ଭୁବନେଶ୍ୱର, ୬।୧୧(ବ୍ୟୁରୋ): ଆସନ୍ତା ଶିକ୍ଷାବର୍ଷରୁ ସମସ୍ତ ସରକାରୀ ସ୍କୁଲରେ ଷଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଏକକ ପରୀକ୍ଷା ଓ ଏକକ ପ୍ରଶ୍ନପତ୍ର ବ୍ୟବସ୍ଥା ଲାଗୁ ହେବ। ଏହି ପ୍ରଶ୍ନପତ୍ର ପ୍ରସ୍ତୁତ କରିବ ଏସ୍ସିଇଆର୍ଟି। ସେହିଭଳି ଅନ୍ୟ ସ୍କୁଲ ଶିକ୍ଷକଙ୍କ ଦ୍ୱାରା ଖାତା ଦେଖାହେବ। ଏଥିସହ ଏକ ସମୟରେ ସବୁ ପିଲାଙ୍କ ରେଜଲ୍ଟ ପ୍ରକାଶ କରିବାକୁ ମଧ୍ୟ ବିଦ୍ୟାଳୟ ଓ ଗଣଶିକ୍ଷା ବିଭାଗ ନିଷ୍ପତ୍ତି ନେଇଛି। ଏହି ନୂଆ ବ୍ୟବସ୍ଥା ଦ୍ୱାରା ଛାତ୍ରୀଛାତ୍ରଙ୍କ ଦକ୍ଷତା ଜଣାପଡ଼ିବ। ଏହାବ୍ୟତୀତ କିଛି ସ୍କୁଲରେ ମାର୍କ ପ୍ରଦାନରେ ପ୍ରିୟାପ୍ରୀତିତୋଷଣ ହେଉଥିବା ନେଇ ଯେଉଁ ଅଭିଯୋଗ ହେଉଥିଲା ତାହାର ସମାଧାନ ହେବ ବୋଲି ବିଭାଗ ଆଶା ରଖିଛି।
ସର୍ବଭାରତୀୟ ସ୍ତରରେ ସିବିଏସ୍ଇ ଓ ରାଜ୍ୟରେ ଶିକ୍ଷାବିକାଶ ଅଧୀନରେ ପରିଚାଳିତ ସମସ୍ତ ସ୍କୁଲରେ ଏକକ ପ୍ରଶ୍ନପତ୍ର ବ୍ୟବସ୍ଥା ରହିଛି। ମାତ୍ର ଓଡ଼ିଶାର ସରକାରୀ ସ୍କୁଲଗୁଡ଼ିକରେ ଷଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ସବୁ ସ୍କୁଲ ଲାଗି ଏକକ ପ୍ରଶ୍ନପତ୍ର ବ୍ୟବସ୍ଥା ନାହିଁ। ବାର୍ଷିକ ପରୀକ୍ଷାର ପ୍ରଶ୍ନପତ୍ର ଏକ ପ୍ରକାର ଥିବାବେଳେ ଷାଣ୍ମାସିକ ପରୀକ୍ଷା ପ୍ରଶ୍ନପତ୍ର ଏକକ ନାହିଁ। ସ୍କୁଲଗୁଡ଼ିକର ଶିକ୍ଷକମାନେ ପିଲାଙ୍କ ପାଇଁ ପ୍ରଶ୍ନପତ୍ର ତିଆରି କରିବା ସହ ନିଜେ ମଧ୍ୟ ଖାତା ଦେଖୁଛନ୍ତି। ଯଦିଓ ସ୍କୁଲୱାରି ପ୍ରଶ୍ନପତ୍ର ପ୍ରସ୍ତୁତି ଲାଗି କିଛି ନିର୍ଦ୍ଦିଷ୍ଟ ନିୟମ ରହିଛି ମାତ୍ର ରାଜ୍ୟରେ ଥିବା ୬୫,୨୭୯ଟି ସ୍କୁଲରେ ଷଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପ୍ରଶ୍ନପତ୍ର ଭିନ୍ନ ଭିନ୍ନ ରହୁଛି। ତେଣୁ ସ୍କୁଲ୍ ସ୍ତରରେ ପାଠପଢ଼ା ଓ ପିଲାଙ୍କ ଦକ୍ଷତାର