ଭଦ୍ରକ ଅଫିସ,୧୨।୧୦: ବହୁଚର୍ଚ୍ଚିତ ନୟାଗଡ଼ର କ୍ୟାମେରାମ୍ୟାନ୍ ମାନସ ସ୍ବାଇଁ ଅପହରଣ ଓ ହତ୍ୟା ମାମଲାରେ ଗିରଫ ହୋଇ ଜେଲରେ ଥିବା ୬ ଅଭିଯୁକ୍ତଙ୍କୁ ଚାର୍ଜଫ୍ରେମ୍ ପାଇଁ ମଙ୍ଗଳବାର ଭଦ୍ରକ ଜିଲା ଅଦାଲତରେ ହାଜର କରାଯାଇଛି। ଜେଲରୁ କଡ଼ା ସୁରକ୍ଷା ମଧ୍ୟରେ ସେମାନଙ୍କୁ କୋର୍ଟକୁ ଅଣାଯାଇଥିଲା। କ୍ରାଇମବ୍ରାଞ୍ଚ ଦ୍ୱାରା ଦାଖଲ କରାଯାଇଥିବା ଚାର୍ଜଶିଟ୍ ଅନୁଯାୟୀ ସମସ୍ତ ଦଫାରେ ଚାର୍ଜଫ୍ରେମ ହୋଇଛି। ପୂର୍ବରୁ ଏହି ମାମଲାରେ ଅନ୍ୟତମ ଅଭିଯୁକ୍ତ ପରମେଶ୍ୱର ରାଉତ ଜାମିନରେ ଆସିଥିଲେ। ଗତ ସେପ୍ଟେମ୍ବର ୮ରେ ଅଭିଯୁକ୍ତ ଝୁନା ଭୋଇ ମଧ୍ୟ ଜାମିନ ପାଇଁ ଦରଖାସ୍ତ କରିଥିଲେ। ଜିଲା ଜଜ୍ ପ୍ରଦ୍ୟୁମ୍ନ କୁମାର ନାୟକ ଶୁଣାଣି କରି ତାଙ୍କ ଜାମିନ ଖାରଜ କରିଥିଲେ।
ସୂଚନାଯୋଗ୍ୟ, ଏହି ମାମଲାରେ ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତଙ୍କ ସମେତ ସହଯୋଗୀ ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗର ପୂର୍ବତନ ବୈଷୟିକ ନିର୍ଦ୍ଦେଶକ ନିରଞ୍ଜନ ସେଠୀ, ଝୁନା, କୃଷ୍ଣଚନ୍ଦ୍ର ନାୟକ, ଭାଗ୍ୟଧର ନାୟକ, ବିବେକ ନାୟକ, ପରମେଶ୍ୱର ରାଉତ ଓ ରଞ୍ଜନ କୁମାର ନାୟକଙ୍କୁ ଗିରଫ କରାଯାଇଥିଲା। ଏହାମଧ୍ୟରେ ତଦନ୍ତ ଶେଷ କରି କ୍ରାଇମବ୍ରାଞ୍ଚ ଚୂଡ଼ାନ୍ତ ଚାର୍ଜଶିଟ୍ ଚାନ୍ଦବାଲି ପ୍ରଥମଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ର୍ରେଟଙ୍କ କୋର୍ଟରେ ଦାଖଲ କରିବା ପରେ ଚଳିତ ମାସ ୮ ତାରିଖରେ ମାମଲାର ବିଚାର ପାଇଁ ଜିଲା ଜଜ୍ କୋର୍ଟକୁ ସ୍ଥାନାନ୍ତର ହୋଇ ଚାର୍ଜଫ୍ରେମ୍ ପାଇଁ ଧାର୍ଯ୍ୟ କରାଯାଇଥିଲା। ପରମେଶ୍ୱର ଓ ଝୁନାଙ୍କ ବ୍ୟତୀତ ଅନ୍ୟ ୬ ଅଭିଯୁକ୍ତ କୋର୍ଟରେ ହାଜର ହୋଇଥିଲେ।
