ଭୁବନେଶ୍ୱର,୧୮।୨: ପରିବାର ପ୍ରତିପୋଷଣ ପାଇଁ ସୁଦୂର ଥାଇଲ୍ୟାଣ୍ଡ ଯାଇ ନିର୍ଯାତନାର ଶିକାର ହେଲେ ଓଡ଼ିଆ ଶ୍ରମିକ। କେନ୍ଦ୍ରାପଡ଼ା ଏବଂ ଭଦ୍ରକ ଜିଲାର ୬ ଜଣ ଶ୍ରମିକ ଏବେ ସେଠାରେ ଫସିଥିବା ଅଭିଯୋଗ ହୋଇଛି। ଏକ ପ୍ଲାଏଉଡ୍ କାରଖାନାରେ କାମ କରୁଥିବା ଏହି ଶ୍ରମିକମାନେ ଏବେ ଭୋକ ଉପାସରେ ବନ୍ଦୀ ଭାବେ ଜୀବନ କାଟୁଛନ୍ତି। ସେମାନଙ୍କୁ ସୁରକ୍ଷିତ ଭାବେ ଓଡ଼ିଶା ଫେରାଇ ଆଣିବାକୁ ରାଜ୍ୟ ସରକାରଙ୍କୁ ଭିଡିଓ ବାର୍ତ୍ତା ଜରିଆରେ ଆକୁଳ ନିବେଦନ କରିଛନ୍ତି।
ଗତ ବର୍ଷ ଅଗଷ୍ଟ ମାସରେ ମାସିକ ୨୫,୦୦୦ ଟଙ୍କା ଦରମା ସହ ରହିବା ଓ ଖାଇବା ସୁବିଧା ମିଳିବାର ପ୍ରତିଶ୍ରୁତି ପାଇ ଏମାନେ ଥାଇଲ୍ୟାଣ୍ଡ ଯାଇଥିଲେ। ତେବେ ଗତ ୪ ମାସ ହେବ ସେମାନଙ୍କୁ କୌଣସି ମଜୁରୀ ଦିଆଯାଇ ନାହିଁ। ମାଲିକ ସେମାନଙ୍କ ପାସପୋର୍ଟ ଛଡ଼ାଇ ରଖିଥିବା ବେଳେ ବକେୟା ଦରମା ମାଗିଲେ ପୋଲିସ ଦ୍ୱାରା ଗିରଫ କରାଇବାର ଧମକ ଦେଉଛନ୍ତି।
ଗତ ୪ ଦିନ ହେବ ସେମାନଙ୍କୁ ଖାଦ୍ୟ ଯୋଗାଣ ବନ୍ଦ କରିଦିଆଯାଇଛି। ବାହାର ଦୁନିଆ ସହ ଯୋଗାଯୋଗ ବିଚ୍ଛିନ୍ନ କରିବା ପାଇଁ ୱାଇଫାଇ (WiFi) ସଂଯୋଗ କାଟି ଦିଆଯାଇଥିଲେ ହେଁ, ଶ୍ରମିକମାନେ ଅନ୍ୟମାନଙ୍କଠାରୁ ଇଣ୍ଟରନେଟ୍ ସାହାଯ୍ୟ ନେଇ ଏହି ଭିଡିଓ ସୋସିଆଲ ମିଡିଆରେ ପୋଷ୍ଟ କରିଛନ୍ତି।
ଏହି ଶ୍ରମିକମାନେ ହେଲେ କେନ୍ଦ୍ରାପଡ଼ା ଜିଲା ରାଜକନିକା ଅଞ୍ଚଳର ଯଶୋବନ୍ତ ସାହୁ, ଜୟନ୍ତ ମଲିକ, ପ୍ରଶାନ୍ତ ରାଉତ, ହେମନ୍ତ କୁମାର ବେହେରା, ବିଜୟ ସ୍ୱାଇଁ ଏବଂ ଭଦ୍ରକ ଚାନ୍ଦବାଲି ଅଞ୍ଚଳର ମନୋରଞ୍ଜନ ସାହୁ।
ସୂଚନାଯୋଗ୍ୟ ଯେ, ୨୦୨୪ ମସିହାରେ ମଧ୍ୟ କେନ୍ଦ୍ରାପଡ଼ା ଜିଲ୍ଲାର ୧୨ ଜଣ ଶ୍ରମିକ ଥାଇଲ୍ୟାଣ୍ଡର ଏକ ପ୍ଲାଏଉଡ୍ କାରଖାନାରେ ଏଭଳି ନିର୍ଯାତନାର ଶିକାର ହୋଇଥିଲେ।
