୫ ମହାନଗର ନିଗମ ବସ୍ତିବାସିନ୍ଦାଙ୍କୁ ମିଳିବ ଭୂମି ଅଧିକାର
9:03 amMarch 30, 2022March 30, 2022 / 09

ଭୁବନେଶ୍ୱର,୩୦।୩(ବ୍ୟୁରୋ): ରାଜ୍ୟର ୫ ମହାନଗର ନିଗମରେ ବାସ କରୁଥିବା ବସ୍ତିବାସିନ୍ଦାଙ୍କୁ ଭୂମି ଅଧିକାର ମିଳିବ। ଓଡ଼ିଶା ମହାନଗର ନିଗମ ଅଧିନିୟମ, ୨୦୦୩ରେ ସଂଶୋଧନ କରାଯାଇ ମହାନଗର ନିଗମର ବସ୍ତି ବାସିନ୍ଦାମାନଙ୍କୁ ମଧ୍ୟ ଭୂମି ଅଧିକାର ଦେବା ସକାଶେ ପୌର ନିଗମ(ସଂଶୋଧନ) ବିଲ୍‌-୨୦୨୨କୁ ବିଧାନସଭାରେ ପାରିତ କରାଯାଇଛି। ଏଥିରେ ୪୫ ବର୍ଗମିଟର ପର୍ଯ୍ୟନ୍ତ ଭୂମି ବସ୍ତି ବାସିନ୍ଦାଙ୍କ ପରିବାରକୁ ଯୋଗାଇ ଦେବାର ବ୍ୟବସ୍ଥା ରହିଛି। ଯଦି ବସ୍ତି ବାସିନ୍ଦା ଅର୍ଥନୈତିକ ଦୁର୍ବଳ ଶ୍ରେଣୀର ବ୍ୟକ୍ତି ହୋଇଥାନ୍ତି, ତେବେ ତାଙ୍କୁ ୩୦ ବର୍ଗମିଟର ପର୍ଯ୍ୟନ୍ତ ଭୂମି ବିନା ମୂଲ୍ୟରେ ଯୋଗାଇ ଦିଆଯିବ। ଯଦି ବସ୍ତି ବାସିନ୍ଦାଙ୍କ ପରିବାର ୩୦ ବର୍ଗମିଟରରୁ କମ୍‌ ଦଖଲ କରୁଥାନ୍ତି ଏବଂ ବାସଗୃହ ସଂଲଗ୍ନରେ ଖାଲି ସରକାରୀ ଭୂମି ଉପଲବ୍ଧ ଥାଏ, ତେବେ ଉକ୍ତ ଭୂମିକୁ ମିଶାଇ ୩୦ ବର୍ଗମିଟର ପାଇଁ ଭୂମି ଅଧିକାର ମଞ୍ଜୁର କରିବାକୁ ପ୍ରସ୍ତାବ ରହିଛି। ଏହାଦ୍ୱାରା ୫ ଗୋଟି ପୌର ନିଗମ କ୍ଷେତ୍ରରେ ବସବାସ କରୁଥିବା ପ୍ରାୟ ୨,୪୦,୦୦୦ ପରିବାରର ପାଖାପାଖି ୯,୭୦,୦୦୦ ଲୋକ ଉପକୃତ ହୋଇପାରିବେ।
ମଙ୍ଗଳବାର ବିଧାନସଭାରେ ୪ଟି ବିଲ୍‌ ପାରିତ ହୋଇଛି। ସେହି ବିଲ୍‌ଗୁଡ଼ିକ ହେଲା, ଓଡ଼ିଶା ପୌର ବିଧି (ସଂଶୋଧନ) ବିଲ୍‌ ୨୦୨୨, ଶ୍ରୀଜଗନ୍ନାଥ ମନ୍ଦିର (ସଂଶୋଧନ) ବିଲ୍‌ ୨୦୨୨ ଏବଂ ଓଡ଼ିଶା ପଞ୍ଚାୟତ ବିଧି(ସଂଶୋଧନ) ବିଲ୍‌ ୨୦୨୨। ପଞ୍ଚାୟତିରାଜ ଓ ପାନୀୟ ଜଳ, ଆଇନ ଓ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା ଉକ୍ତ ବିଲ୍‌ଗୁଡ଼ିକୁ ବିଧାନସଭାର ଅନୁମୋଦନ ପାଇଁ ଆଗତ କରିଥିଲେ।