ପାଟନା,୧୬।୯: ବିହାରରେ ୨ ଛାତ୍ରଙ୍କ ଆକାଉଣ୍ଟକୁ ୯୬୦ କୋଟି ଟଙ୍କା ଆସିଛି। ଏହାକୁ ନେଇ ବ୍ୟାଙ୍କ କର୍ମଚାରୀ ଆଶ୍ଚର୍ଯ୍ୟ ହୋଇଯାଇଥିଲେ। ଖବର ପ୍ରଚାରିତ ହେବା ପରେ ଲୋକେ ବ୍ୟାଙ୍କରେ ଭିଡ଼ ଜମାଇ ନିଜ ନିଜର ଆକାଉଣ୍ଟ ଚେକ୍ କରିବା ଆରମ୍ଭ କରିଥିଲେ। ସ୍ଥାନୀୟ କାଟିହରରେ ଥିବା ଏସବିଆଇର ସିଏସପି କେନ୍ଦ୍ରସ୍ଥିତ ବ୍ୟାଙ୍କରେ ଥିବା ଛାତ୍ର ଅସିତ କୁମାରଙ୍କ ଆକାଉଣ୍ଟରେ ୯୦୦ କୋଟିରୁ ଅଧିକ ଟଙ୍କା ଜମା ହୋଇଥିଲା। ସେହିପରି ଗୁରୁଗୁଚନ୍ଦ୍ରଙ୍କ ଆକାଉଣ୍ଟରେ ୬୦ କୋଟିରୁ ଅଧିକ ଟଙ୍କା ଜମା କରାଯାଇଥିଲା।
ଛାତ୍ର ଦୁହେଁ ଆଜମନଗର ପୋଲିସ ଷ୍ଟେସନ ଅଞ୍ଚଳର ପସ୍ତିଆ ଗାଁରେ ବାସ କରନ୍ତି। ବିହାର ସରକାରଙ୍କ ଦ୍ୱାରା ସ୍କୁଲ ପୋଷାକ ପାଇଁ ପଠାଯାଇଥିବା ଟଙ୍କା ବିଷୟରେ ଜାଣିବା ପାଇଁ ସେମାନେ ବ୍ୟାଙ୍କରେ ପହଞ୍ଚିଥିଲେ।
ବ୍ୟାଙ୍କ ମ୍ୟାନେଜର ଏହା ଜାଣିବା ପରେ ଉଭୟ ଆକାଉଣ୍ଟକୁ ସିଜ୍ କରିଦେଇଥିଲେ। ଏହି ଘଟଣାର ତଦନ୍ତ କରାଯାଉଛି ବୋଲି ସେ କହିଛନ୍ତି। ବ୍ୟାଙ୍କର ବରିଷ୍ଠ ଅଧିକାରୀମାନଙ୍କୁ ଏ ସମ୍ପର୍କରେ ସୂଚନା ଦିଆଯାଇଛି। ଏଭଳି ମାମଲା ଖାଗରିଆରୁ ମଧ୍ୟ ଘଟିିଥିଲା। ଜଣେ ବ୍ୟକ୍ତିଙ୍କ ଆକାଉଣ୍ଟରେ ୫.୫୦ ଲକ୍ଷ ଟଙ୍କା ଜମା ହୋଇଥିଲା। ସମ୍ପୃକ୍ତ ବ୍ୟକ୍ତି ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ସହାୟତା ବୋଲି ଭାବି ଟଙ୍କା ଖର୍ଚ୍ଚ କରିବା ଆରମ୍ଭ କରିଥିଲେ। ଯେତେବେଳେ ବ୍ୟାଙ୍କ ଅଧିକାରୀମାନେ ସେମାନଙ୍କର ଭୁଲ ଜାଣିଲେ, ସେମାନେ ବ୍ୟକ୍ତିଙ୍କୁ ଟଙ୍କା ଫେରସ୍ତ କରିବାକୁ କହିଥିଲେ। କିନ୍ତୁ ବ୍ୟକ୍ତି ଟଙ୍କା ଫେରସ୍ତ କରିବାକୁ ମନା କରିଦେଇଥିଲେ। ଯାହା ପରେ ବ୍ୟାଙ୍କ ଅଧିକାରୀଙ୍କ ଅଭିଯୋଗ ଆଧାରରେ ପୋଲିସ ତାଙ୍କୁ ଗିରଫ କରି ଜେଲକୁ ପଠାଇଥିଲେ।
