ଫୁଲବାଣୀ ଅଫିସ,୫।୨: କିଛି ଦିନର ବ୍ୟବଧାନ ପରେ ପୁଣି କନ୍ଧମାଳରେ ପ୍ରବଳ ଶୀତ ଅନୁଭୂତ ହେଉଛି। ଜିଲାର ଫୁଲବାଣୀରେ ରବିବାର ସର୍ବନିମ୍ନ ତାପମାତ୍ରା ୬ ଡିଗ୍ରୀରେ ପହଞ୍ଚିଛି। ଗତ ୨ ଦିନ ହେଲା ତାପମାତ୍ରା ୫.୫ ଡିଗ୍ରୀ ରହିଥିଲା। ହଠତ୍ ପାରଦ ଖସିବା ଯୋଗୁ ଅଞ୍ଚଳରେ ଅସହ୍ୟ ଶୀତ ଅନୁଭୂତ ହେଉଛି। ଫଳରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ତାପମାତ୍ରା ଖସିବା ଯୋଗୁ ଲୋକେ ଜଳବାୟୁ ସହିତ ଖାପ ଖୁଆଇବା ମୁସ୍କିଲ୍ ହୋଇପଡିଛି। ଏପରି କି ଦିନତମାମ ଶୀତ ଲହରି ଜାରି ରହିଛି। ବାହାରକୁ ଗଲେ ଗୋଡ଼, ମୁହଁ, ହାତ ପୋଡିଲା ଭଳି ଲାଗୁଛି । ଶୀତ ଯୋଗୁ ଲୋକେ ଦିନ ୧୦ଟା ପରେ ଘରୁ ବାହାରକୁ ବାହାରୁଛନ୍ତି। ରବିବାର ସକାଳେ ଫୁଲବାଣୀ ସହରର କେତେକ ସ୍ଥାନରେ ଗାଡ଼ିର କାଚ ଉପରେ ବରଫ ଆସ୍ତରଣ ଜମି ରହିଥିବା ଦେଖିବାକୁ ମିଳିଥିଲା। ତଥାପି ଲୋକେ ଶୀତର ମଜା ଉଠାଉଛନ୍ତି। ଗତ କିଛିଦିନ ହେବ ଶୀତ ଏକପ୍ରକାର ଗାଏବ ହୋଇଯାଇଥିଲା। ପାଗ ମେଘୁଆ ଥିବା ଯୋଗୁ ଏପରି ହେଉଥିବା ଅନୁମାନ କରାଯାଉଥିଲା।
ପୁଣୀ ଶୀତ ଫେରିବ ବୋଲି ଲୋକେ ଯେଉଁ ଆଶା କରୁଥିଲେ ତାହା ସତ ହୋଇଛି। ଖରା ହେଉଥିଲେ ମଧ୍ୟ ଶୀତବସ୍ତ୍ର ବିନା ବାହାରକୁ ବାହାରି ହେଉନାହିଁ। ଆଗାମୀ ଦିନରେ ଆହୁରି ତାପମାତ୍ରା ଖସିବା ସହ ଥଣ୍ଡା ବଢିବା ନେଇ ପ୍ରାକ୍ ଆକଳନ କରାଯାଉଛି। ଶୀତରୁ ରକ୍ଷା ପାଇବା ପାଇଁ ଲୋକେ ନିଆଁର ଆଶ୍ରୟ ନେଉଛନ୍ତି। ଏପରି କି ଲୋକେ ଦେହକୁ ଫିଟ୍ ରଖିବା ପାଇଁ ସକାଳୁ ମର୍ନିଂୱାକ କରୁଛନ୍ତି। ଜିଲାର ବାଲିଗୁଡ଼ା, ତୁମୁଡ଼ିବନ୍ଧ, କୋଟଗଡ଼, ବେଲଘର, ଜି.ଉଦୟଗିରି, ରାଇକିଆ ଆଦି ଅଞ୍ଚଳରେ ପାରଦ ଖସିବା ଫଳରେ ପ୍ରବଳ ଥଣ୍ଡା ଅନୁଭୂତ ହେଉଛି।
