ଗଛ ମ୍ୟୁଜିୟମ କଥା ଶୁଣି ଆଶ୍ଚର୍ଯ୍ୟ ଲାଗୁଥିଲେ ବି ସତ। କେରଳର ଭି.ମହମ୍ମଦ କୋୟା ସୃଷ୍ଟି କରିଛନ୍ତି ଏଭଳି ଗଛ ମ୍ୟୁଜିୟମ। ଏହା ବି ଭି.କେ.ଏମ୍ ବଟାନିକାଲ ଗାର୍ଡେନ’ନାମରେ ଜଣାଶୁଣା। ଏଥିରେ ରହିଛ ୨୫୦ ପ୍ରକାରରୁ ଊର୍ଦ୍ଧ୍ୱ ଗଛ । ଆଶ୍ଚର୍ଯ୍ୟର ବିଷୟ , ମହମ୍ମଦ ବିଭିନ୍ନ ଉପନ୍ୟାସ ଓ କବିତାରେ ଉଲ୍ଲିଖିତ ଗଛର ନାମ ଜାଣି ତାହାକୁ ସଂଗ୍ରହ କରି ଲଗାଇଛନ୍ତି। ଏଣୁ ପ୍ରତ୍ୟେକ ଗଛ ପଛରେ ଏକ କାହାଣୀ ରହିଛି। ତାଙ୍କ ସାଙ୍ଗମାନଙ୍କ ବ୍ୟତୀତ ନର୍ସରି ଓ ଏମ୍ଏସ୍ ସ୍ବାମୀନାଥନ ଗବେଷଣା ସଂସ୍ଥାରୁ ମଞ୍ଜି ଏବଂ ଚାରା ସଂଗ୍ରହ କରି ଲଗାଇଛନ୍ତି। କୋଝିକୋଡେ ଜିଲା କୋଡୁଭ୍ୟାଲି ପଞ୍ଚାୟତର ଆରାମ୍ବ୍ରାରେ ଏହି ମ୍ୟୁଜିୟମ କରିବାକୁ ତାଙ୍କୁ ୨୦ ବର୍ଷ ଲାଗିଯାଇଛି। ୩ ଏକର ଜମିରେ ଏହା ଶୋଭା ପାଉଛି। ଏହା ଭିତରକୁ ପ୍ରବେଶ କରିବା ଲାଗି ସେକ୍ସସ୍ପିୟର ଗେଟ, ଶେର୍ଲକ ହଲ୍ମସ ଗେଟ୍, ଦି ପାଥର ପାଞ୍ଚେଲି ଗେଟ୍ ଏବଂ ତାଙ୍କ ସ୍ତ୍ରୀଙ୍କ ନାମରେ ଏକ ଲୈଲା ଗେଟ୍ ରଖିଛନ୍ତି। ପର୍ଯ୍ୟଟକମାନେ ମ୍ୟୁଜିୟମ ଭିତରକୁ ଗଲେ ମହମ୍ମଦ ସେମାନଙ୍କୁ ପ୍ରତ୍ୟେକ ଗଛର କାହାଣୀ ବୁଝାଇ ଦିଅନ୍ତି ଓ ଏଥିପାଇଁ କୌଣସି ଦେୟ ବି ନିଅନ୍ତିନିି। ମହମ୍ମଦ ସୌଦିରେ ଏକ ଇଲେକ୍ଟ୍ରିକାଲ କମ୍ପାନୀରେ ଚାକିରି କରିଥିତ୍ଲେ। ସେଠାରୁ ଫେରି ସେ ଗହଣା ବ୍ୟବସାୟ କରି ଯାହା ଆୟ କରିଥିଲେ ସେଥିରେ ୨.୫ ଏକର ଜମି କିଣିିଥିଲେ। ପରେ ତାଙ୍କ ମା’ ତାଙ୍କୁ ଅଧ ଏକର ଜମି ଦେବା ପରେ ୧୯୯୯ରେ ପ୍ରଥମେ ଗଛ ଲଗାଇବା ଆରମ୍ଭ କରିଥିଲେ। ଜଙ୍ଗଲ ସୃଷ୍ଟି କରିବା ତଥା ଏହାର ଗୁରୁତ୍ୱ ସମ୍ପର୍କରେ ଲୋକମାନଙ୍କ ସଚେତନ କରିବା ତାଙ୍କର ମୁଖ୍ୟ ଲକ୍ଷ୍ୟ ବୋଲି କହନ୍ତି ୬୦ ବର୍ଷୀୟ ମହମ୍ମଦ।
