ଗୁଆହାଟୀ,୧୮।୫: ପ୍ରାକ୍ ମୌସୁମୀ ବର୍ଷାରେ ଆସାମର ବିଭିନ୍ନ ନଦୀରେ ପ୍ରବଳ ବନ୍ୟା ଆସି ୨୪ ଜିଲା କ୍ଷତିଗ୍ରସ୍ତ ହୋଇଛି। ବନ୍ୟାଜନିତ ମୃତ୍ୟୁସଂଖ୍ୟା ୮ରେ ପହଞ୍ଚିଛି। ବନ୍ୟା ଓ ଭୂସ୍ଖଳନ ଯୋଗୁ ଚାଚରରେ ଅନ୍ୟ ୬ ଜଣ ନିଖୋଜ ଅଛନ୍ତି। ୨ ଲକ୍ଷରୁ ଊର୍ଦ୍ଧ୍ୱ ଲୋକ ବନ୍ୟାରେ ପ୍ରଭାବିତ ହୋଇଥିବା ଆସାମ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏଏସ୍ଡିଏମ୍ଏ) ସୂଚନା ଦେଇଛନ୍ତି। ୨୪ ଜିଲାର ୮୧୧ ଗ୍ରାମରେ ୬,୫୪୦ ଘର ସମ୍ପୂର୍ଣ୍ଣ କିମ୍ବା ଆଂଶିକ ଭାଙ୍ଗିଛି। ୭୨ ରିଲିଫ୍ କ୍ୟାମ୍ପରେ ୩୩,୩୦୦ରୁ ଅଧିକ ଲୋକ ଆଶ୍ରୟ ନେଇଛନ୍ତି।
ଡିମା-ହସାଓ ଜିଲାରେ ଥିବା ହିଲ୍ ଷ୍ଟେଶନ ଅତ୍ୟନ୍ତ ସଙ୍କଟାପନ୍ନ ସ୍ଥିତିରେ ରହିଛି। ପ୍ରବଳ ବର୍ଷା ଯୋଗୁ ଲୁମଡିଙ୍ଗ୍-ବଦରପୁର ସିଙ୍ଗଲ୍ ରେଳଲାଇନ କ୍ଷତିଗ୍ରସ୍ତ ହୋଇଛି। ଏହି ରେଳଲାଇନ ଆସାମ ସମେତ ତ୍ରିପୁରା, ମିଜୋରାମ ଓ ମଣିପୁରକୁ ଦେଶର ଅନ୍ୟ ଭାଗ ସହ ଯୋଡ଼ୁଥିବାବେଳେ ବନ୍ୟା ଯୋଗୁ ୪ ଦିନ ହେଲା ରେଳ ଚଳାଚଳ ବନ୍ଦ ରହିଛି। ଫଳରେ ଅତ୍ୟାବଶ୍ୟକ ସାମଗ୍ରୀ ଦର ବୃଦ୍ଧି ପାଇଛି। ପ୍ରବଳ ବର୍ଷା ଓ ଭୂସ୍ଖଳନ ଯୋଗୁ ହାଫ୍ଲଙ୍ଗ ଷ୍ଟେଶନ ପାଣିରେ ସମ୍ପୂର୍ଣ୍ଣ ବୁଡ଼ିଯାଇଛି। ପ୍ରବଳ ଜଳସ୍ରୋତରେ ଉକ୍ତ ଷ୍ଟେଶନରେ ଅଟକିଥିବା ଏକ ଟ୍ରେନ୍ର କେତେକ ବଗି ଓଲଟି ପଡ଼ିଛି।
