ଭୁବନେଶ୍ୱର,୬।୭(ସତ୍ୟଜିତ୍ ରାଉତ)ଦେଶର ବଡ଼ ଶିଳ୍ପପତି, ଖେଳାଳି ଓ ଅଭିନେତାଙ୍କ ଫଟୋ ବ୍ୟବହାର କରି ନିବେଶ ଆଳରେ ସାଧାରଣ ଲୋକଙ୍କୁ ଠକେଇ କରାଯାଉଛି। ଏହି ମାମଲାର ତଦନ୍ତ କରୁଥିବାବେଳେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ବିଭିନ୍ନ ଠକେଇ ଆପ୍ର ସନ୍ଧାନ ପାଇଛି। ତେବେ ଏସବୁ ଆପ୍ର ଲିଙ୍କ୍ରେ ଥିବା ୧୪ଟି ବ୍ୟାଙ୍କ ଆକାଉଣ୍ଟରେ ଥିବା ପ୍ରାୟ ୭୫ ଲକ୍ଷ ଟଙ୍କା ଫ୍ରିଜ୍ କରିଛି। ଏନେଇ ବୁଧବାର ଇଓଡବ୍ଲ୍ୟୁ ପକ୍ଷରୁ ସୂଚନା ଦିଆଯାଇଛି। ଉକ୍ତ ଆପ୍ଗୁଡ଼ିକ ମଧ୍ୟରେ ଡାଇସ୍, କୁଇକ୍ରମି, ଫ୍ଲାଇ ଆଭିଏଟର୍, ଉୟି ଅନ୍ଲାଇନ୍ପ୍ରୋ ଥ୍ରୀ, ଏମ୍ଭିପି ଟ୍ରେଡର୍, ଏଫ୍ଟି୧୧, ୟୁଏନ୍ଓ, ଫୋରେକ୍ସଦାନା, ଲାଇଭ୍ ୨୨ କ୍ୟାସ୍, ଆଭିଏଟର୍ ଏକ୍ସ, ସିଟି୫, ହୋମର୍ ଆଲେକ୍ସାଣ୍ଡର୍ ଆଦି ରହିଛି। ପୂର୍ବରୁ (ଜଏନ୍ ଟ୍ରେଡ୍ ଫାଇନାନ୍ସିଆଲ ଗ୍ରୋଥ୍) ଆପ୍ର ୫ଟି ଆକାଉଣ୍ଟରେ ଥିବା ୧.୨୨ କୋଟି ଟଙ୍କାକୁ ଇଓଡବ୍ଲ୍ୟୁ ପକ୍ଷରୁ ଫ୍ରିଜ୍ କରାଯାଇଛି। ଏପରିକି ଫ୍ରିଜ୍ ହୋଇଥିବା ଆକାଉଣ୍ଟରେ ୧୦୦୦ କୋଟିରୁ ଊର୍ଦ୍ଧ୍ୱ ଟଙ୍କା କାରବାର ହୋଇଥିବା ଜଣାପଡିଛି।
ସୂଚନା ଅନୁଯାୟୀ, ଏସବୁ ଫେକ୍ ଆପ୍କୁ ୧.୫୬ କୋଟିରୁ ଊର୍ଦ୍ଧ୍ୱ ଲୋକ ଡାଉନ୍ଲୋଡ୍ କରିଛନ୍ତି। ଏସବୁ ଆପ୍ର ମାଷ୍ଟରମାଇଣ୍ଡ୍ ୟୁଏଇ, ଦୁବାଇରେ ରହି ଏଭଳି କାରବାର କରୁଛନ୍ତି। ତେବେ ଅମିତାଭ ବଚ୍ଚନ୍, ମୁକେଶ ଅମ୍ବାନି, ରତନ୍ ଟାଟା, ସଚିନ ତେନ୍ଦୁଲକର, ୟୁଟ୍ୟୁବର୍ ଟେକ୍ନିକାଲ ଗୁରୁଜୀ ପ୍ରମୁଖଙ୍କ ଫଟୋକୁ ବିଜ୍ଞାପନ ରୂପେ ବ୍ୟବହାର କରି ଲୋକଙ୍କୁ ଫସାଯାଉଛି। ନିବେଶ ପରେ ବହୁଗୁଣ ଲାଭ ଅର୍ଥାତ୍ ୫ ଟଙ୍କାରୁ ୧୨୫ ଟଙ୍କା, ୨୦ ଟଙ୍କାରୁ ୧୨୮୫ ଟଙ୍କା ମିଳିବ ବୋଲି କୁହାଯାଇ ଫସାଯାଉଛି। ଏହି ଆପ୍ରେ ୟୁପିଆଇ ନମ୍ବର ଦ୍ୱାରା ଟଙ୍କା ଡିପୋଜିଟ୍ ହୁଏ। ତେବେ ଏଥିସହ ଲିଙ୍କ୍ ହୋଇଥିବା ବ୍ୟାଙ୍କ ଆକାଉଣ୍ଟଗୁଡ଼ିକ ବହୁତ ସେଲ୍ କମ୍ପାନୀ ଦ୍ୱାରା ପରିଚାଳନା କରାଯାଉଛି। ପରେ ଏହି ଟଙ୍କାକୁ କ୍ରିପ୍ଟୋ ଟ୍ରେଡିଂ ଦ୍ୱାରା ଭାରତ ବାହାରକୁ ନିଆଯାଉଛି। ଇଓଡବ୍ଲ୍ୟୁ ପକ୍ଷରୁ ଏହି ମାମଲା(ନଂ.୧୯/୨୦୨୩)ର ଅଧିକ ତଦନ୍ତ କରୁଛି। ଏଭଳି ଲୋଭରେ ପଡ଼ି ସାଇବର ଠକଙ୍କ ଜାଲରେ ନ ଫସିବାକୁ ଇଓଡବ୍ଲ୍ୟୁ ପକ୍ଷରୁ ସଚେତନ କରାଯାଇଛି।
