ଖୋର୍ଦ୍ଧା ଅଫିସ,୭।୩: ଖୋର୍ଦ୍ଧା ଜିଲା ଟାଙ୍ଗୀ ଥାନା ଅଧୀନ ଭୂଷଣ୍ଡପୁରରେ ଦୋଳ ପୂର୍ଣ୍ଣିମା ପାଇଁ ବାଣ ପ୍ରସ୍ତୁତି ବେଳେ ବିସ୍ଫୋରଣରେ ସୋମବାର ୫ଜଣଙ୍କ ମୃତ୍ୟୁ ଘଟିଥିବା ବେଳେ ୩ଜଣ ଗୁରୁତର ଅବସ୍ଥାରେ ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅଛନ୍ତି। ଏନେଇ ଜିଲା ପ୍ରଶାସନ ପକ୍ଷରୁ ଗୁରୁତ୍ୱପୂର୍ଣ୍ଣ ବୈଠକ ଚାଲିଛି।
ଜିଲାପାଳ କେ.ସୁଦର୍ଶନ ଚକ୍ରବର୍ତ୍ତୀଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ଜିଲା ଆରକ୍ଷୀ ଅଧୀକ୍ଷକ ସିଦ୍ଧାର୍ଥ କଟ୍ଟାରିଆ, ଅତିରିକ୍ତ ଜିଲାପାଳ ପ୍ରତାପ ଚନ୍ଦ୍ର ବେଉରା, ସାଫଲ୍ୟ ମଣ୍ଡିତ ପ୍ରଧାନ, ପ୍ରଫୁଲ୍ଲ କୁମାର ସ୍ବାଇଁ, ଉପଜିଲାପାଳ ଦୀପ୍ତିରଞ୍ଜନ ସେଠୀ, ଦେବବ୍ରତ ସାହୁ, ସଦର ଏସ୍ଡିପିଓ ଦିଲୀପ ଦାସ, ବାଲୁଗାଁ ଏସ୍ଡିପିଓ ମାନସ ରଞ୍ଜନ ବାରିକଙ୍କ ସମେତ ସମସ୍ତ ଥାନାର ଅଧିକାରୀଙ୍କ ସହ ବିଭାଗୀୟ କର୍ମଚାରୀ ଉପସ୍ଥିତ ଅଛନ୍ତି। ଶୃଙ୍ଖଳିତ ଦୋଳ ଓ ଆତସବାଜି ଆୟୋଜନ ଉପରେ ବୈଠକରେ ଗୁରୁତ୍ୱ ଦିଆଯାଇଛି।
ଦୋଳ ଉତ୍ସବ ଜିଲାର ବିଭିନ୍ନ ସ୍ଥାନରେ ଆଡ଼ମ୍ବର ସହକାରେ ପାଳନ କରାଯାଏ। ଏହି ସମୟରେ ଗାଁ ଗାଁ ମଧ୍ୟରେ ଆତସବାଜି ପ୍ରତିଯୋଗିତା ହୋଇଥାଏ। ସୋମବାର ଘଟଣା ପରେ ଜିଲା ପ୍ରଶାସନ ଏହାକୁ ଗୁରୁତର ସହ ନେଇଛି। ଉତ୍ସବରେ କୌଣସି ଆତସବାଜି ପଟୁଆର ହୋଇପାରିବ ନାହିଁ। ଏପରି କି ବାଣ ପ୍ରସ୍ତୁତିକୁ ଅନୁମତି ଦିଆଯିବ ନାହିଁ। ବେଆଇନ ଭାବେ ଚାଲିଥିବା ବାଣ ଗୋଦାମ ଉପରେ ଚଢାଉ କରାଯିବ। କେବଳ ଯାଚନା, ମାନସିକ ବାଣ ଫୁଟାଇପାରିବେ। ବାଣ ଫୁଟାଇବା ଲାଗି ଗାଁଠାରୁ ଦୂର ଖୋଲାସ୍ଥାନରେ ଆୟୋଜନ କରାଯିବ। ବାଣ ଫୁଟାଇବା ସ୍ଥାନ ଚାରିପଟ ଡବଲ ବ୍ୟାରିକେଡ୍, ପର୍ଯ୍ୟାପ୍ତ ମାତ୍ରାରେ ବାଲିବସ୍ତା, ପାଣି ବ୍ୟବସ୍ଥା କରିବାକୁ ବୈଠକରେ କୁହାଯାଇଛି। ଏ ନେଇ ଆୟୋଜକ କମିଟି ପୋଲିସ ଓ ପ୍ରଶାସନକୁ ସମସ୍ତ ବ୍ୟବସ୍ଥା ସମ୍ପର୍କରେ ପୂର୍ବରୁ ଅବଗତ କରାଇବ। ଘଟଣାସ୍ଥଳରେ ପୋଲିସ ଓ ଅଗ୍ନିଶମ କର୍ମଚାରୀ ଉପସ୍ଥିତ ରହିବେ ବୋଲି ବୈଠକରେ ନିଷ୍ପତ୍ତି ନିଆଯାଇଛି।
