ବେଙ୍ଗାଲୁରୁ,୧୨।୪: ଆସନ୍ତା ମେ’୧୦ କର୍ନାଟକ ବିଧାନସଭା ନିର୍ବାଚନ ହେବାକୁ ଥିବା ବେଳେ ମଙ୍ଗଳବାର ଭାଜପା ୧୮୯ ଜଣିଆ ପ୍ରାର୍ଥୀ ତାଲିକା ପ୍ରକାଶ କରିଛି। ଏଥର ୫୨ଜଣ ନୂଆ ମୁହଁଙ୍କୁ ପ୍ରାର୍ଥୀ କରାଯାଇଥିବା ବେଳେ ଏଥିରେ ୮ ଜଣ ମହିଳାଙ୍କୁ ସୁଯୋଗ ଦିଆଯାଇଛି। ଇତି ମଧ୍ୟରେ ଭାଜପାରେ ଚାଲିଥିବା ରାଜନୌତିକ ସଙ୍କଟ ମଧ୍ୟରେ ଦଳର ବରିଷ୍ଠ ନେତା ତଥା କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ବିଏସ ୟେଦୁରପ୍ପା ବୁଧବାର କହିଛନ୍ତି ଯେ, ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ଶେଟ୍ଟାରଙ୍କୁ ୯୯ ପ୍ରତିଶତ ନିଶ୍ଚିତ ନିର୍ବାଚନ ଟିକେଟ୍ ମିଳିବ।
ମଙ୍ଗଳବାର ଭାଜପା ଜାରି କରିଥିବା ପ୍ରଥମ ପ୍ରାର୍ଥୀ ତାଲିକାରେ ଜଗଦୀଶ ଶେଟ୍ଟାରଙ୍କ ନାଁ ନାହିଁ। ଏହାକୁ ନେଇ ଶେଟ୍ଟାର ଦଳକୁ ଚ୍ୟାଲେଞ୍ଜ ଦେଇଛନ୍ତି। ହୁବ୍ବାଲ୍ଲି ଆସନରୁ ୬ ଥର ଜିତିଥିବା ଶେଟ୍ଟାର ୨୦୧୮ ନିର୍ବାଚନରେ କଂଗ୍ରେସର ମହେଶ ନଲଓ୍ବାଡ୍ଙ୍କୁ ୨୧,୦୦୦ରୁ ଊର୍ଦ୍ଧ୍ୱ ଭୋଟରେ ହରାଇଥିଲେ। ମୋ କ୍ୟାରିୟରରେ କେଣସି ଦାଗ ନାହିଁ। ମୋ ବିରୋଧରେ କେଣସି ଅଭିଯୋଗ ମଧ୍ୟ ନାହିଁ। ତଥାପି ମୋତେ ଟିକେଟ କାହିଁକି ମିଳିଲାନାହିଁ ବୋଲି ସେ ପ୍ରଶ୍ନ କରିଛନ୍ତି।
