ବେଙ୍ଗାଲୁରୁ,୯।୮: ଚଳିତ ବର୍ଷ ବନ୍ୟା ଓ ବର୍ଷା କାରଣରୁ କର୍ନାଟକରେ ୨ ମାସ ମଧ୍ୟରେ ୭୩ ଜଣଙ୍କ ପ୍ରାଣହାନି ଘଟିଛି। ରାଜ୍ୟରେ ବନ୍ୟା ପ୍ରଭାବିତ ୭,୩୮୭ ଜଣଙ୍କୁ ସ୍ଥାନାନ୍ତର କରାଯାଇଛି। କ୍ଷତିଗ୍ରସ୍ତ ଲୋକଙ୍କୁ ଆବଶ୍ୟକୀୟ ଖାଦ୍ୟପେୟ ଯୋଗାଇ ଦେବା ପାଇଁ ରାଜ୍ୟ ସରକାରଙ୍କ ପକ୍ଷରୁ ୭୫ଟି ରିଲିଫ୍ କ୍ୟାମ୍ପ ତିଆରି କରାଯାଇଥିବା ରାଜ୍ୟ ରେଭିନ୍ୟୁ ମନ୍ତ୍ରୀ ଆର୍. ଅଶୋକା କହିଛନ୍ତି।
୧୪ ଜିଲାରେ ଥିବା ୧୬୧ ଗ୍ରାମ ବନ୍ୟାରେ କ୍ଷତିଗ୍ରସ୍ତ ହୋଇଛି। ଏହାଦ୍ୱାରା ପାଖପାଖି ୨୧,୭୨୭ ଜଣଙ୍କ ଜୀବନ ପ୍ରଭାବିତ ହୋଇଛି। ୭୩ ଜଣ ମୃତକଙ୍କ ମଧ୍ୟରୁ ଘଡ଼ଘଡ଼ିରେ ୧୫ଜଣ, ଗଛପଡ଼ି ୫, ଘର ଭୁଶୁଡ଼ି ୧୯ ଓ ବନ୍ୟାଜଳରେ ଭାସି ୨୪ ଜଣଙ୍କ ମୃତ୍ୟୁ ହୋଇଥିବା ମନ୍ତ୍ରୀ କହିଛନ୍ତି। ଉକ୍ତ ଘଟଣା ଜୁନ୍ ୧ରୁ ଅଗଷ୍ଟ ୭ ମଧ୍ୟରେ ଘଟିଥିବା ବେଳେ ୨,୯୪୯ ଘର ସମ୍ପୂର୍ଣ୍ଣ ଭାଙ୍ଗିଯାଇଛି। ବନ୍ୟା ଯୋଗୁ ରାଜ୍ୟରେ ଫସଲ ଜମି, ରାସ୍ତା ନଷ୍ଟ ହୋଇଥିବା ଜଣାପଡ଼ିଛି। ମୃତକମାନଙ୍କୁ ରାଜ୍ୟ ସରକାରଙ୍କ ତରଫରୁ ୫ ଲକ୍ଷ ଏବଂ କେନ୍ଦ୍ର ସରକାରଙ୍କ ତରଫରୁ ୪ ଲକ୍ଷ ସହାୟତା ରାଶି ପ୍ରଦାନ କରାଯିବ ବୋଲି ମନ୍ତ୍ରୀ କହିଛନ୍ତି।
