ଖୋର୍ଦ୍ଧା ଅଫିସ,୨୨ା୧୦: ବ୍ରାଉନସୁଗାର କାରବାରର ହବ୍ ପାଲଟିଛି ଖୋର୍ଦ୍ଧା ସହର। କୋଲକାତା, ବାଲେଶ୍ୱର, ଜଳେଶ୍ୱର ଆଦି ଅଞ୍ଚଳରୁ ବିଭିନ୍ନ ଗଳାବାଟ ଦେଇ ଖୋର୍ଦ୍ଧାକୁ ଆସୁଛି। ଏଠାରୁ ପଡ଼ୋଶୀ ଜିଲା ସହିତ ବିଭିନ୍ନ ଗ୍ରାମାଞ୍ଚଳକୁ ପଠାଯାଉଛି। ଏସ୍ଟିଏଫ୍, ପୋଲିସ ଏବଂ ଅବକାରୀ ପକ୍ଷରୁ ବାରମ୍ବାର ଚଢ଼ାଉ ସତ୍ତ୍ୱେ ବ୍ରାଉନସୁଗାର କାରବାର ଥମୁନି। ଖୋର୍ଦ୍ଧା ସହରକୁ ନିଶାମୁକ୍ତ ଲାଗି ଖୋର୍ଦ୍ଧା ପୋଲିସ ପକ୍ଷରୁ ଆରମ୍ଭ ହୋଇଥିବା ଅପରେସନ ହ୍ବାଇଟ ସ୍ପାଇଡରକୁ ମିଳିଛି ସଫଳତା। ଶୁକ୍ରବାର ଠେଙ୍ଗାହାଟ ଛକରେ ଚଢ଼ାଉ କରି ୫୦ ଗ୍ରାମ ବ୍ରାଉନସୁଗାର, ୫୧୧.୬୭୦ ଗ୍ରାମ ସୁନା, ୮୩୦ଗ୍ରାମ ରୁପା, ୧୩ଲକ୍ଷ ୬୮ହଜାର ଟଙ୍କା ଜବତ କରିଥିବା ବେଳେ ଏକ ପରିବାରର ୪ ଭଉଣୀଭାଇଙ୍କ ସମେତ ୬ଜଣଙ୍କୁ ପୋଲିସ ଗିରଫ କରିଛି। ଅଭିଯୁକ୍ତମାନେ ହେଲେ ସାମନ୍ତରାପୁର ଠେଙ୍ଗାହାଟର କାନି ବେହେରା(୩୮), ସ୍ବର୍ଣ୍ଣଲତା ବେହେରା(୪୦), ଦମୟନ୍ତୀ ନାୟକ (୪୦), ଭାଲିଆବଡିର ବିରେନ୍ଦ୍ର ବେହେରା ଓରଫ ନନ୍ଦୁ(୨୭), ଏବଂ ସଦର ଥାନା ଗୁଡୁମ ଗ୍ରାମର କୁଲମଣି ବେହେରା ଓରଫ କୁଳ(୩୦), ନୀଳମଣି ବେହେରା। କାନିଙ୍କ ଠାରୁ ୩୦ ଗ୍ରାମ ଏବଂ ସ୍ବର୍ଣ୍ଣଲତାଙ୍କ ଠାରୁ ୨୦ଗ୍ରାମ ବ୍ରାଉନସୁଗାର ଜବତ କରାଯାଇଛି। ଜବତ ବ୍ରାଉନସୁଗାର ମୂଲ୍ୟ ୫ ଲକ୍ଷ ଟଙ୍କା ଏବଂ ସୁନାଅଳଙ୍କାର ମୂଲ୍ୟ ପ୍ରାୟ ୨୫ ଲକ୍ଷ ଟଙ୍କା ହେବ ବୋଲି ଶୁକ୍ରବାର ଜିଲା ପୋଲିସ କାର୍ଯ୍ୟାଳୟ ଠାରେ ଆୟୋଜିତ ଖବରଦାତା ସମ୍ମିଳନୀରେ ଜିଲା ଆରକ୍ଷୀ ଅଧୀକ୍ଷକ ସିଦ୍ଧାର୍ଥ କଟାରିଆ ସୂଚନା ଦେଇଛନ୍ତି। ଏନେଇ ଥାନାରେ ଏନଡିପିଏସ ଆକ୍ଟ ୨୧(ବି)/୨୯ରେ ମାମଲା (ନଂ.୫୨୧/୨୨) ରୁଜୁ ହୋଇଛି। ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଡିଆଇବି ଡିଏସ୍ପି ଅଚ୍ୟୁତ ରାଉତ, ସଦର ଏସ୍ଡିପିଓ ଦିଲୀପ ଦାସ, ଥାନା ଅଧିକାରୀ ତାରିକ ଅହମ୍ମଦ ଏବଂ ଅନ୍ୟ ପୋଲିସ ଅଧିକାରୀ ଉପସ୍ଥିତ ଥିଲେ।
ଏନ୍ଡିପିଏସ୍ରେ ଗିରଫ ସଂଖ୍ୟା ୪୩
