ରଜ ଦୁଇଦିନରେ ୬.୭୭ କୋଟିର ଆମିଷ ବେପାର
7:58 amJune 17, 2023June 17, 2023 / 08

ଭୁବନେଶ୍ୱର,୧୭ା୬ (ବନ୍ଦନା ସେଠୀ) ସରିଲା ରଜ। ଦୋଳି ସାଙ୍ଗକୁ ଭଳିକି ଭଳି ପିଠା, ପାନ ସହିତ ରାଜଧାନୀବାସୀ ପାଳନ କରିଥିଲେ ରଜ ଉତ୍ସବ। ତେବେ ଏଥର ରଜ ଭଲ ବାରରେ ପଡିଥିବାରୁ ପିଠାଖିଆ ସାଙ୍ଗକୁ ଆମିଷ ବାସ୍ନାରେ ପୂରି ଉଠିଥିଲା ଘରଠୁ ବାହାର। ଚିକେନ୍‌, ମାଛ, ଚିଙ୍ଗୁଡି, କଙ୍କଡ଼ା ବେପାର ଜମିଥିବାବେଳେ ମଟନ ଉପରେ ଲୋକଙ୍କର ଚାହିଦା ଅଧିକ ରହିଥିଲା। ବିଶେଷକରି ବୁଧବାର ଓ ଶୁକ୍ରବାର ୨ଦିନରେ ଭୁବନେଶ୍ୱରର ୬କୋଟି ୬୭ଲକ୍ଷ ଟଙ୍କାର ଆମିଷ ବେପାର ହୋଇଥିବା ଆମିଷ ବ୍ୟବସାୟୀ ସଂଘ ପକ୍ଷରୁ ସୂଚନା ଦିଆଯାଇଛି।
ପହିଲି ରଜ ବୁଧବାର ପଡିଥିବାରୁ ସେହିଦିନ ୨କୋଟି ଟଙ୍କାର ମଟନ ବେପାର ହୋଇଥିଲା। ସେହିପରି ୧କୋଟି ୭୦ଲକ୍ଷ ଟଙ୍କାର ଚିକେନ୍‌ ଓ ୭୨ଲକ୍ଷ ଟଙ୍କାର ମାଛ ବିକ୍ରି ହୋଇଥିଲା। ପହିଲି ରଜ ତୁଳନାରେ ଶୁକ୍ରବାର ଶେଷ ରଜରେ ଟିକେ କମିଥିଲେ ବି ଭଲ ବେପାର ହୋଇଥିଲା। ପ୍ରାୟ ୧କୋଟି ଟଙ୍କାର ମଟନ ବିକ୍ରି ହୋଇଥିବାବେଳେ ୮୫ଲକ୍ଷ ଟଙ୍କାର ଚିକେନ୍‌ ଓ ୪୦ ଲକ୍ଷ ଟଙ୍କାର ମାଛ ବିକ୍ରି ହୋଇଥିଲା। ବୁଧବାର ୧୦୦ଟି ଓ ଶୁକ୍ରବାର ୫୦ଟି ଚିକେନ ଗାଡ଼ି ଭୁବନେଶ୍ୱର ଆସିଥିଲା ବୋଲି ସଂଘ କହିଛି।
ରଜ ବଜାରକୁ ଦୃଷ୍ଟିରେ ରଖି ଆମିଷର ଦର ଟିକେ ଚଢା ରହିଥିଲା। ଖାସି ମାଂସ କେଜି ୭ଶହରୁ ୮ଶହ ଟଙ୍କାରେ ବିକ୍ରି ହୋଇଥିଲାବେଳେ ମାଈ ଛେଳି କେଜି ୭ଶହ ଟଙ୍କା, ଚିକେନ୍‌ ୨୫୦ ଟଙ୍କା, ଦେଶୀ କୁକୁଡ଼ା ୪୫୦-୫ଶହ ଟଙ୍କା, ବନରାଜ ୩ଶହ ଟଙ୍କା, ରୋହି ମାଛ ୨୨୦ ଟଙ୍କା, ଜଳଙ୍ଗ ୧୬୦-୧୭୦ଟଙ୍କା, ଖଇଙ୍ଗା ୪ଶହରୁ ୫ଶହ ଟଙ୍କା, ପୋହଳା ୧୬୦-୨ଶହ ଟଙ୍କା, ମିରିକାଳୀ ୨୨୦-୨୫୦ଟଙ୍କା, ବଡ଼ ଚିଙ୍ଗୁଡି ୪ଶହ, ଛୋଟ ଚିଙ୍ଗୁଡି ୨୬୦-୩ଶହ ଟଙ୍କା, କଙ୍କଡା ୫ଶହ-୬ଶହ ଟଙ୍କା ଦର ରହିଥିଲା।