୍ନ ପ୍ରକାର ସାମଗ୍ରୀର ପସରା ମେଲାଇଛନ୍ତି। ୧୦ ଟଙ୍କାରୁ ୧୦ହଜାର ଟଙ୍କା ପର୍ଯ୍ୟନ୍ତ ମୂଲ୍ୟର ସାମଗ୍ରୀ ତାଙ୍କ ପାଖରେ ଉପଲବ୍ଧ। ପ୍ରତିବର୍ଷ ଖ୍ରୀଷ୍ଟମାସରେ ସେ ଗ୍ରାହକଙ୍କ ପାଇଁ ନୂଆ ନୂଆ ସାମଗ୍ରୀ ଆଣିଥାନ୍ତି। ଭଲ ବେପାର ହୁଏ। ମାତ୍ର ଗତ ବର୍ଷ କରୋନା କଟକଣା ଯୋଗୁ ବେପାର ମାନ୍ଦା ଥିଲା। କିନ୍ତୁ ଏବର୍ଷ ଭଲ ବ୍ୟବସାୟ ହେବା ନେଇ ସେ ଆଶାବାଦୀ। ବଡ଼ଦିନ ଯେତେ ପାଖେଇ ଆସୁଛି ବଜାର ସେତେ ଜମୁଛି ବୋଲି ଅଶୋକ କହିଛନ୍ତି।
ପୂର୍ବାପେକ୍ଷା ଦାମ୍ ବଢିଛି
ସତ୍ୟନଗରଠାରେ ଅନ୍ୟ ଜଣେ ବ୍ୟବସାୟୀ ସନ୍ତୋଷ କୁମାର ପୃଷ୍ଟି ଛୋଟ ଉଠାଦୋକାନ ଖୋଲିଛନ୍ତି। ସେ କହିଛନ୍ତି, ପୂର୍ବ ବର୍ଷଠାରୁ ଏ ବର୍ଷ ସାମଗ୍ରୀଗୁଡ଼ିକର ଦାମ୍ ବଢିଛି। ତେଣୁ ବେପାର ସେତେ ହେଉନାହିଁ। ତଥାପି ଆଗକୁ ଭଲ ବେପାର ହେବ ବୋଲି ଆଶା ବାନ୍ଧିଛି। ସକାଳ ୧୦ଟାରୁ ରାତି ୮ଟା ପର୍ଯ୍ୟନ୍ତ ଦୋକାନ ଖୋଲି ଗ୍ରାହକଙ୍କୁ ଚାହିଁବସୁଛି।
ଆତ୍ମିକ ଆନନ୍ଦ ମିଳିବ
କୋଭିଡ୍ ଗାଇଡ୍ଲାଇନ ଅନୁଯାୟୀ ଚଳିତ ବର୍ଷ ମଧ୍ୟ ଚର୍ଚ୍ଚରେ ଖ୍ରୀଷ୍ଟମାସ ପାଳନ ହେବ। ଥରକେ ୨୦୦ ଜଣ ଲୋକଙ୍କୁ ନେଇ ୩ରୁ ୪ ଭାଗରେ ଚର୍ଚ୍ଚରେ ପ୍ରାର୍ଥନା କରାଯିବ। ଆଡମ୍ବରପୂର୍ଣ୍ଣ କିମ୍ବା ନାଇଟ୍ ଭିଜିଲ ହେବନାହିଁ, ଯାହାକି ଲୋକଙ୍କୁ କିଛି ମାତ୍ରାରେ ନିରାଶ କରିବ। ସେମାନେ କେବଳ ଆତ୍ମିକ ଆନନ୍ଦର ସୁଯୋଗ ପାଇବେ ବୋଲି ସତ୍ୟନଗରସ୍ଥିତ ସେଣ୍ଟ ଭିନ୍ସେଣ୍ଟ୍ସ୍ ପ୍ରୋ କାଥେଡ୍ରାଲ ଚର୍ଚ୍ଚର ଫାଦର ଅଜୟ କୁମାର ଶୋଭାସୁନ୍ଦର କହିଛନ୍ତି।
ଉତ୍ସବ ପାଳନ ବନ୍ଦ ନ ହେଉ
କୋଭିଡ୍ ଆସିବ ବୋଲି ଉତ୍ସବ ପାଳନ ବନ୍ଦ କରିବା ଉଚିତ୍ ନୁହେଁ। ଜୀବନରେ ସବୁ ମୁହୂର୍ତ୍ତକୁ ସ୍ମରଣୀୟ କରିବାର ଅଛି। ଆଡମ୍ବରପୂର୍ଣ୍ଣ ନ ହେଲେ ବି ପରିବାର ସହ ଘରେ ରହି ଖ୍ରୀଷ୍ଟମାସ ପାଳନ କରିବି ବୋଲି ମଞ୍ଚେଶ୍ୱର ଅଧିବାସୀ ବର୍ଣ୍ଣାଶ୍ରୀ ମହାନ୍ତି କହିଛନ୍ତି। ସେ ଘର ସଜାଇବା ଲାଗି ସାମଗ୍ରୀ କିଣିବାକୁ ଦୋକାନକୁ ଆସିଥିବା ପ୍ରକାଶ କରିଥିଲେ।
ରିପୋର୍ଟ-ଶର୍ମିଷ୍ଠା ପାଣିଗ୍ରାହୀ
