ନୂଆଦିଲ୍ଲୀ,୨।୧୧: ଚଳିତ ଟି୨୦ ବିଶ୍ୱକପ୍ ପରେ ନ୍ୟୁଜିଲାଣ୍ଡ ସହ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ ଖେଳିବ ଭାରତୀୟ ଦଳ। ଏହି ସିରିଜ୍ରେ ବରିଷ୍ଠ ଓପନର ରୋହିତ ଶର୍ମା ଦଳର ନେତୃତ୍ୱ ନେଇପାରନ୍ତି। କେବଳ ଘୋଷଣା ବାକି ଅଛି। କିନ୍ତୁ ଆଗାମୀ କିଛି ଦିନ ମଧ୍ୟରେ ଜାତୀୟ ଚୟନକର୍ତ୍ତାଙ୍କ ସହ ବିସିସିଆଇ ସଭାପତି ସୌରଭ ଗାଙ୍ଗୁଲି ଓ ସମ୍ପାଦକ ଜୟ ଶାହ ଏକ ଭର୍ଚୁଆଲ ବୈଠକ କରିବେ। ଏଥିରେ ବିରାଟ କୋହଲିଙ୍କ ଦିନିକିଆ ଦଳର ନେତୃତ୍ୱ ଉପରେ ଆଲୋଚନା କରାଯିବ।
କୋହଲିଙ୍କ ହାତରୁ ଦିନିକିଆ ଦଳର ନେତୃତ୍ୱ ଖସିବାର ବିଶେଷ ସମ୍ଭାବନା ରହିଛି। ଏଥର ମଧ୍ୟ ଆଇସିସି ଟୁର୍ନାମେଣ୍ଟ ଜିତିବାରେ ବିଫଳ ହେବାରୁ ଅଧିନାୟକ ଭାବେ ତାଙ୍କ ଭବିଷ୍ୟତ ଏବେ ଦୋଛକିରେ।
ବର୍ତ୍ତମାନ ଟିମ୍ ଇଣ୍ଡିଆ ପାଇଁ କୌଣସି ଦ୍ୱିପାକ୍ଷିକ ଦିନିକିଆ ସିରିଜ୍ ନାହିଁ। ଆଗାମୀ ବର୍ଷ ଖୁବ୍ କମ୍ ଦିନିକଆ ମ୍ୟାଚ୍ ଖେଳାଯିବାର ଅଛି। କାରଣ ୨୦୨୨ରେ ଅଷ୍ଟ୍ରେଲିଆରେ ପୁଣି ଥରେ ଟି୨୦ ବିଶ୍ୱକପ୍ ଖେଳାଯିବ।
