ନୂଆଦିଲ୍ଲୀ,୩୦ା୧୧: ଗତ ୫ ବର୍ଷରେ ୬ ଲକ୍ଷରୁ ଊର୍ଦ୍ଧ୍ୱ ଭାରତୀୟ ସେମାନଙ୍କ ନାଗରିକତ୍ୱ ତ୍ୟାଗ କରିଛନ୍ତି। ଏ ନେଇ ସ୍ବରାଷ୍ଟ୍ର ରାଷ୍ଟ୍ର ମନ୍ତ୍ରୀ ନିତ୍ୟାନନ୍ଦ ରାଏ ମଙ୍ଗଳବାର ଲୋକ ସଭାରେ ସୂଚନା ଦେଇଛନ୍ତି।ଏହାକୁ ହିସାବକୁ କଲେ ଗତ ୫ ବର୍ଷ ମଧ୍ୟରେ ଦୈନିକ ହାରାହାରି ୩୨୮ ଜଣ ଭାରତୀୟ ନାଗରିକତ୍ୱ ଛାଡିଛନ୍ତି।
ବହିର୍ବ୍ୟାପାର ମନ୍ତ୍ରଣାଳୟରେ ଉପଲବ୍ଧ ତଥ୍ୟ ଅନୁସାରେ, ୧ କୋଟି ୩୩ ଲକ୍ଷ ୮୩ ହଜାର ୭୧୮ ଜଣ ଭାରତୀୟ ବିଦେଶରେ ବାସ କରୁଛନ୍ତି। ୨୦୧୭ରେ ୧ ଲକ୍ଷ ୩୩ ହଜାର ୪୯ ଜଣ, ୨୦୧୮ରେ ୧ ଲକ୍ଷ ୩୪ ହଜାର ୫୬୧, ୨୦୧୯ରେ ୧ ଲକ୍ଷ ୪୪ ହଜାର ୦୧୭, ୨୦୨୦ରେ ୮୫ ହଜାର ୨୪୮ ଏବଂ ୨୦୨୧ ସେପ୍ଟେମ୍ବର ୩୦ ସୁଦ୍ଧା ୧ ଲକ୍ଷ ୧୧ ହଜାର ୨୮୭ ଜଣ ଭାରତୀୟ ନାଗରିକତ୍ୱ ଛାଡ଼ିଛନ୍ତି। ସେହିପରି ଗତ ୫ ବର୍ଷରେ ୪,୧୭୭ ଜଣ ଭାରତୀୟ ନାଗରିକତ୍ୱ ପାଇଛନ୍ତି। ୧୦,୬୪୫ ଜଣ ବିଦେଶୀ ଏଥିପାଇଁ ଆବେଦନ କରିଥିଲେ। ୨୦୧୬ରେ ୧,୧୦୬ ଜଣ, ୨୦୧୭ରେ ୮୧୭, ୨୦୧୮ରେ ୬୨୮, ୨୦୧୯ରେ ୯୮୭ ଏବଂ ୨୦୨୦ରେ ୬୩୯ ଜଣଙ୍କୁ ଭାରତର ନାଗରିକତ୍ୱ ମିଳିଥିବା ସେ କହିଛନ୍ତି।