ତୁଳନାତ୍ମକ ଚିତ୍ର ସ୍ପଷ୍ଟ ହୋଇପାରୁନାହିଁ। ଏକକ ପ୍ରଶ୍ନପତ୍ର ବ୍ୟବସ୍ଥା କାର୍ଯ୍ୟକାରୀ ହେବା ପରେ କେଉଁ ସ୍କୁଲରେ ପାଠପଢ଼ା କେତେ ଉନ୍ନତ ତାହା ମଧ୍ୟ ଜଣାପଡ଼ିବ। ଏହାଦ୍ୱାରା ଦଶମ ପରୀକ୍ଷାରେ ପାସ୍ହାର ବୃଦ୍ଧି ପାଇବା ସହ ଛାତ୍ରୀଛାତ୍ରଙ୍କ ମଧ୍ୟରେ ଥିବା ଦକ୍ଷତା ମଧ୍ୟ ସ୍ପଷ୍ଟ ହୋଇପାରିବ ବୋଲି ଗଣଶିକ୍ଷା ବିଭାଗ କହିଛି।
ବିଭାଗର ସୂଚନା ଅନୁଯାୟୀ, ଖୁବ୍ଶୀଘ୍ର ଉଭୟ ଏକକ ପ୍ରଶ୍ନପତ୍ର ଓ ମୂଲ୍ୟାଙ୍କନ ବ୍ୟବସ୍ଥାରେ ପରିବର୍ତ୍ତନ କରାଯିବ। ଆସନ୍ତା ଶିକ୍ଷା ବର୍ଷରୁ ଉଭୟ ଷାଣ୍ମାସିକ ଓ ବାର୍ଷିକ ପରୀକ୍ଷା ପାଇଁ ଏକକ ପ୍ରଶ୍ନପତ୍ର ରହିବ। ସେହିପରି ଏହି ନୂତନ ବ୍ୟବସ୍ଥାରେ ଦଶମ ବୋର୍ଡ ପରୀକ୍ଷା ପରି ମୂଲ୍ୟାଙ୍କନ କରାଯିବ। ନିଜ ସ୍କୁଲର ପରୀକ୍ଷା ଖାତା ସେହି ସ୍କୁଲର ଶିକ୍ଷକମାନେ ଦେଖିପାରିବେ ନାହିଁ। ଏନେଇ ଏକ ଜୋନ୍ ଗଠନ ହେବ, ଯେଉଁଥିରେ ଜିଲାୱାରି ପରୀକ୍ଷାକେନ୍ଦ୍ର ଚୟନ କରାଯିବ। ସେହି ଜୋନ୍କେନ୍ଦ୍ରରେ ଜିଲାର ସବୁ ଉତ୍ତରଖାତା ଦାଖଲ ହେବା ପରେ ମନୋନୀତ ଶିକ୍ଷକମାନେ ମୂଲ୍ୟାୟନ କରିବେ। କୌଣସି ପିଲାଙ୍କ ଖାତା ମୂଲ୍ୟାୟନରେ ତ୍ରୁଟି ରହିଲେ ସମ୍ପୃକ୍ତ ସ୍କୁଲର ପ୍ରଧାନଶିକ୍ଷକ ଏ ସମ୍ପର୍କରେ ବ୍ଲକ ଶିକ୍ଷାଧିକାରୀଙ୍କୁ ଅବଗତ କରିବେ। ପରେ ସେହି ଉତ୍ତର ଖାତାକୁ ଦେଖିଥିବା ଶିକ୍ଷକ ଓ ଅଭିଯୋଗ ହୋଇଥିବା ସ୍କୁଲର ସମ୍ପୃକ୍ତ ବିଷୟର ଶିକ୍ଷକଙ୍କ ଉପସ୍ଥିତିରେ ପୁଣି ମୂଲ୍ୟାୟନ କରାଯିବ ବୋଲି ନିଷ୍ପତ୍ତି ହୋଇଛି। ସେହିଭଳି ଏକାଡେମିକ କ୍ୟାଲେଣ୍ଡର ଅନୁସାରେ ଧାର୍ଯ୍ୟ ସମୟରେ ସବୁ ସ୍କୁଲର ପାଠପଢ଼ା ଶେଷ ହେବା ସହ ବାର୍ଷିକ ପରୀକ୍ଷା ପୂର୍ବରୁ ଯେପରି ରିଭିଜନ ବ୍ୟବସ୍ଥା କରାଯିବ ସେଥିଲାଗି ଜିଲା ଶିକ୍ଷାଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି।