ଏସ୍ପିଙ୍କ ସୂଚନା ମୁତାବକ, ଖୋର୍ଦ୍ଧା ସହର ବ୍ରାଉନସୁଗାର ହବ୍ ପାଲଟିଛି। ବିଭିନ୍ନ ସ୍ଥାନରୁ ଏଠାକୁ ଆସିବା ପରେ ଚାରିଆଡେ ପଠାଯାଉଛି। ଗୁରୁଜଙ୍ଗ, ଠେଙ୍ଗାହାଟ, ସାମନ୍ତରାପୁର ଆଦି ଅଞ୍ଚଳରେ ବ୍ରାଉନସୁଗାର କାରବାର ବଢିଚାଲିଛି। ଏହା ଉପରେ ଖୋର୍ଦ୍ଧା ପୋଲିସର ନଜର ରହିଛି। ଏଥିଲାଗି ଏକ ସ୍ବତନ୍ତ୍ର ଡ୍ରାଇଭ ଆରମ୍ଭ କରାଯାଇଥିଲା। ବର୍ତ୍ତମାନ ସୁଦ୍ଧା ୨୫ଟି ଏନଡିପିଏସ୍ ଆକ୍ଟ କେଶ କରାଯାଇଛି। ସେଥିରୁ ୧୮ଟି ବ୍ରାଉନସୁଗାର ଏବଂ ୭ଟି ଗଞ୍ଜେଇ କେଶ। ଏଥିରେ ସମ୍ପୃକ୍ତି ନେଇ ୪୩ ଜଣଙ୍କୁ ଗିରଫ କରାଯାଇଛି। ସେଥିରୁ ୩୯ଜଣ ପୁରୁଷ ଓ ୪ଜଣ ମହିଳା ଅଛନ୍ତି। ବର୍ତ୍ତମାନ ସୁଦ୍ଧା ୧କେଜି ୩ ଶହ ଗ୍ରାମ ବ୍ରାଉନସୁଗାର ଏବଂ ୨୧୮କେଜି ଗଞ୍ଜେଇ ଜବତ କରାଯାଇଛି।
ସମ୍ପତ୍ତି ବାଜ୍ୟାପ୍ତି କରାଯିବ
ନିଶା କାରବାରରେ ଗିରଫ ହୋଇଥିବା ଅଭିଯୁକ୍ତଙ୍କ ଫାଇନାନ୍ସିଆଲ ଆସେସମେଣ୍ଟ (ସମ୍ପତ୍ତି ତାଲିକା) କରାଯିବ। ବେଆଇନ ଭାବେ ଗଚ୍ଛିତ ସମ୍ପତ୍ତିକୁ ବାଜ୍ୟାପ୍ତି କରାଯିବା ସହ ସରକାରୀ ଜାଗାକୁ ବେଆଇନ ଭାବେ ଅକ୍ତିଆର କରି ସେଠାରେ ନିଶା କାରବାର ଚଳାଉଥିବା ପ୍ରମାଣ ମିଳିଲେ, ପ୍ରଶାସନର ସହଯୋଗରେ ଉଚ୍ଛେଦ କରାଯିବ। ନିକଟରେ ୩ ଅଭିଯୁକ୍ତଙ୍କ ସରକାରୀ ଜାଗାରେ ନିଶା କାରବାର ଚଳାଇଥିବା ପ୍ରମାଣ ହସ୍ତଗତ ପରେ ସେମାନଙ୍କ ଜାଗା ଉଚ୍ଛେଦ କରାଯାଇଛି।
ଜେଲ ଫେରନ୍ତାଙ୍କ ଉପରେ ନଜର
ଖୋର୍ଦ୍ଧା ସହରରେ ନିଶା କାରବାରରେ ଲିପ୍ତ ଥାଇ ଜେଲରେ ଥିବା ଅଭିଯୁକ୍ତଙ୍କ ଲିଙ୍କ, ଜେଲ ଫେରନ୍ତାଙ୍କ ଉପରେ ନଜର ରଖାଯାଉଛି। ସେମାନେ କେଉଁଠିକି ଯାଉଛନ୍ତି, କାହା ସହିତ ଡିଲ କରୁଛନ୍ତି, ସେମାନଙ୍କ ସମସ୍ତ କାର୍ଯ୍ୟ ଉପରେ ପୋଲିସର ନଜର ରହିଛି।
ସାମିଲ ଥିଲା ୧୧ ଜଣିଆ ଟିମ୍
ଏସ୍ଡିପିଓ ଦିଲୀପ ଦାସଙ୍କ ନେତୃତ୍ୱରେ ଆଦର୍ଶ ଥାନାଧିକାରୀ ତାରିକ୍ ଅହମ୍ମଦ, ଅତିରିକ୍ତ ଆଇଆଇସି ଚନ୍ଦ୍ରଶେଖର ଜେନା, ଏସ୍ଆଇ ସୁକାନ୍ତ ଦଳାଇ, ସସ୍ମିତା ବେହେରା, ଏଏସଆଇ ପି.କେ ପ୍ରଧାନ, କନଷ୍ଟେବଳ ପ୍ରଦୀପ ହରିଚନ୍ଦନ, ଏ.ଏମ୍. ମାସି ଖାନ, ଅନିତା ତରାଇ, ସୁଧାକର ପାଟ୍ଟଶାଣି ଏବଂ ଏସ୍.ହାନ୍ତଲାଙ୍କୁ ନେଇ ଗଠିତ ଟିମ୍ ଚଢ଼ାଉ କରି ଅଭିଯୁକ୍ତଙ୍କୁ ଧରିଥିଲେ।
