ଭୋପାଳ,୧୩।୩: ମଧ୍ୟପ୍ରଦେଶର ରାଜଧାନୀ ଭୋପାଳରେ ଗୁଇନ୍ଦା ଏଜେନ୍ସି ୬ ଜଣ ଆତଙ୍କବାଦୀଙ୍କୁ ଗିରଫ କରିଛି। ସେମାନଙ୍କଠାରୁ ବିପୁଳ ପରିମାଣର ବିସ୍ଫୋରକ ସାମଗ୍ରୀ ମଧ୍ୟ ଉଦ୍ଧାର କରାଯାଇଛି। ଆତଙ୍କବାଦୀମାନେ ସହରର ଆଇଶବାଗ ପୋଲିସ ଷ୍ଟେଶନଠାରୁ ୨୦୦ ମିଟର ଦୂରରେ ଏକ ଭଡା ଘର ନେଇ ରହୁଥିଲେ। ଶନିବାର ରାତିରେ ଗୁଇନ୍ଦା ଏଜେନ୍ସି ଅପରେସନ କରି ୬ ଜଣ ଆତଙ୍କବାଦୀଙ୍କୁ ଗିରଫ କରିଛି। ସୂଚନାନୁସାରେ, ଗୁଇନ୍ଦା ବିଭାଗ ଘରୁ ଲାପଟପ, ଅସ୍ତ୍ରଶସ୍ତ୍ର ଏବଂ ବହୁ ପରିମାଣର ବିସ୍ଫୋରକ ସାମଗ୍ରୀ ଜବତ କରିଛି। ଏହା ବ୍ୟତୀତ କରୋନ୍ଦ ଅଞ୍ଚଳରେ ମଧ୍ୟ ଚଢାଉ ଜାରି ରହିଛି। ଏଜେନ୍ସି ଘରକୁ ସିଲ କରି ଅଜ୍ଞାତ ସ୍ଥାନରେ ଆତଙ୍କବାଦୀଙ୍କୁ ପଚରାଉଚରା କରୁଛି।
