ଚାନ୍ଦବାଲି,୨୧।୧୦(ଡି.ଏନ.ଏ.):ଭଦ୍ରକ ଜିଲା ଧାମରା ମାଛଧରା ଜେଟିରେ ଶନିବାର ପ୍ରାୟ ୫୦ କୁଇଣ୍ଟାଲ ‘ଇଲା’ ମାଛ ଧରାଯାଇଛି। ଏହି ମାଛ ଦେଖିବାକୁ ଇଲଶି ପରି। ଏହାର ସ୍ଥାନୀୟ ନାମ ଚନ୍ଦନୀ ବୋଲି ଜଣାଯାଇଛି। ଆକାରରେ ଛୋଟ ହୋଇଥିବା ବେଳେ ଗୋଟିଏ ମାଛର ଓଜନ ୨ଶହରୁ ୩ଶହ ଗ୍ରାମ୍ ହେବ। କିଲୋ ପ୍ରତି ଦାମ୍ ୭୦ରୁ ୧୦୦ ଟଙ୍କା। ଏହି ମାଛକୁ ପଶ୍ଚିମବଙ୍ଗର ଦୀଘା ମାଛ ବଜାରକୁ ପଠାଯାଇଛି।
ପ୍ରକାଶ ଯେ, କରଣପଲ୍ଲୀ ନିବାସୀ ବିକି ମଣ୍ଡଳ ଆଇଏନ୍ଡି ଓଆର୍ ଜିରୋ ୱାନ୍ ଏମ୍ଏମ୍-୫୪୪ ମା’ ଶୀତଳା-୩୪ ନାମକ ଗିଲେନେଟ୍ ବୋଟ୍ ନେଇ ଧାମରାଠାରୁ ପ୍ରାୟ ୬୦ କି.ମି. ଦୂର ଗଭୀର ସମୁଦ୍ରରେ ଜାଲରେ ମାଛ ଧରୁଥିଲେ। ଏହି ମାଛ ତାଙ୍କ ଜାଲରେ ପଡ଼ିଥିଲା। ଏତେ ପରିମାଣର ଥିବାରୁ ସ୍ଥଳଭାଗକୁ ଆଣିବା ସହଜ ନ ଥିଲା। ଫଳରେ ଜାଲର କିଛି ଅଂଶ କାଟି ବାକିତକ ମାଛକୁ ଧରି ମତ୍ସ୍ୟଜୀବୀମାନେ ଧାମରା ମାଛଧରା ଜେଟିକୁ ଫେରିଥିଲେ। ତେବେ ମାଛର ବଜାର ମୂଲ୍ୟ କମ୍ ଥିବାରୁ ବୋଟ୍ ମାଲିକ ଏହି ମାଛ ବିକ୍ରିରେ ସେତେ ଲାଭବାନ ହୋଇପାରିବେ ନାହିଁ ବୋଲି ସ୍ଥାନୀୟ ମତ୍ସ୍ୟଜୀବୀମାନେ କହିଛନ୍ତି।
