ନୂଆଦିଲ୍ଲୀ,୧୨।୨: ଦୀର୍ଘ ପ୍ରତୀକ୍ଷାର ଅନ୍ତ ଘଟାଇ ଶେଷରେ ଟି୨୦ ବିଶ୍ୱକପରେ ପଦାର୍ପଣ କରିଛନ୍ତି ୱିକେଟ କିପର ବ୍ୟାଟର ସଞ୍ଜୁ ସାମସନ। ଗୁରୁବାର ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ନାମିବିଆ ବିପକ୍ଷ ମ୍ୟାଚରେ ସଞ୍ଜୁଙ୍କୁ ଭାରତୀୟ ଚୂଡ଼ାନ୍ତ ଏକାଦଶରେ ସୁଯୋଗ ମିଳିଛି। ପେଟରେ ସମସ୍ୟା ଯୋଗୁଁ ଅଭିଷେକ ଶର୍ମା ବାଦ୍ ପଡ଼ିବା ପରେ ସଞ୍ଜୁଙ୍କୁ ଏହି ସୁଯୋଗ ମିଳିଥିଲା, ଯାହାର ସେ ଭରପୂର ଫାଇଦା ଉଠାଇଛନ୍ତି।
ସଞ୍ଜୁ ସାମସନ ମୈଦାନକୁ ଓହ୍ଲାଇବା ମାତ୍ରେ ନିଜର ଆକ୍ରମଣାତ୍ମକ ରୂପ ଦେଖାଇଥିଲେ। ସେ ମାତ୍ର ୮ଟି ବଲରୁ ୨୨ ରନ ସଂଗ୍ରହ କରିଥିଲେ, ଯେଉଁଥିରେ ସମସ୍ତ ରନ କେବଳ ବାଉଣ୍ଡ୍ରି ଜରିଆରେ ଆସିଥିଲା। ଏଥିରେ ୩ଟି ଛକା ଓ ୧ଟି ଚୌକା ସାମିଲ ଥିଲା।
ପ୍ରଥମ ଓଭରରେ ରୁବେନ ଟ୍ରମ୍ପେଲମ୍ୟାନଙ୍କୁ ଏକ ବିଶାଳ ଛକା ମାରି ନିଜର ବିଶ୍ୱକପ୍ ଖାତା ଖୋଲିଥିଲେ। ଦ୍ୱିତୀୟ ଓଭରରେ ବେନ ସିକୋଙ୍ଗୋଙ୍କୁ ଲଗାତାର ଦୁଇଟି ଛକା ଓ ଗୋଟିଏ ଚୌକା ମାରିବା ପରେ ବଡ଼ ସଟ୍ ଖେଳିବା ପ୍ରୟାସରେ ସେ ଆଉଟ୍ ହୋଇଥିଲେ।
ସଞ୍ଜୁ ସାମସନ ନିଜର ପ୍ରଥମ ବିଶ୍ୱକପ ମ୍ୟାଚ୍ ଖେଳିବା ବେଳକୁ ତାଙ୍କ ବୟସ ୩୧ ବର୍ଷ ୯୩ ଦିନ ହୋଇଛି। ଏଥିସହ ସେ ଏକ ସ୍ୱତନ୍ତ୍ର ରେକର୍ଡର ଅଧିକାରୀ ହୋଇଛନ୍ତି। ଅମିତ ମିଶ୍ରଙ୍କ ପରେ ସେ ଦ୍ୱିତୀୟ ବୟସ୍କ ଭାରତୀୟ ଖେଳାଳି ଭାବେ ବିଶ୍ୱକପରେ ପଦାର୍ପଣ କରିଛନ୍ତି। ସଞ୍ଜୁ ୨୦୧୫ରୁ ଆନ୍ତର୍ଜାତୀୟ ଟି୨୦ ଖେଳୁଥିଲେ ମଧ୍ୟ ଏହା ତାଙ୍କ କ୍ୟାରିୟରର ପ୍ରଥମ ବିଶ୍ୱକପ୍ ମ୍ୟାଚ୍।
ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବଙ୍କ ସୂଚନା ଅନୁଯାୟୀ, ଅଭିଷେକ ଶର୍ମା ଏବେ ମଧ୍ୟ ଭାଇରାଲ୍ ଫିଭର୍ ଏବଂ ପେଟ ରୋଗରେ ପୀଡ଼ିତ ଅଛନ୍ତି। ସେ ଆଗାମୀ ଗୋଟିଏ କିମ୍ବା ଦୁଇଟି ମ୍ୟାଚ୍ ମିସ୍ କରିପାରନ୍ତି। ଏଭଳି ସ୍ଥିତିରେ ସଞ୍ଜୁଙ୍କ ଏହି କ୍ଷୁଦ୍ର କିନ୍ତୁ ପ୍ରଭାବଶାଳୀ ଇନିଂସ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି।
