ରାୟପୁର, ୩୧।୭: ଛତିଶଗଡ଼ ଦୁର୍ଗ ଜିଲାର ଏକ ଛେଳି ଏହାର ଅନନ୍ୟ କାରଣ ଲାଗି ଏବେ ବେଶ୍ ଚର୍ଚ୍ଚାରେ ରହିଛି। ଏହି ଛେଳିର ବିଶେଷତା କାହାକୁ ମଧ୍ୟ ଆଶ୍ଚର୍ଯ୍ୟ ଲାଗିବ। ଏହି ଛେଳିର ବିଶେଷତ୍ୱ ହେଉଛି ଏହାର ଲମ୍ବ ୮ ଫୁଟ୍ ଏବଂ ଓଜନ ୧୬୦ କିଲୋଗ୍ରାମ। ଶନିବାର ଇଦ୍ ପର୍ବ ପଡ଼ୁଥିବାରୁ ଏହି ଛେଳିକୁ କୁର୍ବାନ ପାଇଁ ପଞ୍ଜାବରୁ ଏଠାକୁ ଅଣାଯାଇଛି। ଲମ୍ବ, ଉଚ୍ଚତା ଓ ଓଜନ ଲାଗି ସାଧାରଣ ଛେଳିଠାରୁ ଭିନ୍ନ ଏହି ସ୍ବତନ୍ତ୍ର ଧରଣର ଛେଳିକୁ ଦେଖିବାକୁ ଏବେ ଲୋକଙ୍କ ଭିଡ଼ ଜମୁଛି।
ତୋତାପାରୀ ଓ ଜାମନାପାରୀ ପ୍ରଜାତିର ଏହି ଛେଳିର ମାଲିକ ହେଉଛନ୍ତି ଭିଲାଇ ଫରିଦ୍ ନଗରର ଆଇ ଅହମ୍ମଦ ଲାଲ ବାହାଦୂର। ସେ ଏହି ଛେଳିକୁ ୧ ଲକ୍ଷ ୫୩ ହଜାର ଟଙ୍କା ଦେଇ କିଣିଛନ୍ତି। ରିପୋର୍ଟ ମୁତାବକ ଗୋଟିଏ ସପ୍ତାହ ତଳେ ଲାଲ୍ ବାହାଦୂର ଏହି ଛେଳିଟିକୁ ପଞ୍ଜାବରୁ କିଣି ଏଠାକୁ ଆଣିଥିଲେ। ପଞ୍ଜାବରୁ ଭିଲାଇକୁ ଆଣିବା ଲାଗି ତାଙ୍କୁ ୨୩ ହଜାର ଟଙ୍କା ଖର୍ଚ୍ଚ କରିବାକୁ ପଡ଼ିଥିଲା। ଛେଳିର ଲମ୍ବ ୮ ଫୁଟ୍ ହୋଇଥିବାବେଳେ ସେ ବେକକୁ ୧୦ ଫୁଟ୍ ଉଚ୍ଚତା ପର୍ଯ୍ୟନ୍ତ ଲମ୍ବାଇ ପାରେ। ଏହି ଛେଳିର ଖାଦ୍ୟକୁ ନେଇ ଲାଲ୍ ବାହାଦୂର କହିଛନ୍ତି, ‘ଛେଳିଟି ଫଳ ଖାଇବାକୁ ବହୁତ ପସନ୍ଦ କରେ। ଏପରିକି ତାଜା ପନିପରିବାକୁ ବହୁତ ଉତ୍ସାହର ସହିତ ଚୋବାଇ ଖାଇଥାଏ।’ ଇଦ୍ରେ ବଳି ପାଇଁ ଏହି ଛେଳିକୁ ଆଣିଥିବା ସେ କହିଛନ୍ତି।
