ବେଙ୍ଗାଲୁରୁ,୩।୩ : ମିଛ ଆୟକର (ଆଇଟି) ଚଢ଼ାଉ କରି କର୍ନାଟକର ଜଣେ ଟମାଟର ବ୍ୟବସାୟୀଙ୍କୁ କିଛି ଅଜଣା ଲୋକ ଠକିଛନ୍ତି। ସେମାନେ ବ୍ୟବସାୟୀଙ୍କ ଘରୁ ୩୫ ଲକ୍ଷ ଟଙ୍କା ଏବଂ ୨୦ ଲକ୍ଷ ଟଙ୍କା ମୂଲ୍ୟର ଅଳଙ୍କାର ଲୁଟି ନେଇଛନ୍ତି। ନକଲି ଆୟକର ଅଧିକାରୀମାନେ ବ୍ୟବସାୟୀଙ୍କ ପରିବାର ସଦସ୍ୟଙ୍କୁ ଡରାଇ ସେମାନଙ୍କୁ ଧମକ ଦେଇ ବାନ୍ଧି ପଳାଇ ଯାଇଥିଲେ। ବର୍ତ୍ତମାନ ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି।
ଟାଇମ୍ସ ଅଫ ଇଣ୍ଡିଆର ରିପୋର୍ଟ ଅନୁଯାୟୀ, କୋଲାରର ବାଇର୍ ଗୌଡା ଏକ୍ସଟେନଶନ ଅଞ୍ଚଳରେ ଏଭଳି ଘଟିଛି। ଏଠାରେ ନିଜକୁ ଆୟକର ଅଧିକାରୀ ଭାବେ ପରିଚୟ ଦେଇ କିଛି ଲୋକ ଟମାଟର ବ୍ୟବସାୟୀ ତଥା ପୂର୍ବତନ ଏପିଏମସି ସଭାପତି ରମେଶଙ୍କ ଘରେ ପହଞ୍ଚିଥିଲେ। ଏହା ସନ୍ଦେହଜନକ ମନେ ହୋଇ ନଥିଲା। ରମେଶ ଅଧିକାରୀମାନଙ୍କୁ ଘରେ ପ୍ରବେଶ କରିବାକୁ ଅନୁମତି ଦେଇଥିଲେ। କିନ୍ତୁ ପରେ ତାଙ୍କର ସନ୍ଦେହ ହୋଇଥିଲା।
ପ୍ରକାଶ ଯେ, ୬ ଜଣ ଅଭିଯୁକ୍ତ ଆୟକର ଅଧିକାରୀ ଭାବେ ପରିଚୟ ଦେଇ କିଛି ଫାଇଲ ଦେଖାଇଥିଲେ ଯେଉଁଥିରେ ସିବିଆଇ ଉଲ୍ଲେଖ କରାଯାଇଥିଲା। ଘରେ ପ୍ରବେଶ କରିବା ପରେ ସେମାନେ ପରିବାର ସଦସ୍ୟଙ୍କୁ ଟଙ୍କା ଏବଂ ଅନ୍ୟାନ୍ୟ ମୂଲ୍ୟବାନ ଜିନିଷ ବିଷୟରେ ପଚରାଉଚରା କରିଥିଲେ। ରମେଶ, ତାଙ୍କ ସ୍ତ୍ରୀ ଏବଂ ପୁଅ ସେମାନଙ୍କ ପ୍ରଶ୍ନର ଉତ୍ତର ଦେଇଥିଲେ ଏବଂ ଟଙ୍କା ଅଳଙ୍କାର କେଉଁଠାରେ ରଖାଯାଇଥିଲା ସେ ସମ୍ପର୍କରେ ସୂଚନା ଦେଇଥିଲେ।
ସେମାନେ ଟଙ୍କା ସଂଗ୍ରହ କରିବା ପରେ ପ୍ୟାକ କରିବା ଆରମ୍ଭ କରିଥିଲେ। ସେତେବେଳେ ରମେଶଙ୍କର ସନ୍ଦେହ ହେବାରୁ ସେ ଚଢ଼ାଉରେ ପୋଲିସ ଅନୁପସ୍ଥିତିକୁ ନେଇ ପ୍ରଶ୍ନ କରିଥିଲେ। ଏହା ପରେ ଅଭିଯୁକ୍ତମାନେ ପରିବାର ସଦସ୍ୟଙ୍କୁ ଛୁରୀ ଦେଖାଇ ଧମକ ଦେଇ ପୂଜାଘରେ ତିନିଜଣଙ୍କୁ ଦଉଡିରେ ବାନ୍ଧି ଦେଇଥିଲେ। ଏହା ପରେ ସେମାନେ ସିସିଟିଭିକୁ ନଷ୍ଟ କରି ଫେରାର ହୋଇ ଯାଇଥିଲେ। ଘଟଣା ସମ୍ପର୍କରେ ସୂଚନା ପାଇବା ପରେ କୋଲାର ଏସପି ଦେବରାଜ ଘଟଣାସ୍ଥଳରେ ପହଞ୍ଚି ରମେଶ ଏବଂ ତାଙ୍କ ପରିବାର ସଦସ୍ୟଙ୍କୁ ଉଦ୍ଧାର କରି ପଚରାଉଚରା କରିଥିଲେ।
ରମେଶ ଜଣେ ଟମାଟର ବ୍ୟବସାୟୀ ଏବଂ ଚିଟ ଫଣ୍ଡ ବ୍ୟବସାୟ ମଧ୍ୟ କରନ୍ତି। ସେ ତାଙ୍କ ଅଫିସରୁ ପ୍ରାୟ ୩୫ ଲକ୍ଷ ଟଙ୍କା ଆଣି ଘରେ ରଖିଥିଲେ।
